حكاية الزيت اللي من الموتور و الطقطقه دي هاتخليني اروح الغي الحجز واشوف حاجه مستعمله و خلاص
عرض للطباعة
حكاية الزيت اللي من الموتور و الطقطقه دي هاتخليني اروح الغي الحجز واشوف حاجه مستعمله و خلاص
السلام عليكم ياشباب المنتدى
اليكم ملخص ماحدث معى فى توكيل غمرة . انا رحت التوكيل امبارح الساعة 9 صباحا دخلت من البوابة ركنت ناحية اليمين فى انتظار مهندس الاستقبال جالى مهندس كده شكله محترم ومش لابس زى مهندسين الاستقبال عرفت بعد كده ان اسمه المهندس مولار وده المفروض مدير الاستقبال قالى ازيك يافندم ايه المشكلة اللى فى العربية قلتله والله انا عندى مشاكل كتير قلى زى ايه قلتله عندى صوت طقة فى العفشة ورا شمال كرسى السواق وعندى (Fault) متسجل على (Trip computer) بخصوص حساس البارك مش شغال وعندى الازاز الادام شمال بيعمل طقة كده وانا بقفله قالى اوك ام منادى مهندس من مهندسين الاستقبال اسمه المهندس اسامة كان بشوش وبيضحك فى وشى وكتب كل ملاحظاتى فى امر الشغل بتاع العربية وبعد كده دخلها واحد من السواقين جوه الورشة علشان يبتدو يشتغلو فيها واول لما دخلت الورشة دخل جواها مهندس معاه كمبيوتر كده علشان ينزل السوفت وير الجديد قلت قشطة ايه السرعة فى الشغل دى زى الفل وبعد ماعمل ابديت السوفت وير المفروض انها اترفعت علشان يربطوا العفشة وفتحوا الكبوت علشان يعملوا الشيك اب المفروض يتعمل وبعد كده دخلت الكهربا علشان السينسور ومن ساعة بأة مادخلت الكهربا عد بأة ساعة اتنين تلاتة اربعة ومفيش حس ولا خبر سالت المهندس اسامة عن العربية قالى اكيد شغالين فيها جوة قلتله ايه الجديد اللى انت ضفته ماهو اكيد شغالين فيها جوا انا عاوز اعرف مشكلة الطقة والسينسور تشخيصهم ايه !! قالى هابصلك عليها وهاقلك وبعدين ولا حس ولا خبر كالعادة المهم فجأة على الساعة 4 لقيت واحد سايقها من عمال الورشة وجابها ناحية الغسيل قلت الحمد لله المهم لاقيت اسامة جاى من جنبى سالته ايه اللى حصل فى العربية قالى هخش اشوفهالك فى الورشة قلتلة يافندم العربية مستنية فى دور الغسيل ادامك اهى قالى تعالى معايا نشوف حصل فيها ايه !! قلتله يالا بينا دخلت بجرب الازاز لقيته زى ماهو !!!! جربت ارجع لورا بالعربية لقيت السينسور بارك شغال قلتله ايه مشكلته قالى اتغير واحد من الاربعة كان بايظ !! طيب الطقة اللى فى العفشة اخبارها ايه قالى هى العفشة اتربطت وكله تمام قلتله عرفت منين ان هى من تربيط العقشة المهم ببص على الاكصدام من قدام لقيت فيه نقرة صغيرة كده :oops2: قلتله منين دى المهم وشه احمر وجاب الوان قالى مش عارف المهم دخل جوه الورشة تانى علشان يسأل مين اللى عمل كده فى الاكصدام (المفروض يعنى اللى عمل النقرة دى هايعترف على نفسه) المهم خرج من الورشة وراح للمهندس مولار قله على اللى حصل المهم جالى وشاف النقرة قاللى تعالى نجرب صوت الطقة اللى فى العربية بعد تربيط العفشة طلعنا جربناها برة التوكيل مسمعتش صوتها خالص (هو رفيع وقصير ومش مليان) المهم قلتله ايه بأة اللى حصل فى العربية الازاز زى ماهو محدش عمله يعنى قالى هادخلهالك تانى وهاشوف الموضوع ده المهم قلتله هاتعمل ايه فى النقرة اللى فى الاكصدام دى قالى اللى انت عاوزه هاعملهولك قلتله زى ايه قاللى لو عاوز ترش الاكصدام هارشهولك قلتله يعنى عربية زيرو عاملة 2000 كيلو هاترش اكصدام قالى نصيحة اخوية بلاش قلتله مين قالك انى هارشه اصلا المهم اعد يعتذر قلتله ياريت الاهمال اللى انا شايفه جوه ده يكون ليه علاج عندكم علشان كده حرام المهم دخل العربية تانى جوه علشان يظبط الازاز وخرجت على الساعة 5 تقريبا المهم ماكنش فى فى التوكيل غيرى انا وعميل تانى مستنين عربياتنا تتغسل المهم هو كان اعد مع مدير المركز ( أستاذ خالد) وكان بيتكلم معاه على موضوع الزيت اللى بيستخدموه وكان معاه كتاب الضمان بتاع العربية وكانو بيتناقشو فى النوع اللى بيستخدموه المهم دخلت معاهم فى الحوار وقلتله على