تجربتي الكاملة عن bmw 320 2006/e90

**Rdwany** · 17-02-2014 01:15 AM

[OVERLINE]العيوب الشائعة قبل الشراء : [/OVERLINE]

قبل ما اشتريها كتير خوفوني من شوية عيوب زي انها واطية اوي علي الأرض و ان تكيفها وحش و ان تكاليف صيانتها و قطع غيارها غالية أوي لكن بعد ما اشترتها لقيت ان معظم الكلام ده مبالغ فيه فهي مش واطية اوي علي الأرض زيها زي الانوس اللي معايا يعني تركب 5 و تاخد اي مطب مستريح بس اهم حاجة انك تعدي علي المطب بحرص بالأضافة انها مصفحة من تحت و ده هيديك حماية كبيرة للعربية , اما تكيفها فرائع من غير اي مشاكل , اما بالنسبة لأسعار الصيانة و قطع الغيار فزيها زي اي علابية بي ام معروفة ان صيانتها و قطع غيارها غالية بس علي الأقل اسعار الفئة 3 احسن بكتير من الفئة الخامسة بس الحاجة في ال بي ام غاليها بس بتعد معاك فترة طويلة مش زي معظم العربيات التانية يعني مثلا البوجيهات بتتغير كل حوالي 100 الف - تيل الفرامل بيتغير كل حوالي 60 الف

[OVERLINE]العيوب اللي لاحظتها في العربية [/OVERLINE]

العربية ديه مفيهاش استبن رغم ان الكاوتشات اللي فيها ران فلات يعني لو اتخرمت ممن تمشيك حوالي 200 كيلوا لكن انا شايف ان ديه مشكلة بردوا - القاعدة ورا واسعة و جيدة بالنسبة لشخصين لكن ل 3 بتبأقي ضيقة شوية

[OVERLINE]مميزات السيارة من خلال تجربتي [/OVERLINE]

شكل العربية اكثر من رائع تبهر اي حد يشوفها ( خمسة و خميسة ) اداء العربية ممتاز تجري و تلف علي سرعات عالية مش هتصدق اللي ممكن تعمله بالعربية ديه و سحب اكثر من رائع - استهلاك بنزين اكتر من رائع رغم انها 2000 سي سي لكن استهلاكها للبنزين زي الانوس او اكتر شوية قليلة - فتيس مزود ب نقلة دي اس عشان الجري و الحركات - كاسيت جميل و وصله aux و سي دي

[OVERLINE]نصائح قبل الشراء [/OVERLINE]

قبل شراء العربية روح للتوكيل للكشف عليه و تأكد من سلامة الماتور و الفتيس و من علبة الدركسيون و علبة الشكمان عشان ميكونش صاحبها خد بيها مطب غشيم , و يستحسن انها نتكونش راشة و ده هيبان في التوكيل و انها متكونش ماشية اكتر من 100 الف عشان تستمتع بيها اطول وقت ممكن و ده دليلك للكشف في التوكيل http://www.nilemotors.net/Nile/405620-bmw.html

[OVERLINE]من الأخر[/OVERLINE]

من غير تحيز لعربيتي العربية اتر من رائعة و انا مش نادم اني جبتها و في رأيي المتواضع انها احسن من السيارت الجديدة اللي في ثمنها اللي بيتراوح من 150 - 180 حسب الحالة

**dr/hamza** · 17-02-2014 01:35 AM

مبروووووك عليك

**omaranes77** · 17-02-2014 02:24 AM

مبروك ياباشا ربنا يديك خيرها ويبعد عنك شرها الف مبروك يا باشا .. تحياتي

**برنس الليالي** · 17-02-2014 03:12 AM

السلام عليكم ورحمة الله وبركاته

تسلم يا استاذنا الكريم على الموضوع المفيد دا وانا بصراحة من عشان العربية دي ولو اني مركبتهاش ومعايا الشكل الجديد

بس شكلها بالنسبالي شبابي اكتر من الجديدة عشان الاخوة مايقولوش اني متحيذ بالعكس دا الواقع انا شايفها شبابية اكتر من الحالية

انا عندي استفسار بعد اذن حضرتك ... انا مليش تجارب مع المستعمل قبل كدا وفكرت اكتر من مرة في الـ316i موديل 2011 قاطعة 25,000 كيلو

مطلوب فيها 220 الف جنيه تفتكر السعر دا مناسب ولا كتير ؟ مع العلم انها 316 مش 320 زي بتاعت حضرتك

في حاجة كمان لو سمحت ايه اخبار العفشة اللي مرعوبين منها لإني سمعت انها حجر وتكسر الضهر مع الحفر والمطبات ايه رأي حضرتك في الكلام دا؟

- تسلم يا برنس على الموضوع وبإنتظار ردك على استفساري والعربية تتعشق بصراحة واللي يجيبها ميفكرش يبيعها لغاية ما العربية تهلك لوحدها ...

