عايز اخد رئي اهل الخبره....

**amr_Shatto** · 15-02-2014 10:38 AM

انا عايز اجيب عربيه .... فا زي اي شب مصري في اول الطريق فكرت ف ال 127 ... رخيصه مش بتستهلك بنزين كتير قطع غيار رخيصه جدااااا
بس اخدت بالي اني مهما اعمل فيها هتفضل 127 و مش هسافر براحتي (انا بسافر كتير) و هتعمل معايا حركات نص كم ....
فا فكرت ف لسيفيك 1985 لاقيتها شكلها معقول و سعرها يعني (غاليه عليا شويه)
بس انا جيت اخد رئيكو ... ال127 احسن ولا السيفيك 1985؟
من حيس قطع الغيار و المشاكل و الاداء و استهلاك البنزين
ياريت تفيدوني
شكرا مقدما

**saddam** · 15-02-2014 02:59 PM

صديقي المواطن
عشان أنا بحبك حظطر أصدمك وأزعلك وأنصحك نصيحة محب قولا واحدا لو عايز تبتدي حياتك بفشل ومطب كبير وتستمر على الفشل في حياتك فحتجيب 127 و 128 حتفضل طول عمرك مهما ركبت عربيات فخمة حتفضل فاكر بدايتك الأليمة والشنيعة وأيامك المتبهدلة صبح ليل وأيام الزق وغيابة الدوارة وحتتصاحب على كل بتوع شكمانات الجمهورية عشان كل ساعتين ونص الشاسيهات حتفك من مكانها وتروح تلحم ودي حتبقه قصة حياتك ما بين اﻷسطة مسمار واﻷسطة صامولة ده بيرفع فيك وده بيكبس فيك فخد نصيحتي ومتظلمش نفسك ولوقفت تروح وتيجي مشي أو مواصلات ودور على أي ياباني قديم لو الماديات تعبانة حتى لو قطع غياره قليل بس هو أساسا بيعطل مرة ولا مرتين كل 17 سنة
اللهم قد بلغت
اللهم فإشهد
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال