مطلوب راي الخبراء و اللي مجربين البريليانس v5

**Mostafa Hessen** · 02-02-2014 07:29 PM

المشاركة الأصلية كتبت بواسطة 2code

العربية مع ابن عمي جايبها من اسبوعين بسم الله ما شاء الله جميلة وكله تمام فيها

واسعة وشكلها كويس والفوانيس عدسات ودي عاجباني

انا معايا دلوقتي bmw x1 sport 2014 وركبت البريليانس v5 من ابن عمي خصوصاً انه كان في الكلية وانا اللي استلمتهاله مع عمي وهو مش بيعرف يسوق وكان عايز يعملهاله مفاجأه فأخدني معاه استلمها واجيبها للبيت

هعلق على الفروقات اللي شوفتها في العربيتين مع مراعاة السعر والجودة والصناعة والماركة ولكن انا هقول لك لانك عايز تعرف مستوى شئ فبتقارن بين top وبين حاجة عايز تعرف تاخد كام درجة من الـtop علماً بأن السفر من الوكيل الي البيت عند عمي لا تقل عن 200 كيلو صحراوي !!!!!!!!!!!!!!!

اول حاجة التقفيل كويس على عربية في سعرها ودي نقطة تحسب لها

ثانياً الخامات متوسطة كويسة على عربية في سعرها ودي برضه نقطة تحسب لها

ثالثاً السحب انا مطلبتش من العربية كتير ومش هقارن السحب طبعاً بـbmw فعلشان كده اديها مناسب على سعرها وحجمها ومتطلبش منها اكتر من كده هو كده تمام عليها اوي

رابعاً الفرامل - هنقارن بـbmw تبقى وحشه اوي هنقارن بالعربيات العادية تبقى فرامل كويسة وبتستجيب بسرعة وتحسب نقطة ليها بحسب سعرها

خامساً الثبات - "معلش مش ثباته بالشكل اللي في بالك" انا عديت على حفره صغيره وانا على 110 - 120 لقيت الدريكسون اتهز مني جامد وانا متعود امسك الدريكسون بأيد واحده واحيانا عندي في bmw مش بمسك اي حاجة بكون بلعب في الـnavigation او النت او الـidrive بشكل عام ودي عربية صيني برضه يعني متطلبش منها زيادة عن حقها هي كده تمام واللي ركب عربية ثابته (الثبات اقصد بيه bmw اولا و mercedes ثانياً غير كده لأ لو سمحتوا)

سادساً العزل - كويس اوي وحاجة تحسب ليها برضه

سابعاً الكاوتش - نوعه سئ وبيلم زلط بسرعة وانا بصراحة مش بحب صوت الزلط وهو في الكاوتش على الطريق - لو طريقك مفيهوش زلط مش هتحس بالموضوع ده لكن نوع ونقشة الكاوتش وحشه ونسيت ابص ايه نوعه

ثامناً عاجباني الاوبشنز اللي فيها خصوصاً اعلى فئه دي اللي مع ابن عمي وفوانيس عدسات والـstart - stop وحاجة تمام

تاسعاً الصوت - معلش انا كنت مشغل قران فمعرفتش اسمع الصوت هل نقى ولا لأ لان القران صوته جميل حتى لو على سماعات موبايل لكن مجربتش في اغاني و bass وكده هيبقى ايه خصوصاً ان الولد شباب وهيحب يشغل اغاني وبصوت حلو ونقي ولكن اللي سمعته صوت كويس مش وحش

رأيي العربية ممتازه على سعرها ومتطلبش منها فوق طاقتها يعني استعملها قضي بيها مشاويرك

واديها 8 من 10 بالنسبة لفئتها لكن لو هقارن انا بنفسي بـbmw هتاخد 5 من 10

انصحك بشرائها واعرف قدارتها وامشي بيها يعني متقوليش اعمل بيها خمساية زي ما ابن عمي قال عايز اعمل زيك ما بتعمل بالـbmw قولت له طيب استناني انزل من العربية علشان مش متبرع بعمري هههههههههههه

ومبرووووووووووووك عليك صفقة رابحة وعربية مكسب بس استعملها كويس واهتم بيها ومش هتظهر لك مشاكل

بالنسبة لموضوع التيل اكيد مظهرش عند ابن عمي لانه لسه جديد

رأى رائع من شخص رائع

تقبل تحياتى

وشكرا على الحياديه

**Mostafa Hessen** · 02-02-2014 07:30 PM

المشاركة الأصلية كتبت بواسطة smsm159753

العريبة كويسة ممتازة لحد كبييير جدا بقالها سنة معاي
عيبها في تيل الفرامل بيعمل صوت احيانا
غير كدا عفشة ناعمة جدااااااااااااااااااااا من هنا للصبح صخصخوا في المية مليون مطب اللي بقا في مصر
السحب والجري من الصفر لحد 50-60 تقيل سنة ( اعتقد عشان اتوماتيك ) بعد كدا طيارة بمعني الكلمة انا ببقا ماشي حاسس انها مثلا 40 وهيا 80-100 ما شاء الله
العزل ودا نقصطة مهمة بمشي ال 160 و 170 ولا حاااااااااااااسسسس باي حاجة ولا الهوا حتي
صاجها تقيل ومحمل جدااا تقدر تحس لما تفتح الكبووت كانك شايل وزن كبير
انا معاي الهاي لاين
طبعا الاوبشن من جوا واسعة مريحة في السفر وخصوصا لو معاك عائلة
من اول ما جبتها مش حكت في اي مطب نهائي مع اني بمشي في طرق المطب ممكن طوله زي الهرم ههههه
استهلاك البنزين تقدر تقول في الطرق المصرية الفول تانك يجيبك من 300-325 كيلو علي الرغم المفروض يعمل علي الاقل 400-450 ولكن الطرق زبااااااااالة
التكييف تلاجة علي نص السرعة ( عمري ما زودته عن النص ) بكون تلجت خالص
طبعا الفرامل ال abs + ebd فرررق رهيب وانقذت حياتي اكتر من مرة لانه بمشي ساعات بسرعة كبيرة والعربية بتسحب ةوتجري بسرعة مش بتحس بيها اساسا

طبعا العربية لو محمل فيها وراكب 4 اشخاص ولا كان فيها اي حاجة وبرضه ثبات عااالي جدا
اانا كنت ماشي ومحمل العربية 5 اشخاص علي طريق مصر اسكندرية علي 170-180 ولا الهوا
من القاهرة لاسكندرية ( في مدة ساعة ونص او ساعتين الا ربع علي الحال دا )

التقفيل الداخلي بتحس بجودة خاماته لحد بعيد كانه الماني
ايضا العربية في عوامل امان وحبشتكاانات حلوة خصوصا لو الهاي لاين
زي العريبة مش تققل لو الباب مفتوح او الشنطة او الغيار مش مبظوط .... الخ
تفتح وتقفل من زرار في اوكرة الباب السائق
لو الكونتاتك مفتوح علي اي اول ضغطة العربية برضه مش تقفل

الاميبوليزر كويس وووغيرها من الحبشتكانات

الصيانة في اول 2000 تقريبا 450 جنيه
اول 10000 اللاف تقريبا 650 جنيه

اه بالنسبة لعيب صوت تصفير الفرامل لسه هشوفه في التوكيل بس قريب ( دا عيبها الوحيد في رايي المتواضع )

اي استفسارات اخري تحت امرك
سلام

شرح رائع ووافى

تقبل تحياتى