في امان الله

**svneleven** · 17-02-2014 03:31 AM

تعليق بسيط تيل الفرامل أخرة 35000 كم مش 60000.

**Rdwany** · 17-02-2014 03:48 AM

المشاركة الأصلية كتبت بواسطة برنس الليالي

السلام عليكم ورحمة الله وبركاته

تسلم يا استاذنا الكريم على الموضوع المفيد دا وانا بصراحة من عشان العربية دي ولو اني مركبتهاش ومعايا الشكل الجديد

بس شكلها بالنسبالي شبابي اكتر من الجديدة عشان الاخوة مايقولوش اني متحيذ بالعكس دا الواقع انا شايفها شبابية اكتر من الحالية

انا عندي استفسار بعد اذن حضرتك ... انا مليش تجارب مع المستعمل قبل كدا وفكرت اكتر من مرة في الـ316i موديل 2011 قاطعة 25,000 كيلو

مطلوب فيها 220 الف جنيه تفتكر السعر دا مناسب ولا كتير ؟ مع العلم انها 316 مش 320 زي بتاعت حضرتك

في حاجة كمان لو سمحت ايه اخبار العفشة اللي مرعوبين منها لإني سمعت انها حجر وتكسر الضهر مع الحفر والمطبات ايه رأي حضرتك في الكلام دا؟

- تسلم يا برنس على الموضوع وبإنتظار ردك على استفساري والعربية تتعشق بصراحة واللي يجيبها ميفكرش يبيعها لغاية ما العربية تهلك لوحدها ...

في امان الله

بالنسبة لسعر السيارة انا شايفوا معقول بس بصراحة انا مليش اوي في ال 316 و في رأي المتواضع دور علي 320 موديل 2008 - 2009 احسن بكتير من 316 لأني مبقتنعش بالبي ام اقل من 2000 سي سي بالنسبة للعفشة هي ناشفة شوية بس مش مشكلة كبيرة

**برنس الليالي** · 17-02-2014 04:22 AM

المشاركة الأصلية كتبت بواسطة rdwany

بالنسبة لسعر السيارة انا شايفوا معقول بس بصراحة انا مليش اوي في ال 316 و في رأي المتواضع دور علي 320 موديل 2008 - 2009 احسن بكتير من 316 لأني مبقتنعش بالبي ام اقل من 2000 سي سي بالنسبة للعفشة هي ناشفة شوية بس مش مشكلة كبيرة

طيب حضرتك بتبقى متعبة يعني مع الحفر والمطبات ولا لو اخدناها برفق بتبقى كويسة ؟ يعني مش ممكن تطرى شوية مع جنط 16 ؟

طيب بالنسبة لتسارع العربية للـ316 والـ320 حضرتك عندك فكرة ؟ اصلي انا معايا 320 الشكل الجديد والتسارع ممتاز

فعايز اخد فكرة عن الـ316 خصوصاً اني بدور على حاجة تحت الـ320 اللي معايا حالياً وبفكر في رينج الـ200 الف والعربية دي عجباني الصراحة

**2CODE** · 17-02-2014 04:38 AM

المشاركة الأصلية كتبت بواسطة برنس الليالي

طيب حضرتك بتبقى متعبة يعني مع الحفر والمطبات ولا لو اخدناها برفق بتبقى كويسة ؟ يعني مش ممكن تطرى شوية مع جنط 16 ؟

طيب بالنسبة لتسارع العربية للـ316 والـ320 حضرتك عندك فكرة ؟ اصلي انا معايا 320 الشكل الجديد والتسارع ممتاز

فعايز اخد فكرة عن الـ316 خصوصاً اني بدور على حاجة تحت الـ320 اللي معايا حالياً وبفكر في رينج الـ200 الف والعربية دي عجباني الصراحة

ليه عايز عربية غير اللي معاك ؟ هي مش مريحاك ولا ايه ؟؟؟؟؟
انا هجيب عربية تانية مع الـX1 Sport 2014 ماشي بس هجيبها فيرنا مستعمله حالة نضيفه انما المشاوير للـBM خير ايه اللي حصل معاك ؟؟؟ الـ320 عربية ممتازه ونصيحة مني اللي مركبش BMW الـ2000 سي سي مركبش عربيات BMW صدقني جرب الـ316 مش هتفكر تركبها تاني وانت معاك الـ2000 سي سي من BMW !!!!

