الموضوع: مقارنة تفصيلية للوحوش تحت ال85

بص يا ابو هند .. هما الناس قالوا الكلام من الأخر ... بس عن تجربة للسيارة احسنهم الإميجراند و اردئهم اللانوس و الفيرنا و اللوجان كركوبة مستحيل انا اركبهم.. بس لو للوالد ربنا يطول عمرة... انصحك بالفيرنا الأوتوماتيك... لسهولة قيادتها و بيعها و رخص قطع غيارها و لو عالثبات .. فا ممكن تغير الجنوط و تجيب اعرض, و لو عالإيموبيليزر...ممكن تشترى كنترول كهربى و تعمل مفتاح إضافى يفصل الكهربا عن العربية لما يتشال
. و الله اعلى و اعلم و دمتم

ممكن تفكر بردو فالباندينو الأوتوماتيك

المشاركة الأصلية كتبت بواسطة saddam

صديقي المواطن
إنت عارفني مبحبش أحرق بنزين عالفاضي ولا بحب كلام كتير وكفتة مفيش
وخلاصة الخلاصة وتلخيص لكل طلباتك الكتير والتفاصيل الكتير فاﻹجابة واحدة
وهي قولا واحدا
إمجراند 7
ولكن متتعبش نفسك ما دام قلت لباباك والموضوع في إديه فالناس اللي عندهم 60 و 70 و 80 سنة مبيسمعوش الكلام مهما عملت وحيروح يجيب لانوس ﻷن كل الناس الكبار بيجيبوا لانوس رغم إنها أسوأ عربية وحرام يتدفع فيها فلوس
لكن أنا ليا تعليق جانبي أنا يهمني راحة أبويه وهو على راسي من فوق لكن عمري محسمحله بالسن ده يركب عربية مانوال حتى لو وقفت أوقف قصاده أو أكمل من جيبي ﻷن أنا الشباب مش بيطيق الدبرياج في الزحمة عايز أبوك الله يطول في عمره تركبه مانوال بحجة إنه عندي ومبيسمعش الكلام حاول تقنعه وهاتله أوتوماتيك وأنا عارف إنك قدها وقدود

وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

شاكر لمرورك
و هحاول على قد مقدر أقنعه بإيميجراند
لكن موضوع أوتوماتيك...مستحيل
مش ممكن يطاوعني
حتى الآن بيركب عربيته الشاهين و مقلق يركب عربية أختي i10 رغم إن ال2 مانيوال و يقولي دي فيها تكنولوجيا معرفهاش..ربنا يبارك فيه معدي ال60 سنة
فمستحيل أعرف أقنعه
و لو كسب عربية أوتو هيبعها و يشتري مانيوال
فهوفر على نفسي التعب و نشتريله اللي هيريحه

المشاركة الأصلية كتبت بواسطة adel_edrees

بس يا سيدى أنا بأركب اللزجان و بأركب الأمجراند يوميا و أقدر أقوللك على مقارنة سريعة مابينهم على أعتبار ان اللنوس و الفيرنا خارج المنافسة لأعتبارات كتيرة جدا لا داعى لذكرها هنا
1 من ناحية الاعتمادية
اللوجان
2من ناحية الأمان الأمجراند
الأتنين فيهم أمبوليزر
من ناحية الثبات
الأمجراند
من ناحية السحب
الأمجراند أفضل نسبيا
من ناحية الراحة أثناء القيادة
الأمجراند
أسعار قطع الغيار
الأمجراند
التقفيل
اللوجان
الوكيل
اللوجان
جودة الخامات
اللوجان
من ناحية الكماليات
الأمجراند
السعر بعد البيع
الأتنين زفت اللوجان عاشان قطع غيارها و الأمجراند علشان صيني
من ناحية أستهلاك البنزين الأمجراند أكثر أستهلاكا فهى ثقيلة جدا على هذ الموتور
الوجان عربية بقالها عشر سنين بنفس الموتور وبنفس الشاسيه و أتباع منها 2400000 سيارة بمختلف طرازاتها علشانكده ما فيش فيه أفتكاسات و لا مفاجأت سواء حلو أو وحشة أنما الأمجراند عربية لسه جديدة فيها شوية مشاكل في التقفيل يجب الأنتظار قليلا حتى يتم الحكم عليها بشكل كامل و على فكرة كان في زميل بيقول أن اللانوس 1500 علشان كده ما ينفعش أقارن بينها و بين العربيات التانية الله طيب ما هي الأيمجراند 1500 برضه!!!

ريحت قلبي يا راجل
أنا بدور عليك من زمان
أنا الصراحة كنت محتار جدا بين الأتنين
ومستني حد يجاوب على تسؤلاتي عن تجربة
الله يباركلك و يريح قلبك
كده في إحتمال أقنع والدي باللوجان...لكن إمجراند الموضوع هيبقى أصعب (بسبب فوبيا الصيني)
و عموما إن شاء الله أروح أنا و هو و نركب الأتنين و نشوف هيستريح لمين
شكرا مرة تانية لمشاركتك