هل فعلا رجال مصر يستحقون هذا من نسائهم

**إنسانة** · 30-01-2014 11:18 AM

شيء ضايقني امبارح وحبيت اتكلم عنه واعرف إيه السبب ودا مش تعميم

كنت إمبارح مع زوجي خارجين نجيب ملابس لبنتي وكنا في العربية والمغرب أذن فقلتله جنبنا حديقة هنزل العب البنت فيها مخنوقة من الشقة
قالي طيب ماتتطلعيش برا السور لأي سبب لحد ماخلص وأجي أخدكم وقلتله ماشي
كانت بس نساء وأطفال تقريبا
المهم رحت ألعب بنتي وكان فيه أمهات بتلعب ولادها برضو
أفتكرتهم مصريين وكنت مبسوطة جدا اني شايفة مصريين
فلما نادوني عشان اقف معاهم لقيتهم سوريين 3 سوريات و2 مصريات
أنا جوزي مش بيحب السوريين ودا طبع في السعوديين عموما ومعرفش السبب وللاسف مش بيفرقوا بين الأجانب عموما فبتالي العنصرية بتبقى اشد لو فاكرينه شامي << انا معرفش الأسباب

المهم

أعدت معاهم وكانوا بيتكلموا في موضوع لاداعي لذكره وللأسف المصريات كلامهم كان جريء جدا وبيتكلموا عن ازواجهم بشكل صعب
وحتى السوريات بس بصراحة مكنش أبدا بالصورة اللي بيتكلموا بيها المصريات
أنا كنت تقريبا مش بتكلم ولا دخلت معاهم في الموضوع << لفارق السن والخبرة ! Lol

المهم أنا عرفت أن المصريات لسه متعرفين على بعض زينا كلنا
يعني الإتحاد في الأفكار والجراءة مكنتش لأسباب معرفة مسبقة بينهم

فدا خلاني أكون نظرة تانية خالص عن المصريات وبصراحة أنا عارفة إن دا لاينطبق على كل المصريات فئة يمكن لإن مش ممكن تقيس على شخصين وتعمم على الشعب

لكن حتى المنتديات النسائية سواء مصرية أو خليجية هتلاقوا نبرة الحديث عن الرجال وحدة تقريبا

إيه الأسباب ليه بيتكلموا بالشكل دا

هل هم فعلا رجال مصر يستحقون هذا من نسائهم ؟

مع إختلافي الكامل مع الطريقة لكن أكيد دي مجرد ردود أفعال وليست أفعال

**إنسانة** · 30-01-2014 11:30 AM

وعايزة اعرف حاجة
هل الغربة ليها تمن مكلف بدفعه الزوج لزوجته ؟
مش هم الإتنين مع بعض في الغربة ؟
ليه مطلوب منه يتقاسم دخله مع زوجته ؟
هل دا من الحقوق ؟
لإني بصراحة حسيت إني هبلة جدا وابتديت افكر في الموضوع

**mesaharaty** · 30-01-2014 11:45 AM

أنا حاجاوب حضرتك بالنسبة لتقاسم الزوج مع زوجته فى الدخل ... ومعذرة فأنا صريح وضميرى يحتم عليا إنى أرد بصراحة :
عيب وماينفعش ومستحيل ولايمكن فى يوم من الأيام آخد أو أقتسم من مرتب زوجتى . هذا ليس من حقى أبدا .
أما بالنسبة للغربة فلى فيها رأى :
أنا لا أغترب إلا إذا كنت غير متزوج من أساسه لأسباب عديدة بعضها يرجع إلى إستحالة ترك الزوجة والأولاد بمفردهم (كل الأسباب معروفة فى هذا الصدد لمن كان له منطق وعقل) ، وبرضه باحس إن الغربة بتغير فى سيكلوجية الإنسان إلى الأسوأ وفلوسها بتبقى منظورة وقصصها كتيييييييير .
وعلى أية حال أنا أرى إن الغربة لا تتناسب مع كل أنماط الشخصيات الإنسانية .

