الموضوع: الربح من جوجل ادسنس

المشاركة الأصلية كتبت بواسطة #MAAM#

موضوع اليوتيوب عاجبني جدا هفكر فيه إن شاء الله

حقوق الملكية مفيهاش خوف بالنسبة ليا لأني هعمل الموقع وهيبقى كله مجاني ومش هيبقى فيه أي كراك إن شاء الله

المشكلة مش في الكراكات بس ، الكلام ده لو موقعك تخصص تحميل برامج
المشكلة إن في شروط كتير جدا وصارمة لازم تتبعها علشان حسابك يتوافق عليه أولا وثانيا علشان ميتوقفش أهمها إن محتوى موقعك ميكونش منقول من مواقع تانية كوبي بيست يعني لازم يكون حصري مش مكرر وباختصار شديد لازم يكون موقعك نافع ومفيد وبيضيف جديد لعالم الإنترنت مش مجرد تكرار علشان تكسب فلوس
أنصحك بشدة قراءة الصفحة دي أولا
https://support.google.com/adsense/a...&utm_medium=et
وياريت برده تبقى تتابع المدونة بتاعتهم
AdSense Arabia Blog: سياسة البرنامج

المشاركة الأصلية كتبت بواسطة #MAAM#

هل هو مجزي ماديا ؟؟ يعني يطلعلي كام في الشهر لو اشتغلت على الموقع ساعتين مثلا كل يوم ؟؟

بخصوص هل هو مجزي ماديا أو لا فباختصار هقولك إن أدسنس فاتح بيوت ناس كتير جدا وفي ناس سابت شغلها وتفرغت للربح من الإنترنت ومن أدسنس
لكن ... !
مش معنى كده إن كل واحد سجل في أدسنس واشتغل يبقى بيكسب فضلا عن إنه بيعتمد على دخل جوجل فقط
ياما ناس مسجلة في أدسنس وكل شهر بيكسبوا ملاليم
وفي المقابل ناس كتيرة جدا بتكسب عشرات الآلاف شهريا
وعندك نماذج ناجحة جدا لمواقع بتكسب عشرات الآلاف شهريا بدون مبالغة وأشهرهم اليوم السابع ومنتدى فتكات ومصراوي وأخبارك وغيرهم
بس الناس دي بتكسب كويس علشان مواقعهم بتقدم جديد وبيدخلها عدد زوار ضخم والمعادلة بتقول كلما زاد عدد الزوار كلما زاد الربح لأن متوسط نسبة عدد النقرات على إعلانات أدسنس الموجودة في أي موقع لا يقل غالبا عن 5% من إجمالي عدد الزوار
ولتقريب النظرية هنفترض ان عندك موقع مفيد بيدخله شهريا عدد زوار لا يقل عن 100 ألف زائر وبالتالي فعدد النقرات اللي هتحصل عليها من هؤلاء الزوار لن يقل عن 5 آلاف نقرة ، اضرب العدد ده في متوسط سعر النقرة هتعرف أرباحك أد إيه
طب متوسط سعر النقرة بيبقى كااااام ؟
ده السؤال اللي عقّد الملايين :) لأنه غالبا بيكون مرتبط بعدة اعتبارات أهمها الدولة اللي بيجيلك منها النقرات
عندك مثلا مصر متوسط سعر النقرة يتراوح ما بين 2-4 سنت أمريكي أي ما يساوي 14-28 قرش تقريبا وده لأن المعلنين المصريين اللي بيعلنوا على جوجل مش بيدفعوا كتير وبالتالي لما جوجل تاخد حوالي التلت من النقرة على الإعلان وحضرتك تاخد التلتين يبقى علشان واحد يعمل إعلان على أدوردز ويدفع على النقرة حوالي 30 قرش مثلا يبقى انت نصيبك من ال30 قرش هيكون 20 قرش تقريبا وجوجل 10 قروش
في دول عربية بيكون سعر النقرة عندهم كويس زي الإمارات مثلا وبعض دول الخليج بس لازم تفكر هتجيب الزوار من الدول دي ازاي بالإضافة إلى أن عدد أفراد هذه الدول أساسا قليل فمن الصعب انك تجذب زوار كتير من الدول دي إلا لو عملتلهم موقع مخصوص بدولتهم وأغلبهم مهتم إنه يدخله ويتابعه
أخيرا أفضل سعر نقرة في الغالب بيكون أمريكا وكندا وبعض الدول أحيانا زي انجلترا وفرنسا وبعض الدول الأوربية
فلو افترضنا ان متوسط سعر النقرة في أمريكا نص دولار يبقى لو حسبت عدد النقرات اللي هما 5000 × نص دولار يبقى ربحك الشهري هيكون في حدود 2500 دولار يعني حوالي 17500 جنيه وطبعا ده شيء مجزي جدا جدا بس في نفس الوقت صعب جدا جدا جدا لأنك لازم تعمل موقع ينافس المواقع الأمريكية ويقدم جديد للزائر الأمريكي يخليه يدخل الموقع كل يوم والعدد يزيد علشان تحصل على عدد زوار مستقر
ملحوظة هامة: أي أسلوب ملتوي لمحاولة الحصول على الزوار بطرق غير مشروعة أو مزعجة نتيجته عقاب جوجل فورا ، وأفضل وسيلة للحصول على الزوار هي عن طريق محرك البحث وده بيتطلب مجهود كبير جدا فيما يسمى بالSEO وهو تهيئة الموقع لمحرك البحث بحيث لما واحد يبحث في جوجل عن كلمة معينة يظهرله موقعك انت في النتائج الأولى ، ولذلك معظم الناشرين بيتجهوا لما يسمى بمواقع النيتش وهي عبارة عن موقع صغير جدا مكون من حوالي 5-10 صفحات فقط ولكنه متخصص في موضوع معين يبحث عنه عدد لا بأس به شهريا وفي نفس الوقت المنافسة على الكلمة اللي الموقع متخصص فيها قليل لذلك فرصة ظهوره في نتائج البحث بتكون كبيرة وفي نفس الوقت سعر النقرة على الإعلان المتعلق بالكلمة القائم عليها الموقع مرتفع علشان يجيب همه ، وللتفصيل في الموضوع ده أنصحك بمراجعة مدونة "الخطة أدسنس" سلسلة مواقع النيتش
آسف على الإطالة