الموضوع: بيجو بيجو301 هاي لاين ولا تويوتا ياريس الفئة الاولى اوتوماتيك ؟

أنا لسه شايف البيجو...وسعها مناسب لعائلة صغيرة...شنطة العربية واسعة جداً...١٦٠٠ سي سى ١١٥ حصان.....فيها شوية رفاهيات و حركات..أعلى فئة الجنط ١٦ و أول فئة الجنط ١٥ بس على حساب الكاوتش...يعنى إرتفاع العربية واحد...الإستلام بعد ٣ شهور و بتحدد لونين و اللى ييجى بقى انت و حظك...نفس مصنع السيتروين اليزيه...تفتكروا بعد فترة حينزلها قطع غيار رخيصة.....التويوتا الياريس أكيد أفضل كسعر إعادة بيع و إعتمادية و كفاءة...بس الفكرة هل سحبها كويس ؟؟؟ ٨٥ حصان ١٣٠٠ سي سي....الكورولا ٢٠٠٥ كان فيه فئة ١٣٠٠ سي سي و كانت ممتازة.....يا ريت حد يقولنا

بصراحة مركبتش ده ولا ده بس كمقارنة نظرية بحتة وعربية قدام عربية يبقى طبعا البيجو 1600 احسن من اليارس 1300

المشاركة الأصلية كتبت بواسطة utopian

يا جماعة يا جماعة
أنا بتدايق قوي لما بلاقي حد بيطلب المشورة و تلاقي الناس داخلة تشجع و تهلل بمنطق أهلي و زمالك !!
كل واحد شاري بيجو ولا شاري ياريس بيكون رده تشجيع لعربيته و خلاص
و ساعات من غير ما يكون شاري , هو تشجيع لحاجة معينة و خلاص
ممكن يكون السائل ليه ظروف محددة , يبقى لازم يكون ردنا مخلص و نقول الميزات و العيوب اللي احنا شايفينها في كل عربية عشان هو يشوف إيه المناسب لمتطلباته و حالته و إمكانياته
و أنا حبدأ بنفسي بصفتي مجرب العربيتين و شاري الاتنين للشركة اللي شغال فيها و شايف أداءهم تحت ظروف تشغيل قاسية في السعودية
بص يا سيدي , التويوتا بصفة عامة هي أقل عربية من ناحية متعة القيادة وسط الموديلات المحترمة لإنها أصلا في معظم موديلاتها مصممة لفئة عمرية كبيرة شوية في السن ( من 40 سنة للياريس و انت طالع للكورولا و الكامري ) بس مقابل كده بتديلك إعتمادية و كفاءة تشغيل و طول عمر و قلة مشاكل أكثر من أي عربية في العالم و بلا أي منافسة
أما بالنسبة للبيجو 301 و زي ما إحنا عارفين دي عربية مصممة للأسواق الفقيرة اللي زينا (شمال افريقيا و شرق اوروبا و بعض مناطق آسيا و افريقيا ) , يعني مش حتتباع أصلا في اوروبا الغربية ولا انجلترا ولا امريكا و لا كندا ولا اليابان , ممكن تعتبرها حاجة زي اللوجان كده , فمتعتبرهاش بيجو بيجو يعني
يعني توقع كماليات و حركات بس متتوقعش أبدا إعتمادية زي إعتمادية التويوتا .
تحربتي الشخصية بعد سنة من الإستعمال المضني لخمس عربيات 301 و 4 ياريس (العربيات عملت تقريبا 60 الف في سنة واحدة و شيل و حط و تحميل جامد و حرارة و طرق مدغدغة و استعمال سيء ), الياريس أثبتت كفائة تشغيلية أعلى من الـ 301 بمراحل , البيجوهات فتحت بقها خلاص و فرق جودة الصناعة و العمر الافتراضي للعربية بان بشكل ملحوظ جدا , مساعدين و جلب و طربمات ميه و كمبروسورات تكييف و خراطيم ريداتير و غيره , إنما الياريس أكثر من تيل و زيوت مفيش , ده حتى الالفلاتر مبنغيرهاش و مكبرين دماغنا .
في حين إن كل السواقين أجمعوا إن ركوبة الـ 301 أحسن ( شوية مش كثير ) باستثناء تكييفها ( تكييف الياريس أحسن ) .
نيجي للخلاصة , لو انت إستخدامك ناعم و بتحافظ على عربيتك قوي و مش بتحملها كتير ولا بتبهدلها و في نفس الوقت الكماليات بتفرق معاك قوي في إحساسك بالعربية يبقى أرجحلك الـ 301 بس خد بالك , جودة التصنيع و العمر الافتراشي و الاعتمادية أقل بشكل ملحوظ
أما لو ككنت بتسوق سواقة عواجيزي و ميفرقش معاك في العربية غير الأوتوماتيك و التكييب و البارو و عايز تجيب عربية متفتحش بقها ولا تمد إديك فيها غير في تيل و فلاتر و زيوت على الأقل لحد ما تعمل 200 الف يبقى تجيب ياريس , بس خد بالك سعرها أعلى .
بس كده :)

الكلام ده مهم جدا جدا يا ريت لو صورتين تلاته توضح حالة العربيات واظن انك بتتكلم علي الياريس الشكل القديم مش الجديد صح ؟

ده حقيقي
انا بتكلم عن الياريس 2013
بالنسبة للشرق الأوسط و شمال افريقيا هي هي الياريس 2014 باستثناء البودي
نفس الموتور و نفس الجيربوكس العقيم و نفس العفشة
المعلومة دي مصدرها قطع الغيار
هي هي بنفس الرقم

متابع

انا متشكر جدا على مجهوداتكم و سرعة الرد بجد انتو ساعدوتني
في الاختيار وانا بصراحة كنت ميال اكتر للبيجو ( كفاية انها اوروبي )
بس اللي حيرني موضوع الاعتمادية بتاعة التويوتا و مظنش ان البيجو وحشة
في موضوع الاعتمادية ده ....ولا ايه ؟