المشاركة الأصلية كتبت بواسطة svneleven

تعليق بسيط تيل الفرامل أخرة 35000 كم مش 60000.

التيل من المستهلكات بحسب سواقتك مش بحسب الكيلو !!!!
يعني مثلاً الـRecommended من BMW في تيل الفرامل هو 50 الف عندي في X1 لكن انت ممكن تغيره في 30 الف كيلو بحسب جريك وفراملك ولو حبيت تعمل حركات بالعربية (كعادة الـBMW في الخمسات وكده) كل ده بيهلك التيل بسرعة !!!!!

**برنس الليالي** · 17-02-2014 04:58 AM

المشاركة الأصلية كتبت بواسطة 2CODE

ليه عايز عربية غير اللي معاك ؟ هي مش مريحاك ولا ايه ؟؟؟؟؟
انا هجيب عربية تانية مع الـX1 Sport 2014 ماشي بس هجيبها فيرنا مستعمله حالة نضيفه انما المشاوير للـBM خير ايه اللي حصل معاك ؟؟؟ الـ320 عربية ممتازه ونصيحة مني اللي مركبش BMW الـ2000 سي سي مركبش عربيات BMW صدقني جرب الـ316 مش هتفكر تركبها تاني وانت معاك الـ2000 سي سي من BMW !!!!

صباح الفل يا باشا
لا بالعكس مين قال كدا الـ320i عربية تفوق الوصف بس انا قبل ما اجيبها كنت ناوي على الـa200 اعلى فئة بس الناس نصحتني وقالتلي اشتري حاجة اعرف ابيعها بعد كدا

وعليها وانا جبت الـ320i لغرض اني اعرف ابيع بعد كدا ومن ساعة مجبتها والعربية بصراحة مخلياني عمال اركبها بمشاوير ومن غير مشاوير عمال على بطال

وطبعاً انا كدا حعمل كيلوات كتيرة جداً وسعرها بعد سنة او سنتين حيبقى واقع فكررت اجيب حاجة تحتيها تقضي الغرض تكون تحت الـ200 الف

كنت راشق على الكورولا 2014 لإني مستغناش عن الـesp خلاص بس لما لقيت الناس بتشكر في الـe90 دي قلت افكر فيها واهي على الاقل بي إم عشان محسش بفرق كبير

المشكلة اني مقلق من المستعمل لإني مليش اي تجربة خالص قبل كدا مع المستعمل ... بقولك ايه يا برنس متعرفش تسارع الـ316 e90 من الثبات للـ100 في كام ثانية ؟

**2CODE** · 17-02-2014 06:33 AM

المشاركة الأصلية كتبت بواسطة برنس الليالي

صباح الفل يا باشا
لا بالعكس مين قال كدا الـ320i عربية تفوق الوصف بس انا قبل ما اجيبها كنت ناوي على الـa200 اعلى فئة بس الناس نصحتني وقالتلي اشتري حاجة اعرف ابيعها بعد كدا

وعليها وانا جبت الـ320i لغرض اني اعرف ابيع بعد كدا ومن ساعة مجبتها والعربية بصراحة مخلياني عمال اركبها بمشاوير ومن غير مشاوير عمال على بطال

وطبعاً انا كدا حعمل كيلوات كتيرة جداً وسعرها بعد سنة او سنتين حيبقى واقع فكررت اجيب حاجة تحتيها تقضي الغرض تكون تحت الـ200 الف

كنت راشق على الكورولا 2014 لإني مستغناش عن الـesp خلاص بس لما لقيت الناس بتشكر في الـe90 دي قلت افكر فيها واهي على الاقل بي إم عشان محسش بفرق كبير

المشكلة اني مقلق من المستعمل لإني مليش اي تجربة خالص قبل كدا مع المستعمل ... بقولك ايه يا برنس متعرفش تسارع الـ316 e90 من الثبات للـ100 في كام ثانية ؟

لأ بص المشاوير خليك في الـ320 والمش مشاوير خليها العربية التانية ورأيي العربية التانية متكونش bmw ومتكونش عربية زيرو اصلاً !!!! خليك في المستعمل او حتى كسر الزيرو لأن معاك حاجة زيرو ومن bmw يعني احنا راكبين الـtop !!!!!!!!!!!!!

شوف تسارع الـ316 من الثبات لـ100 حوالي 11 ثانية او 10.9 بالظبط كده لان موتورها 116 حصان !!!!! حلوه برضه مش وحشة هتلاقيها بتجري برضه بس متقارنش بأي موتور 2000 سي سي من bmw