فكرة لو فضلتوا تشتغلوا بزيت موبل معظم الناس هاتغير الزيت برة التوكيل لأنكم مش بتسمحوا الاى حد انه يجيب الزيت معاه وهو جاى ( اصلى سألت المهندس فى الاول وهو بيستلم منى العربية وقالى ماينفعش) وقلتله انا شخصيا هاجيب زيت توتال وانا جاى وهاغيره على مسؤليتى قالى بكرة ان شاء الله هاشتغل على الموضوع ده مع قسم الدعم الفنى وصور الورقة دى من كتاب الضمان اللى كان مع العميل التانى واخد رقم موبايلى ورقم موبايلو وقالنا هايرد علينا فى موضوع الزيت ده المهم العميل التانى مشى واقعدت جنبه واشتكلته من اللى حصل معايا اضايق واعتذرلى وقاللى معلش اصل اللناس اللى هنا صغيرين فى السن وماعندهومش خبرة !!!!!!!!! قلتله والعميل ذنبه ايه ؟؟ المهم كان فاضل اتنين فى الورشة كلها نادى عليهم وخلاهم يرفعو العربية من جديد علشان يعيد على الشغل اللى عمل الصنايعية بعد العزاب اللى انا شفته من 9 الصبح للساعة 6 بليل ده لقى ان العفشة مش متربطة كويس ولقى الموطور مش مغسول بعد الشغل وطلع واحد تانى معايا علشان يجرب العربية بس كان مليان شوية مش زى المهندس مولار واحنا ماشيين بالعربية سمع صوت الطقة وكان الصوت زاد عن الاول المهم رجعنا التوكيل تانى ورفع العربية يبص عليها تانى لقى كل حاجة تمام ركب العربية تانى واعد يمشى ويهدى جوه الورشة لحد لما عرفنا ان الصوت من كرسى السواق والصوت كان زاد علشان هو كان اتخن منى فكان محمل اكتر منى على الكرسى :Copy of m-s5: المهم استاذ خالد مدير الورشة قالى السروجى خلاص مشى كانت الساعة 6 قلتله خلاص هاجيلك يوم السبت من غير حجز وحضرتك اللى هدخلها للسروجى قالى تحت امرك بس تعالى بدرى . خلاصة الموضوع الناس محترمة بس مفيش ترتيب ونظام فى الشغل العمال اللى شغالين فى الورشة بيشربو سجاير عادى وهما شغاليين فى عربيتك كأنى رايح لميكانيكى فى الحرفين و السواقين وهما بيدخلوا العربيات فى الورشة من مكان الاستقبال ممكن يخش بيها بين عربيتين جنبه (Risk) يعنى ممكن تتجرح منه والعميل فى النهاية ملوش ذنب فى النهاية والله ماحسيت انى داخل توكيل اكنى داخل مركز معتمد . انا خلصت موضوعى واسف حدا على الاطالة بس حبيت احكى كل حاجة بالتفصيل الممل . وشكرا يااستاذ احمد على ردك ومتبعتك المهندس ده سألت عليه لقيته اتنقل من المكان
طبعا اللى حصل معاك ده مش مقبول تماما وموضوع النقره ده لازم يكون فيه رد فعل و الا لو عدت ع حضرتك كده فى اكصدام هتبقى مع عميل تانى فى تركيب كابلات غلط او نسيان تركيب حاجة و فى الاخر ممكن تكون حياة انسان او اكتر الاهمال المفروض ما يبقاش فى تراخى عن رد الفعل.
على الاقل العامل اللى خبطها يتخصمله مبلغ محترم من مرتبه فى الحالة دى كلهم هيبقوا حزرين و المبلعغ ده حضرتك تتعوض بيه باى شىء حتى لو طقم الدواسات لكن معلش و حقك على ما اظنش انه حل مقبول.
الشكر لله, وشكراً ليك أنت علي ال Feed back بتاعك, ومبروك علي حل مشكلة الطقة,
وأسف علي التاخير في الرد.
وإن شاء الله يكون حل لناس كتير من اللي كانت مفكرة أنو مشكلة بالعفشة لأن العفشة وهيا جديدة مش بتكون محتاجة أكتر من تربيط, إلا لو فيها فعلاً مشكلة وحاجة محتاجة تتغير.
لكن لما بيكون كل حاجة تمام زي حالة عربيتك كدا, وبيكون فيه صوت طقة,, دي بتبقي حاجة هتجنن الواحد.
إن شاء الله تجربتك تفيد ناس كتير من اللي هتمر بنفس ظروفك,
وطبعاً قدر الله وماشاء فعل بالنسبة للنقرة بتاعت الأكصدام,
دا شئ مش مقبول طبعاً وفيه سلبيات كتير في التوكيل الواحد بيتمني أنها تتعدل قريب وتبقي أفضل,
وكويس إنهم مستمرين في محاولة أنهم يطورو نفسهم ويكونو أفضل وبيسمعو للعملاء.
بالنسبة لنقطة الزيت كويس أنك ذكرتها برضه,,
بس أنا قلت كتير في ردود قديمة أنك تاخد معاك الزيت اللي ينابسك ويريحك سواء زيت شيل أو توتال وهتغيره من غير مشاكل حتي لو قالو مينفعش, قول مش هغير غير بيه لأن دي حاجة مش بتضر بالضمان طالما الزيت مطابق للمعايير الجديدة واللزوجة مظبوطة.