الحمد لله على كل حال
بس الفترة اللى فاتت و باتكلم فى حوالى سنه
يعنى نقدر نقول من شهر 11 اللى فات
شوية حاجات حصلتلى و ورا بعضها كمان
بنتى و اللى حصلها
مراتى و تعبها بعد الولاده و ما خفى كان اعظم
ابويا يخش المستشفى بجلطات فى المخ و القلب اكتر من مرة لدرجة انه مبقاش قادر يقف على رجله
وقف الحال و البلد اللى نايمه و مش باينلها قومه
اختى اللى جالها سرطان و ملهاش علاج
مشكله كبيره مع امى اضطريت بعدها انى اسيب العمارة بتاعتى
ولا عارف ابيعها و لا عارف أءجرها
لدرجة ان الموضوع وصل للمحاكم للطعن على عقد شرائى ليها

و اسكن فى شقه ايجار
شقتى اللى شاريها لا عارف اوضبها و لا عارف حتى ادفع اقساطها و كده بقى مكسور عليها حوالى 24000 اقساط
مستلف من صاحبى 7500 جنيه مش عارف اعمل فيهم ايه
الحاج حسين الراوى باقى فلوس عربيته كان معايا و اللى اتصرف منها اتصرف و الباقى اتسرق
المركز اللى حطيت فيه دم قلبى كان مريح شوية بس الحمد لله ابتدى الشهر ده يقف على رجله و بقى عندى شغل كويس بس مش اللى ينفع تفتح بيه بيت
مصاريف العيال فى المدارس
الفيز بتاعتى كلها وصلت الحد الأقصى لأنى كنت عايش عليها

ببساطه لما حسبت اللى انا مديون بيه للناس
لقيته 51000 جنيه
النوم
مش باشوفه
الصبح فى الشغل
الضهر فى المركز
بالليل فى المكتب

العيال مش باشوفها
مراتى نفس الوضع
وربنا يكون فى عونها مع 4 عيال

مش عارف
قربت اتجنن

انا مش بعيد عن ربنا
الحمد لله و مش هاقول من فترة طويله
التزمت الصلاه
الأول كان ممكن يعدى فرض و اتنين
مش سايبها خالص برضوا

انا صابر
بس تعبت
كل اللى ليه فلوس ابتدى يطالبنى
حتى عربيتى فكيتها و معملتشى فيها حاجة
مستنى فرج الله
و عارف انها ما ضاقت الا ما فرجت
و هتفرج قوى
قوى
ان مع العسر يسرا
ان مع العسر يسرا
ولا يغلب عسر يسرين

اخر قرار جالى امبارح
بعد صلاة الفجر كده
انى ابيع العربية
اخلص الموتور و هيبقى زيرو ان شاء الله
و الصالون يتغير الكسوه
و ده اللى اقدر اعمله فى العربية فى الوقت الحالى
عشان هى بره و جوه ايوه
بس بره عايزة شوية سمكرة بسبب البهايم اللى الواحد بيقابلها

و اسدد جزء من ديونى
و اشوف موسم الأقرارات هيعمل معايا ايه
والله ربنا كرم
و سدد ما عليا
اجيب عربية

ما اردشى
يبقى الحمد لله رب العالمين

انا لا سمح الله مش باشكى
بس بقى مليش حد غيركم
و الكلام مش كلام و خلاص
امى و اخواتى من ساعه ما عرفوا موضوع البيت و هما فاكرين انى نصبت عليهم
بالرغم انى دافع فيه دم قلبى
و بيع و شرا و شهود
ابويا ملتزم الصمت الرهيب و بيقول انت معاك ورق تحطه فى عين التخين
انما مش اكتر من كده

اصحابى و الحمد لله مش فاضل عندى غير اتنين متاخذهم اخوه
حاتم عرفه
هلالى عبد الرحمن

و اخواتى فى المنتدى
بدون ذكر اسماء عشان منساش حد و حد يزعل منى

فكان كان لازم افضفض قبل ما ضغطى و سكرى يعملوا معايا الجلاشة

للمرة التانية
انا مش باشتكى
كل حاجة بامر الله
دى مش اكتر من فضفضه مع اخواتى

و ربنا يخليكوا ليا