الموضوع: بيجو بيجو301 هاي لاين ولا تويوتا ياريس الفئة الاولى اوتوماتيك ؟

المشاركة الأصلية كتبت بواسطة utopian

يا جماصريح ا جماعة
أنا بتدايق قوي لما بلاقي حد بيطلب المشورة و تلاقي الناس داخلة تشجع و تهلل بمنطق أهلي و زمالك !!
كل واحد شاري بيجو ولا شاري ياريس بيكون رده تشجيع لعربيته و خلاص
و ساعات من غير ما يكون شاري , هو تشجيع لحاجة معينة و خلاص
ممكن يكون السائل ليه ظروف محددة , يبقى لازم يكون ردنا مخلص و نقول الميزات و العيوب اللي احنا شايفينها في كل عربية عشان هو يشوف إيه المناسب لمتطلباته و حالته و إمكانياته
و أنا حبدأ بنفسي بصفتي مجرب العربيتين و شاري الاتنين للشركة اللي شغال فيها و شايف أداءهم تحت ظروف تشغيل قاسية في السعودية
بص يا سيدي , التويوتا بصفة عامة هي أقل عربية من ناحية متعة القيادة وسط الموديلات المحترمة لإنها أصلا في معظم موديلاتها مصممة لفئة عمرية كبيرة شوية في السن ( من 40 سنة للياريس و انت طالع للكورولا و الكامري ) بس مقابل كده بتديلك إعتمادية و كفاءة تشغيل و طول عمر و قلة مشاكل أكثر من أي عربية في العالم و بلا أي منافسة
أما بالنسبة للبيجو 301 و زي ما إحنا عارفين دي عربية مصممة للأسواق الفقيرة اللي زينا (شمال افريقيا و شرق اوروبا و بعض مناطق آسيا و افريقيا ) , يعني مش حتتباع أصلا في اوروبا الغربية ولا انجلترا ولا امريكا و لا كندا ولا اليابان , ممكن تعتبرها حاجة زي اللوجان كده , فمتعتبرهاش بيجو بيجو يعني
يعني توقع كماليات و حركات بس متتوقعش أبدا إعتمادية زي إعتمادية التويوتا .
تحربتي الشخصية بعد سنة من الإستعمال المضني لخمس عربيات 301 و 4 ياريس (العربيات عملت تقريبا 60 الف في سنة واحدة و شيل و حط و تحميل جامد و حرارة و طرق مدغدغة و استعمال سيء ), الياريس أثبتت كفائة تشغيلية أعلى من الـ 301 بمراحل , البيجوهات فتحت بقها خلاص و فرق جودة الصناعة و العمر الافتراضي للعربية بان بشكل ملحوظ جدا , مساعدين و جلب و طربمات ميه و كمبروسورات تكييف و خراطيم ريداتير و غيره , إنما الياريس أكثر من تيل و زيوت مفيش , ده حتى الالفلاتر مبنغيرهاش و مكبرين دماغنا .
في حين إن كل السواقين أجمعوا إن ركوبة الـ 301 أحسن ( شوية مش كثير ) باستثناء تكييفها ( تكييف الياريس أحسن ) .
نيجي للخلاصة , لو انت إستخدامك ناعم و بتحافظ على عربيتك قوي و مش بتحملها كتير ولا بتبهدلها و في نفس الوقت الكماليات بتفرق معاك قوي في إحساسك بالعربية يبقى أرجحلك الـ 301 بس خد بالك , جودة التصنيع و العمر الافتراشي و الاعتمادية أقل بشكل ملحوظ
أما لو ككنت بتسوق سواقة عواجيزي و ميفرقش معاك في العربية غير الأوتوماتيك و التكييب و البارو و عايز تجيب عربية متفتحش بقها ولا تمد إديك فيها غير في تيل و فلاتر و زيوت على الأقل لحد ما تعمل 200 الف يبقى تجيب ياريس , بس خد بالك سعرها أعلى .
بس كده :)

يا باشا الراجل سأل سؤال مباشر و صريح دى و ﻻ دى ؟ و الناس بتجاوبه مباشر . الراجل لو استخدامه عادى يعنى مش شيل و ﻻ حط و لا تحميل يبقا 301 على طول . يعنى انا كنت باقارن الاتنين لمراتى . تروح شغلها و بترجع مش اكتر غير مشاوير بسيطه . 301 طبعا احسن لها . و مين قال انها مش نازله فى فرنسا او انجلترا او اوروبا الغربيه ؟ اذا كانت هيه اصلا تصنيع اسبانى . بالنسبه للفرنساوى كله مش ينزل امريكا اصلا لحساسيات تجاريه و سياسيه بين فرنسا و امريكا بسبب كندا و الوضع السياسي فيها و شىء طبيعى انه كل الاوروبى فاشل فى الخليج بما فيهم المرسيدس و البى ام . علشان كده رينو اتجهت لنيسان فى اليابان و عملت تحالف و استخدام الاعتماديه اليابانيه فى المواتير مع الرفاهيه الفرنسيه المعروفه