مقاس بكات القرف إللى إسمه كربراتير كام؟؟؟؟؟؟

**Zing0** · 16-01-2014 10:35 AM

السلام عليكم
تقريباً بعد سلسلة الفشل الزريع لإصلاح الكربراتير لم يتبقى لنا غير آخر محاولة (تغيير البكات) أو التخلص من شركة أوتوفاز كلها
المهم
كنت عاوز أعرف مقاس البيكات بتاعة الكربراتير كلها ربنا يبارك فيكم
لأن الكلام غير الصورة
هأرفع صورة لكربراتير 132 من جوه (البوابات عكس اللادا بس مش مشكله)
عاوز مقاسات البكات الأصلية ليها كام, أنا رقمت البكات لسهول تحديدها على الصورة
لادا 1300 - 2105

**lada2010** · 16-01-2014 01:18 PM

بص من الاخر لان الكرباريتر عندى كان بيشرب البنزين هات بيكات 105/100 بس اهم تكون الكويسة اللى مطبوع عليها من الجنب الرقم بس اهم شى اتاكد ان البيكات مش نفس الفتحة وادعى لى والله جربت امبارح غيرت البيكات والتجربة كويسة بنسبة 80%

**Zing0** · 01-04-2014 05:35 PM

بعد البحث و التحرى و اللجان المنبثقة و غير المنبثقة و الحوار المباشر و غير المباشر فى أرجاء المنتديات الأجنبية توصلنا بفضل الله للآتى:
============
فى كربراتير اللادا بوجه عام يوجد 4 بيكات, 2 كبار للهوا و 2 أصغر منهم فى حوض العوامه (زى الصورة بالضبط)
ماركة الكربراتير : ويبر (weber 32/36 DGV 5 A )
هى الموديل الوحيد من شركة ويبر ذو شفاط يدوى (يعمل بواير و ليس بالماء و لا الكهرباء)
-------------------
بالنسبة للـ 2107 بالضبط زى مقال العضو الفاضل ahmscu
الهوا 150 - 150
السرعة البطيئة 112
السرعة العالية 150
--------------------
بالنسبة للـ 2105
الهوا 170 - 170
السرعة البطيئة 107
السرعة العالية 162
----------------------

لو مقاسات الفابريكا عندك و كل حاجه مضبوطه (الخلاط و الأدفانس و الفاكيووم و ....)
يبقى ضبط الكربراتير عالشعرة زى مقال المصنع
مسمار الهوا من القاعدة , يتفتح لفتين كاملين بالضبط
و البنزين تضبطه على RPM 850-900 لفه / دقيقة (غالباً هتكون لفه و ربع)

و فى معلومه غريبة قابلتنى برضه حبيت أفيد بيها:
-------------------------------------------------------
لو الكربراتير عندك مش بيضبط السلانسية (المكنه بتبرجل) و لازم تزود مسمار الهوا عن لفتين (أكتر من 2)
يبقى كده البيك ضيق و ده هيديك استهلاك بنزين عالى و ريحة عادم و تهبب البوجيهات و .... يعنى لما تقلل المقاس هتستهلك أكتر مش أقل زى ما الجهابزة بتوع الكربراتير بيفتوا, لأنك بكل بساطه بتعوض ضيق الكربراتير بلفات أكتر من مسمار الهوا علشان تضبط السلانسية , و معروف إن الهوا الزيادة أو البنزين الزيادة (خليط مش مضبوط فى كلا الحالتين) معناه استهلاك زيادة.

**ahmscu** · 02-04-2014 12:28 AM

ضبط الكاربراتير المفرود بيبقى على جهاز كمبيوتر بيقيس نسبة اول اكسيد الكربون وده موجود فى مركز الصفا اللى فى جسر السويس بس طبعا هيعملك من الحبه ابه وهيفكلك الكاربراتير وينضفهولك وياخد منك 150 جنيه على الاقل مجرد نضافه مش اكتر.
عموما ضبط الكاربراتير لو كل حاجه عندك مضبوطه زى ما قال العضو المحترم zingo (يعنى كهربتك مضبوطه،بوجيهاتك جديده ومش معرقه،سلك البوجيهات مضبوط،كل حاجه فى الكاربراتير تمام بما فيها بكات الفابريكه،واللاسبرتير والدينامو والبطارية سلام بيكون كالاتى:
سيادتك بيبقى عندك مسمارين ضبط واحد ناحية وش العربيه وده بيبقى للسرعات العالية والتانى بيبقى للسلانسيه وده بيبقى تحت بك السلانسيه بالضبط
حضرتك فى الاول هتضبط بك السرعه وده لازم يبقى حد معاك ويدوسلك على البنزين لغاية لما الار بى ام يبقى 30 ويثبت على كده انت بقى تلف مسمار السرعه لجوه ولبره هتلاقى العربيه بتعلى وتوطى معاك على نفس دوسة البنزين تختار انت بقى حاجه تكون فى الوسط ولا تكون العربيه عاليه قوى ولا مخنوقه قوى بعد كده مسمار السلانسيه وده زى ماقال الاخ المحترم هتلف لجوه ولبره لغاية ار بى ام 900
كده انت المفروض عربيتك تمام تتاكد الزاى بقى انك تمام:هتخلى صاحبك يزود بنزين على الاخر بسرعه ويشيل رجله بسرعه وتبص حضرتك على الموتور وهو بيعلى وبيوطى بنعومه وبدون اى نتش على السرعه العاليه او السلانسيه يبقى انت كده تمام غير كده يبقى انت عندك مشكله،والله اعلم طبعا