تجربتي مع شراء قطع غيار للسيفك 93 من بورسعيد

**م/اكرم** · 21-01-2014 02:34 PM

المشاركة الأصلية كتبت بواسطة mohandelboshy

السلام عليكم ورحمه الله وبركاته
اولا احب اشكر كل الاعضاء هنا في المنتدي وخاصة رجالة الهوندا وتحديدا سامح باشا اللي تعبته معايا الفترة اللي فاتت جدا ومبخلش عليا لا بوقته ولا بمعلومات ولا باي استفسار

في البداية انا كنت محتار انزل بورسعيد ولا القاهرة عشان اجيب قطع الغيار بس بعد مشورات عديدة توكلت علي الله ونزلت بورسعيد وكنت تحديدا عارف انا هنزل عند مين في الاول
وصلت هناك علي الساعة 10.30 صباحا لان اغلب المحلات بتفتح علي 11 او 12 باقصي تقدير
المهم وصلت بنك الاسكان وركنت العربية اللي كنت واخدها عشان اجيب فيها الشغل لقيت اول واحد حاطط انصاص للسيفك والكوبيه دخلت سألت علي الكبوت والشنطة والرفارف لقيتهم موجودين والسعر 600 للكبوت 350 شنطة والرفارف مقليش بس عنده صاج ليها وحاجته كويسه قالي اسال بردوا وتعالي مشيت كام متر كده لقيت محل فيه صبي سألته راح مكلم صاحب المحل ( لانه لسه مجاش هما بينزلوا متأخر شوية ) الراجل بكل ذوق وادب قالي عندي واداني الاسعار في التليفون وقالي نص ساعة وانا هاجي
قلت للصبي خلاص هشرب شاي علي القهوة عقبال ما ييجي فقلت اخد لفه وف نيتي اني اجيب من عنده بس للاطمئنان قلت اخد لفة في الشونة
رحت الاول عند البرنس وهو فعلا برنس ( ظاظا ) فعلا الراجل ده عنده شغل نضيف ونصين نضاف جدا ومحترم جدا جدا وكمان لما عرف اني من طرف سامح ظبطني اخر حاجة المهم سألته علي الصاج قالي والله لسه بايعهم امبارح وادامي كام يوم كده علي ما الشغل يطلع من الجمارك المهم جبت من عنده ( مقص ورا يمين بالسرة بكل حاجة بسلطاته ) 200 جندي وخلع لي حساس السرعة من نص كوبيه فاجر واقف ادامه كأنه جديد والله بـ 150 وقالي تروح عند مجدي الدسوقي الفرع اللي في بورسعيد وكلمه قدامي عشان اجيب اللي عاوزه من هناك بس بصراحة راجل عجبني اوي معاملته وترحابه
قلت بالمرة اسأله علي الماكينة لقتها بالضفيرة بالكنترول بتانك البنزين بكل حاجة هيحسبها لي 5500 يعني ممكن تخلص 5 وقالي تعالي اقعد معايا اسبوع وانا اديلك كورس في الهوندا واظبطلك الميكانيكا والكهربا والعفشة
خدت لفه كده في الشونة لقيت حاجتها موجودة والله بس الاسعار من تاجر لتاجر بتختلف ممكن بس الكبوت قليل شوية بس هتلقيه لان الشغل اغلبه لسه في الجمارك عشان الانتخابات والكلام ده ده كلامهم انما كل حاجة موجودة ونضيفه جدا وخصوصا المكن
المهم رجعت لتاني واحد نزلت عليه جبت الصاج اللي عاوزه
كبوت
شنطة نفس اللون
رفرف يمين
فوانيس بالاشارات ( اشارات بيضا ) والفوانيس ازاز مش باغة
مفصلات ومساعدين باب الشنطة
ومفصلات للكبوت
الحديدة اللي بتكون تحت الشنطة اللي فيها الكالون
كل ده بـ 1385 بدخان الصبي بكل حاجة بعد الفصال
عنده ماكينة تحفه في تك كاملة قالي هحسبها لك ب 5
الباب فاضي 200 جنيه طبعا لو كنت هشتريه ممكن يخلص 150
هو راجل محترم جدا ومهاود في الاسعار وعنده شغل نضيف واغلب شغله من اول 92 الي 98
جبت جوز مرايات كهربا 350 بالعافية من واحد تاني
المهم خلصت ونزلت حرفيين الزهور
جبت سير كاتينه الماني 100
فلتر زيت وبنزين 95
علامة سيفك وهوندا وحرفين اتش 30ج
2 اشارات اصلي جديد بتوع الرفارف ( الغمازات ) 50
شوية زيوت للفتيس والماكينة ومنظف وحاجات تانية دفعت كله حوالي 490 ج
ولسه ان شاء الله فيه نازلة تانية بس لما العربية تخلص ان شاء الله اظبط ميكانيك وكهربا وعفشه

ويا ريت يا جماعة محدش ياخد بكلام الناس ويسمع للي يقول قطع الغيار مش موجودة والكلام الفاضي ده
انزل بنفسك لو نفسك تركب الموديل ده او عموما اي عربية خايف تجيبها وقلقان من قطع غيارها انزل شوف بنفسك وساعتها انت اللي هتحدد مش كلام غيرك
مفيش حاجة اسمها ملهاش قطع غيار طالما لسه بتمشي علي الارض
صاج وعفشه وماكينة وحاجات كهربا كله موجود ومحلات الهوندا كتير هناك بس لف وفيه ناس في زخانيق هتلاقيه لان البلد هناك مليانه هوندا
معلش طولت عليكم بس حبيت ان الكل يستفاد ويعرف وادينا بنسهل علي بعض هنا
وربنا يبارك لكم جميعا

موضوع ممتاز.......وربنا يباركلك ف العربيه........ احسن حاجه عملتها انك قلتلنا الاسعار...