الموضوع: رابطه مالكي الباسات b5&b5.5 من 1996 الي2005

المشاركة الأصلية كتبت بواسطة alzelafy

مقاس الزيت عندى مش مظبوط عايز اعرف العربيه بتاخد كام كيلو زيت بدون الفلتر 1600 سىسى

بص ياباشا انا بغير الزيت شفط والعربيه بتاخد ال 4لتر كلهم ده لما بغير فلتر ومن غير بس هوا في الكتالوج عندي كاتب 3.5 بدون تغيير فلتر و 3.9 بتغير الفلتر بس فيه حاجه الموتور بتاعي كوده Arm وده أكبر موتور بياخد زيت في ال 1600 والموتور ده في موديلات 99-2000 وانا موديل 2000 في مواتير 1600 بتاخد 3 لتر من غير فلتر 3.5 بالفلتر لو انت تعرف كود موتورك قولهولي أو قوللي موديل عربيتك كام وانا هشوفهالك في الكتالوج

السلام عليكم أعضاء الرابطة الكرام من فتره كده كنت غيرت طقم الرشاشات وقولت هعملكم بيه تقرير بعد التجربه طبعا انا مشيت تقريبا بالعربيه حوالي 500كم والنتيجة أن الاستهلاك جوه البلد الصفيحه عملت حوالي 220كم مع التكييف وفي السفر سافرت بيها من اسماعيلية إلى القاهره مع شويه مشى النهارده عملت 10لتر لكل 150كم يعني الحمد لله في السفر تقريبا عملت ال 100كم ب 6 لتر وده استهلاك ممتاز للباسات وطبعا السبب أن زي ماقولت الرشاش ده كان اتنين فتحه من تحت والقديم كان 4 فتحه والحمد لله الرشاشات الجديده مأثرتش على السحب إطلاقا وجبت بالعربيه 190 والتجميع كان احسن من الأول الحمد لله فدي التجربه مع طقم الرشاشات الجديد وان شاء الله في تقرير تاني هعمله قريب عن مشكله كانت عندي في العربيه وانا لاقيتلها حل إن شاء الله ينفع بس وانا بجرب دلوقتي وهقولكو النتائج وسبب المشكله وحلها أن شاء الله

المشاركة الأصلية كتبت بواسطة basem moustafa

بعد اذنكو لو عاوز اشتري باسات ٢٠٠٠ ماتور ١٨٠٠ تربو تنصحوني باية وانا باعينها و اخد بالي من ايه و ايه هي عيوب الموديل دا و اخبار قطع غيارة ايه
وشكرا

بص ياباشا مبدأيا كده العربيه دي في الغالب هتكون معدله لأن المواتير التربو مانزلتش في مصر ولا الخليج فدي هتكون معدله بالنسبه للعربية هيا ممتازه وقطع غيارها رخيصة جدا ومعمره جدا ومفيهاش عيوب شائعة بس هيا أغلى حاجه فيها طقم المقصات لأنهم 8 ألومنيوم بيعملوا من أول 1300ج صيني لغاية 4000ج الماني فيبي بس الألماني يعيش كتير اوى غير كده مفيهاش أي عيوب عزل وثبات ممتازين قوه صاج وأمان عالي بس بالنسبه لموتور التربو يعيبه حاجتين أولا أن أي موتور تربو عدوه الحراره الزائدة يعني ماينفعش يضغط عليه في الحر ولازم يكون دوره تبريد العربيه مظبوطه 100% لأن العربيه لو سخنت تبوظ الموتور كله وتاني حاجه أن صيانته رخمه شويه والموتور مالي الحوض يعني عامل زحمه في الحوض فالشغل فيه رخمولازم واحد فاهم الشغل فيه غير كده هوا موتور جامد وبيجري العربيه جامد ااوى بس نصيحتي ليك ماتحاولش تركب عربيه معدله خوفا من مشاكل التعديل لأن فيه ناس بتعدل ومش بتظبط والعربيه بتقع في مشاكل الكهرباء الأفضل دور على حاجه 1600 استوك امشي بيها فتره وبعدين سقط انت وتبقى الحاجه على ايدك بس العربيه لو عجباك وحالتها حلوه توكل على الله هتكشف على الموتور كبس موتور والفتيس لو أوتو وتعمل سكان كامل على العربيه بكابل الأعطال وتكشف على العفشه وطبعا الأساسيات يعني الرش دواخل وخوارج وتشوف الايرباج فتح ولا لا والتأكد من أن العداد مش ملعوب فيه وفي الغالب العداد هتلاقيه متغير علشان العربيه معدله لو أوتو لأن هتلاقى فتيسها استبترونيك وده مش بينزل غير مع التربو بس المواتير التانيه بيبقى فيها أوتو عادي عموما شوفها واركبها وشوف نظامها ايه وانا بعتلك رقمي على الخاص ولو عايز أي استفسار انا تحت أمرك في أي وقت