الحمد لله استلمت الفلوانس e3 من اسبوع وعندي كام استفسار
علي فكره انا عضو قدييييم جدا في هذا المنتدي الرائع (6/2008) بس عمري ما عملت اي مداخلات و دي اول مره اكتب فيها حاجه في المنتدي ... لا وايه كمان موضوع جديد :bump2: مش تعليق صغير كده في الاول علي قدي ... ههههههه ...... المهم :B4_592:
الحمد لله بعد 6 شهور من البحث واللف والدوران وبعد توفيق ربنا والاطلاع علي رأي الاخوه الأفاضل هنا في المنتدي ... استقريت واشتريت الفلوانس e3 2014 لون Oyster Gray... واستلمتها من اسبوع .
طبعا طول الاسبوع اللي فات وان عمال استكشف العربيه وطبعا كان في دماغي كل اللي انا قرأته عنها في هذا المنتدي سواءا مميزات او عيوب وحبيت انقل لكم انطباعي عن السياره وبالمره اسئلكم علي شويه حاجات ....
(مع العلم ان ان دي اول عربيه اوتوماتيك امتلكها ... قبل كده سقت اوتو بس مش بتاعتي وكانت علي فترات متباعده ... انما اناطول عمري بركب مانيوال واخرهم حبيبه قلبي اللانوس 99 و للاسف انا سواقتي عنيفه ومدمن شد وحرق وطبعا اللانوس كانت مشرفاني الي حد كبير وخصوصا اني كنت شاريها زيرو ومكنتش ببخل عليها)
اولا ... انطباعي عن السياره (العربيه عامله 400 كم بس منهم 250 علي طريق بورسعيد القاهره والباقي جوه البلد )
1- العربيه شكلها من بره تحفه وملفته جدا وتخطف العين ما شاء الله
2- الطلعه من الثبات بطيئه نسبيا بس مع التعود بتكون مقبوله
3- صوت الموتور عالي شويه حتي والعربيه واقفه ... اعتقد لسه هيهدي بعد 1000 او 2000 كم
4- العربيه سحبها جيد جدا بعد ال 50 كم/س
5- لا يوجد احساس نهائي بالنقلات وللاسف انا لسه متعودتش علي كده ويمكن ده محسسني بالملل شويه لاني اتعودت علي الجري والحرق
6- العفشه جيده جدا والارتفاع عن الارض ممتاز
7- العزل جيد جدا
8- الثبات خرافي وصلت ل160 كم /س(ومحبتش اني ازود علشان التليين ) وكنت حاسس اني علي 100كم/س(طبعا بالنسبه لللانوس)
9- استهلاك البنزين لسه محسبتوش بس اعتقد مع الفتيس ال cvt هيكون معقول
10- وطبعا الفخامه والاوبشنز الجامده مش محتاجه كلام تاني (قتلت بحثا )
11- العربيه حجمها كبير شويتين ومحتاجه شويه تعود علشان تحفظ زواياها
12- الركن بالعربيه او الرجوع للخلف في الشوارع الزحمه مغامره غير مأمونه العواقب :toothgrin: العربيه ضهرها عالي وميل الزجاج الخلفي جامد ...مما ادي ان الرؤيه الخلفيه سيئه جدا ... لازم اركب حساسات خلفيه في اقرب فرصه ان شاء الله
13- التكييف لسه مجربتوش كاداء ولا تأثيره علي السحب ؟؟
14- الفرامل ممتازه
15- الجزء الابيض الكبير في الفانوس الخلفي مش حلو ومعجز العربيه شويه بس ممكن يتعمل فيه شغل كويس ويتظبط
نييجي بقي لكام استفسار كده علي الماشي لو ممكن الزملاء يفيدوني فيها
1- السنتر لوك لما بيفتح اويقفل مبيعملش صوت بيعمل اضاءه فقط كده تمام ولا انا عندي مشكله
2-صوت الموتور العالي ده حتي و العربيه واقفه طبيعي وهيقل ولا هيستمر كده علي طول
3- لما ابعد عن العربيه والكارت في جيبي مبتبطلش ولا الزجاج بيقفل ... هل فيه ضبط للموضوع ده ولا هو كده اجباري ..
4- الجزء العلوي من الكارت ممكن يتفك وبيطلع منه مفتاح صغير ... ده بتاع ايه ؟؟
معلش بقي استحملوني شويه علشان انا لسه فلونساوي جديد .... وشكلي كده هسأل كتيييير لاني بحب اعرف كل كبيره وصغيره عن العربيه اللي انا راكبها...
شكرا مقدما... ودمتم بخير