**إنسانة** · 30-01-2014 11:54 AM

المشاركة الأصلية كتبت بواسطة mesaharaty

أنا حاجاوب حضرتك بالنسبة لتقاسم الزوج مع زوجته فى الدخل ... ومعذرة فأنا صريح وضميرى يحتم عليا إنى أرد بصراحة :
عيب وماينفعش ومستحيل ولايمكن فى يوم من الأيام آخد أو أقتسم من مرتب زوجتى . هذا ليس من حقى أبدا .
أما بالنسبة للغربة فلى فيها رأى :
أنا لا أغترب إلا إذا كنت غير متزوج من أساسه لأسباب عديدة بعضها يرجع إلى إستحالة ترك الزوجة والأولاد بمفردهم (كل الأسباب معروفة فى هذا الصدد لمن كان له منطق وعقل) ، وبرضه باحس إن الغربة بتغير فى سيكلوجية الإنسان إلى الأسوأ وفلوسها بتبقى منظورة وقصصها كتيييييييير .
وعلى أية حال أنا أرى إن الغربة لا تتناسب مع كل أنماط الشخصيات الإنسانية .

هم الاتثنين في الغربة بس الزوجات بيتقاسموا دخل ازواجهم و كمان ممتلكاتهم
يعني بيكتبولهم شقة مثلا << فقط لأنها تغربت معه مش لأي سبب آخر
عموما موضوع الشقة ضروري في بعض الحالات كحالتي << لكن انا مكنتش فاكرة إن الحبسة والوحدة والغربة دي مش شيء طبيعي
ومكنتش واخدة الموضوع بجدية اصلا بس بعد كلامهم لقيت اني ساكتة عن كل حقوقي وفكارة دا العادي !! لقيته مش العادي خالص ومفيش حد بيعيش كدا لله بس !
بصراحة طريقتهم مش متقبلاها خالص بس كمان ربما دا شيء من الحقوق

**إنسانة** · 30-01-2014 12:00 PM

المشاركة الأصلية كتبت بواسطة محمود السيد

الرجاء توضيح ايه الموضوع الى بيتكلمو فيه مع الاحتفاظ بالحياء وتوضيح اكثر للاسئلة للرد

مش كتابة الموضوع عشان اقول القضية اللي كانت محور حديثهم مش دا المهم
لكن الفكرة إن كل تصرفات المصريات اللي بقرأ عنها هنا ليها أسباب ودوافع قوية كمان
الحلقة المفقودة عندي هي "الأسباب"
ليه دايما اقرأ سخط عن المصريات هنا وفي أي موضوع يتكلم عن السيدات
وكمان سخط شديد من الطرف التاني

بصراحة لازم قبل مانحكم على أي موضوع نسمع الطرفين وإحنا نخرج بمفوم متكامل

شخصية المرأة المصرية مختلفة جدا جدا عن باقي شخصيات النساء
مطالبها و طموحاتها أكبر وشخصياتها أقوى
ويمكن كمان ند منافس للرجل
ليه مفيش تعامل مع الواقع دا من الطرف الآخر ؟

**تامر.محمد** · 30-01-2014 12:41 PM

1- ثقافة عامة
2- انحطاط عام في اخلاق الاغلب بغض النظر عن النوع

**AshTurbo** · 30-01-2014 01:04 PM

فعلاً هي ثقافة مجتمع للأسف وفيها من السلبيات أكثر من الأيجابيات وصحيح المرأة المصرية تختلف عن غيرها ولكن صوابعك مش زي بعضها في الكويس وفي الوحش ولكن للأسف الوحش دلوقتي بقى أكتر ....

نصيحة عالهامش كدة .. لو طلبتي من جوزك شقة وفلوس علشان أنتي متغربة عن بلدك هتبقي بدأتي في سكة ملهاش لازمة ونهايتها وحشة لأن أولاً دي بلده فهو مش متغرب أصلاً وثانياً هو بيعتبر بشكل أو بآخر أنه أنتشلك من البلد الفقيرة الوحشة اللي أسمها مصر وجابك في الجنة عنده فبالتالي دي في حد ذاتها نعمة لازم تشكريه عليها مش تطالبيه بتعويض عنها .

**AshTurbo** · 30-01-2014 01:26 PM

بعدين رداً على سؤالك رجالة مصر دول أبطال وكفاية أن كل شاب دلوقتي بيبقى مطلوب منه يشتغل وينحت في الصخر يمكن الصخر حالة أحسن من حال مصر وظروف الشغل الصعبة اللي فيها من مرتبات متدنية ومعاملة سيئة من أصحاب الشغل وكل ده علشان يجيب شبكة ومهر وشقة وعفش ويفتح بيت لو في بنت واحدة حطت في دماغها بس تحوش حق شبكة متوسطة في حدود 10 ألاف جنيه هتقعد تحوش فيهم كام سنة ... ده لو ساحر مش هيعرف يعمل اللي بيعمله الرجل المصري اللي مش عاجبكم .