السلام عليكم
اولا ربنا يوفقك وتلاقي العربية الى بتدور عليها وبالحالة الى انت عايزها
انا كنت زيك من حوالى شهر تقريبا بدور واقرأ واسال ناس معاها العربية لحد ما ربنا وفقني وجبت عربيتي يوم 1/1 , العربية 2013 خليجي / سعودي الناس بتقول عليها اعلى فئة بس هي مش اعلى فئة هي قبل الاخيرة و هوضحلك الفئة الاخيرة بيكون كمالياتها ايه والى قبلها ايه وعموما ما تقلقش الاخيرة او قبل الاخيرة هتلاقي فيها كل الى انت عايزه
عربيتي اخدتها عاملة 33 الف كيلو وكان سعرها بالظبط 135 الف
وكنت بعمل مقارنة بينها وبين عربية تانية عدادها 13 الف كيلو بس كان مطلوب فيها 145 الف
عموما السعر معاك من اول 2011 ممكن تتكلم فى 115 الف جنيه وطالع مع موديل السنة و العداد مع العلم برضو ان عداد الكوبيه بينزل بكل سهولة اهم حاجة يكون معاك حد بيفهم كويس فى السيراتو بالتحديد عشان هيقدر يطلع حالة العربية والعداد الحقيقي بتاعها بالتقريب وده مش هيزعل طلاما حالة العربية كويسه

بالنسبة للعربية انا هقولك المميزات الاول عشان تتبسط
شكل مميز و شبابي وملفت للنظر
تابلوه شكله ظريف وقعدتها من جوه حلوة والكنبة الخلفية واسعة ومفيهاش اي اختلاف عن مساحة السيراتو العادية
اوبشنز كتيرة وظريفة هتلاقيها فى اغلب الكوبيه زي فتحة السقف - سينسور بارك - سينسور اضاءة - سينسور مطر - مرايات ضم - مرايات تعتيم - دريكسيون مالتي فنكشن - 2 اير باج - اي بي اس - مفتاح بصمة - فوجات زينون -كاسيت 6 سي دي - الصوت فى الكوبيه مميز جدا عن اي عربية ركبتها قبل كده لان فيه صب مع ال 6 سماعات الموجودين وليه تحكم منفرد لوحده مع الكاسيت غير الاكوليزر بتاع الكاسيت - التليفون بتاعك هيبقى مربوط بالعربية بلوتوث وتقدر تعمل مكالماتك منه بس الاهم انك تقدر تسمع اي حاجة من على التليفون بلوتوث برضو - فتحة يو اس بي و اي يو اكس - مكان للشاحن غير الولاعة - لايت سيستم على السماعات ليه شكل ظريف برضو سنتر لوك للعربية بعد سرعة 20 كيلو يعنى تقريبا العربية هتلاقي فيها اغلب الحاجات الى بتفكر فيها فى اي عربية و على فكرة كل الى انا قولته لحضرتك ده فى الفئة قبل الاخيرة دي مش اعلى فئة .. الفئة الاخيرة بيكون ليها زيادة حاجتين اتنين بس
بيكون فى زرار على شمال السائق بيتحكم فيه فى القمرة بتاعت الفوانيس يعنى مستوى علو الفوانيس بتتحكم فيه تعليه مثلا لو على طريق سريع عشان يديلك اضاءة ابعد او توطيه لو عايز تستخدمه جوه البلد وتاني حاجة بيكون فيها زرار فى نفس المكان برضو لنظام الثبات الالكتروني وده غير الاي بي اس بتاع الفرامل ليه وظيفة تانية خالص تقدر تقرا عنها لو حبيت
بس كده يا سيدي .. انا مش عارف انا مطول عليك اصلا بالكلام ده كله بس انا جربت زيك وكنت عايز اي معلومة .. المهم نيجي للعيوب بقى خد عندك يا سيدي
العفشة مستفزة ... ناشفة بشكل غير طبيعي فى ناس مش بتفرق معاها بس الحق يتقال العربية غريبة فى النشفان على الطرق المكسرة الى هي اصلا الطبيعي فى الطرق بتاعتنا
- الجنط 17 الكاوتش بتاعها 215/45 وده بيكون الكاوتش قليل جدا بالنسبة للجنط ال 17 وده يا سيدي بختصار شديد جدا حاجة مقرفة في البالونات الى بتطلع منه و انك لازم كل فترة تغير الكاوتش لو اكلت اي نقرة او حفرة او اسفلت مكسر على الطريق بسرعة
- العربية فيها ثبات بصراحة انا مش هنكر بس الثبات فى الملفات عشان المساعدين راكبين ب ميل معين و الجنط العريض و العفشة الرياضية لكن على المستقيم بصراحة لاء العربية خفيفة ومش هتديك احساس بالامان وانت بتجري .. انا كان معايا كروز وكنت بسرح والاقي نفسي ماشي 180 ولما كنت بقصد اجري كنت بحاول اجيب فوق ال 200 لو العربية جابت معايا و بعدها ركبت نيسان جوك برضو ثبات محترم رغم انها عالية برضو 180 فيها بتكون ماشي مرتاح والى راكب جنبك مش حاسس بسرعتك لانه مش شايف العداد ولا حاسس بحاجة لكن العربية دي على قدها شوية وزنها خفيف عشان 126 حصان يقدرو يعملو تسارع كويس بختصار عشان انا بتكلم كتير اصلا العربية لو ماشية 160 وعديت من عربيات نقل حوليك هتلاقي ملاهي بتحصل جوه العربية و احساس العربية فى الجري مش مريح خالص بالعكس انا بجري وانا قلقان
-العربية مش واطية اوي على المطبات يعنى تقريبا نفس ارتفاع الكروز او الالنترا و لو انت راكب لوحدك او معاك شخص او اتنين مش هتبقى مضايق من كل مطب يقابلك بس مش هي دي الفكرة . الفكرة ان المساعد بتاع العربية دي غريب جدا بختصار العربية دي مستحيل تمشي بيها وراكب معاك 4 اشخاص يعنى 5 فى العربية انت كنت بتعمل غلط هتتحاسب عليه عشان اقل اقل اقل مطب هيحك معاك حكة محترمة والعربية مافيهاش مصفح من تحت زي الالماني .. الى بيحكك بيكون علبة الشكمان والمقص الخلفى للعربية و العتب وكل الى نفسك فيه بقى يا معلم

بص انا حاسس اني بكتب بقالى ساعة ونص ومش شايف انا كتبت قد ايه اصلا بس انا حاولت اقولك تجربتي لو ما زهقتش قولى وانا هكملك الباقى وهقولك تبص على ايه وانت بتشتري العربية و حل لشوية مشاكل صغيرة
ومبروك مقدما