الموضوع: تقرير: صيانة 10,000 كم نيسان صني 2013

السلام عليكم ورحمة الله وبركاته

إزيكم يا نيساناوية ..... يا رب تكونوا بخير.

النهاردة أنا حابب أنقلكم تجربتي مع صيانة ال 10,000 كم.

قبل الصيانة:-

1- العربية ممتازة تماما وزي الفل لحد الكيلو 8,600 .... من ساعتها ابتدى صوت الصفارة الخاصة بالتيل الأمامي تظهر.

2- الزيت اللي كنت حطيته في صيانة ال 5,000 كان فالفولاين اينجين آرمور وكانت لزوجته 5w-40 واللزوجة ديه للأسف كانت تقيلة وده أدى لارتفاع صوت الموتور وزيادة استهلاك البنزين فقررت تغيير الزيت لوولف بلزوجة 5w-30.

3- من ساعة ما عملت الفرش الجلد عند جينز كار وأنا ظهرت عندي زنة عند الكرسي اللي ورا يمين لما بأمشي على أرض الأسفلت بتاعها محبب.

4- فرامل اليد كانت محتاجة يتعملها رجلشة (كانت بتتشد معايا مسافة طويــــــــــــــلة مقارنة بالطبيعي لفرامل اليد من غير تأثير على قدرتها).

5- كان عندي صوت بيظهر أول ما التكييف يشتغل.

6- كنت قريت على المنتدى هنا انه كان فيه حد اتقطع عنده سير في العربية وكان شايل معاه واحد احتياطي وده اللي نجده وقتها.

حجز الصيانة:-

حجزت عند السبع يوم الأربع على اني أروح يوم الأحد الساعة 9 الصبح وقد كان ( وديه ميزة في السبع عن أوتو إيجيبت اللي لو كنت حجزت الأربع كنت حأروح بعديها بأسبوع ونص على الأقل)

يوم الصيانة:-

روحت في ميعادي والمهندس سمع مشاكلي واستلم العربية وقالي حتخلص على الساعة 11. وكانت تعليقاته كالتالي:-

1- التيل الأمامي قال حنشوفه وماكانش ليه عليه تعليق مبدئي.

2- الزيت قالي حيتم تغييره بالزيت اللي انا كنت جايبه (وولف 5w-30 ).

3- الزنة أنا قلتله اني أنا معتقد انها من الازاز فقال انه حيعمل تشيك عليه.

4- قالي انهم حيرجلشوا فرامل اليد.

5- قالي ان صوت التكييف في البداية عادي لان ده هوا صوت ضخ الفريون في المواسير في العربية وقالي علشان كده مش حتلاقيه بيتكرر معاك لو شغلت التكييف تاني أثناء اليوم ( وده حقيقي).

6- بالنسبة للسيور قالي ان العربية فيها سير واحد اسمه سير المجموعة وأنا طلبت اني اشتري واحد يكون معايا احتياطي. ( هوا بيتغير على صيانة ال 40,000 فقلت حصل حاجة آهو معايا محصلش آديني حأغيره في وقته)

الصيانة استمرت لحد الساعة 1:30 وأنا نزلت أسأل المهندس فقالي ان العربية خلصت.

سألته على التيل قالي انه ماكانش متصنفر فهما صنفروه وانه حيكمل معايا لحد 15,000 كم والصوت مش حيظهر.

عملت تشيك على العربية ودفعت المصاريف ومشيت.

لسه ماكملتش الشارع بتاعهم فوجئت ان صوت الزنة لسه موجود رغم انهم شحموا الازاز فرجعت للمهندس فقالي تعالى نجربها مع بعض وقعد ورا جنب الازاز والصوت ماظهرش خالص وبعدين قعد جنبي وبرضه الصوت ماظهرش لكن بعد ما مشي الصوت رجع تاني (علشان كده أنا حاسس انه من فرش الكرسي اللي ورا مش من الازاز).

تكلفة الصيانة:-

1- سير مجموعة:- 190 جنيه
2- تغيير زيت وفلتر:- 61 جنيه
3- مصنعية صيانة 10,000 :- 175 جنيه
4- الكلي بالضرايب:- 433 جنيه

تعليقاتي على الصيانة:-

1- سهولة الحجز مع السبع.

2- المهندس غير المهندس بتاع المرة اللي فاتت وكان مش نشيط للأسف (مثلا مابلغنيش ان العربية خلصت ده انا اللي نزلت سألت عليها وكان ورقها تحت ورق كتير يعني المفروض خلصانة من بدري - كمان ماعملش تشيك معايا على العربية انما سابني اتشيك عليها لوحدي). المرة اللي فاتت المهندس بلغني أول ما خلصت وهوا اللي عمل معايا تشيك كامل على العربية.

3- صوت التيل الأمامي رجع يوميها والسبع اتصلوا بيا قولتلهم ان المشكلة لسه موجودة ولسه حأرجع لهم تاني فيها (حأبلغكوا باللي حيحصل في تقرير جديد ان شاء الله).

4- الموتور أدائه اتحسن جدا وصوته هدي جدا واستهلاك البنزين اتحسن مع الزيت الجديد ( مش عارف علشان اللزوجة ولا علشان الماركة نفسها).

5- العربية مازالت نظرتي ليها ما اتغيرتش صفقة رابحة والحمد لله.