الموضوع: شوية تعديلات عملتها على الشارك

السلام عليكم
انا عملت شوية حاجات فى اللانسر شارك بتاعتى وهى موديل 2012 الفئة الثالثة وحبيت اخد رأيكو فيها :

أولا : اول حاجة عملتها اول ما جبت العربية من سنة ونصف تقريبا حطيت سيليكون عضم فى التجويف اللى امام العجلة الخلفية ( طبعا امام العجلتين) واللى دائما بيبقى فيه طينة وده علشان ماتعملش بارومة طبعا .

ثانيا : ثانى حاجة عملتها عملت فرش جلد اسود تقريبا شبة الطبيعى وخامته حلوة جدا كلفتنى تقريبا بالارضية جلد ايضا حوالى 1400 جنيه وده لان العربية لونها اسود من الداخل وفيرانى من الخارج .

ثالثا : شلت السى دى البيلت بتاعها وجبت واحد اخر بشاشة 8 بوصة فيه طبعا مميزات كثيرة فيديو وام بى ثرى وجى بى اس وبلوتوث ويو اس بى لفلاشة ووصلة ايفون كمان وكاميرا خلفية واللى عاجبنى فيه من ناحية الذوق العام ان الاضاءة بتاعته نفس اضاءه العربية من الداخل زى إضاءة التكييف وطبعا الكاميرا ميزتها كبيرة جدا وده كلفنى حوالى 3500 جنيه وضفت شاشة خلفية بحوالى 600 متصلة بالجهاز وممكن تشغلها لوحدها كمان بفلاشة وتعرض على الجهاز الامامى يعنى الاثنين متصلين ببعض وممكن تشغل من اي منهما ويعرض على الاخر .

رابعا :ركبت زينون من عند ارابكوم بتاع مدينة نصر كورى ضمان سنة كلفنى تقريبا 700 جنيه ( النور الواطى فقط) زى ما بينزل اوريجنال فى العربية وعرفت ان الفوجات بتتعمل بحوالى 500 جنيه بس انا مش عملتها .

خامسا : انا عندى العربية اسود من الداخل وفيها ابنوس لونه بنى ومكنش عاجبنى خالص وطبعا هو مش ابنوس خشب زى بتاع البى ام والمرسيدس ده بلاستيك ومرشوش هذه اللون .. المهم وانا بتفرج على شوية فيديوهات للعربيات على اليوتيوب لقيت اغلب العربيات اللى لونها اسود من الداخل بتبقى مطعمة باللون الفضى وده اشيك بكتير اما الابنوس البنى فده بيليق اكتر مع الفرش البيج فخلعت المسطرة اللى فى منتصف التابوله وانا عارف طبعا طريقه فكها وهى سهلة جدا جدا وغطتها عند واحد كويس جدا جدا باستيكر فضى مط وعملت الابنوس اللى فى الابواب برضو بس من غير ما افكه علشان ده علشان افكه لازم افك فرش الباب .

سادسا : عملت الحتة اللى بتتحط عليها النمرة الامامية اسود (استيكر) مط بيخلى العربية جميلة زى الايفيليوشن .



ودى صورة للسيارة من الداخل :








عايز رأيكو بس انا اسف انى مش صورتها من الخارج .