الموضوع: ملاحظات فى الاليزيه - هل موجودة فى البيجو 301؟

بنسبال لريحت التكيف انا حصل معيا نفس الموضوع سالت في واحد قالي انتا بتشرب سجائر والتكيف مفتوح قلتلو ايوة الي لما تشرب السيجارة تبقا تفتح الازجاج فعلن بعد لما غيرت الفلتر ورشيت معطر فعلن بعديها ب4 ايام مشمتش الريحة تاني حالص تقابل تحياتي

طيب انا مش بشرب سجاير الحمد لله

ثانيا العربية دلوقتى عاملة 10 الالاف ولسه عاملها صيانة ال10 السبت اللى فات

ثالثا: ازاي اعرف ان البيوجيهات كده خلاص باظت .. لان تغييرها فى 10 الالاف كيلو ده حاسة مش مزبوط .. وقلتلهم المفروض دي تبقى فى الضمان قالولي لأ .. فانا كبرت دماغي ودفعت وخلاص علشان اخلص

الظاهر ان مقولة ان العربيتين واحد مقوله على ارض الواقع غلط فى غلط

1- بحس ان العربية فى طلعتها الاولانية (من حالة الوقوف التام) تقيلة جدا .. عداد الار بي ام بيستجيب بسرعة وبيطلع على طول لكن حركة العربية بطيئة .. فهل ده هو الحال عندكوا فى البيجو؟
الاحساس ده بحسه فى طلعة السلانسيه يعني .. لكن على السرعات العالية العربية بتسحب بسرعة .. طبعا مع الاخذ فى الاعتبار اني كنت راكب كوري وحاسس بالفرق ده قوي

معرفش انا معايا مانيوال والطلعة زي الفل الحمد لله

2- بشم ريحة سيئة جدا من الشكمان لما بدخل العربية الجراج او لو حد واقف ورا العربية .. قلت الكلام ده فى التوكيل قالولي ان بعد تحليل عينة من بنزين العربية لقوا فى مواد مضافة للبنزين (وده محصلش نهائي مني اني ضفت اي additive للبنزين) وان النتيجة دي اثرت على بوجيهات العربية .. وبعد تغيير البوجيهات كلها .. رجعت اشم نفس الريحة تاني .. الريحة دي .. هل ده سببها البنزين نفسه؟؟ ولا الشكمان فيه مشكلة؟
ملحوظة: الريحة دي مش بشمها داخل صالون العربية .. لكن فقط فى الجراج علشان مكان مقفول

الموضوع ده كان في الاول لما كانت العربية جديدة وراح دلوقتى وعلى فكرة العربية بقت ناعمة جدا مش عارف عشان عدت 5000 كيلو ولا عشان بقيت امون من امارات مصر ووطنية بس ؟

3- التكييف بقه بيطلع ريحة زبالة .. والتوكيل قام بتنظيف الفلتر لكن مازالت الريحة موجودة .. بشمها لما بقفل التكييف واخلي المروحة شغالة .. او لما اشغل المروحة بس (مش بحب افتح الازاز علشان التراب والقرف ده وفي كل الاحوال ببقى قافل الهوايات) ريحة بجد بشعة لا تطاق .. فمين ممكن ينظف الفلاتر دي او اغيرها لو لزم الامر

لا مش عندي بس اصلا مش بستحمل اشغل المروحة لوحدها اكتر من ربع ساعة وده في أي عربية لان الهوا بيبقى مكتوم او رطب وبيدى احساس رخم وبيبان اوى لما تقعد فترة وتفتح الازاز تحس بكمية اكسجين رهيبة دخلت مرة واحدة

4- استهلاك البنزين داخل المدينة عالي قوي .. يعنى ممكن يوصل لـ 10 او 11 داخل المدينة .. لكن على الطرق السريعة مع المشي الكتير على سرعات ثابته بينزل لـ 8 واحيانا 7.6 لتر لكل 100 كيلو .. هل ده طبيعي؟؟

الاستهلاك فعلا عالى جوة المدينة بس حاسس انه اتحسن شوية بعد 5000 كيلو غير الاول خالص وعلى فكرة 10 و11 جوة البلد في الزحمة اللى زي الزفت اللى احنا فيها دى مش وحش اوى يعنى حوالى 200 في الصفيحة ده العادى في اغلب العربيات دلوقتى بسبب البنزين ونمط سواقتنا في الزحمة

يعنى في رأيي العربية عادية بمعنى انها مش بلاعة بنزين وفي نفس الوقت ما ينفعش اقول عليها موفرة في البنزين جوة البلد بصراحة ، لا ، هى عادية جوة البلد وجيدة جدا في الطوالى في السرعات المعقولة

طيب متشكر جدا ليكو .. وفي انتظار رأي باقي الاعضاء المحترمين

الحاجة اللى كانت ناسيها، (افتكترها لما قلتوا ان العربية لما بتجمع مبعترفش توقفها)

لما اجي افرمل .. بحس ان العربية بتنط وعايزه تجري مش عايزة تقف .. الاقي الار بي ام بينزل ولما يوصل للواحد يقوم طالع فجأة لواحد ونص مثلا كأنه بينزل للغيار اللى قبله .. ده عامل تأثير على ان العربية بتنط لقدام وبحس ان العربية هتجري وهتخبط فى الى قدامي

الكلام ده كان واضح جدا قبل ما اعمل صيانة ال 10 .. لكن بعدها بقى بيحصل برضه .. بس من غير ما العربية تنط لقدام

افيدونا افادكم الله

متابع