النهاردة رحت أتفرج على الشارك الهاي لاين في توكيل دايموند و كان عندي شوية تعليقات على العربية يا ريت تفيدوني فيها (مقارنة بهاي لاين 2013 طبعا):

1) العربية تقفيلها من جوا معجبنيش بصراحة، السقف من جوا بيتحرك و سايب زيادة عن اللزوم و في أكتر من قطعة في التابلوه بتزيق. هل اللي استلموا الشارك 2014 (سواء هاي لاين أو غيره) لاحظوا الموضوع ده؟

2) الكاسيت التاتش المفروض مكتوب فوقه Rockford Fosgate دي متشالة تماما فتديك الإيحاء بإن الكاسيت ده مش بتاعها أصلا و متركب كده.

3) موديل 2014 شالوا منه ال subwoofer اللي كان في الشنطة معرفش ليه بالإضافة إنها أصبحت 6 سماعات مش 9.

4) هي الشارك ال 2013 الهاي لاين كان فيها زرار ال 2WD و ال 4WD؟ عشان بتاعت السنة دي مفيهاش.

5) طبعا سألت على سعر تركيب العتب الجانبي (لأنه بيفرق في شكل العربية جدا) و اتصدمت لما عرفت إن تكلفته 6000 جنيه بالرش و التركيب و المصنعية. ده استهبال رسمي طبعا.

يا ريت لو في حد معاه شارك 2013 هاي لاين يقدر يقولي هل المواصفات الغايبة عن الشارك السنة دي نزلت في عربيتك ولا لأ. و هل في أي توكيل تاني في مصر ممكن أكلمه لعل و عسى يكون بينزل العربية بمواصفات مختلفة؟ و هل أقدر ألاقي ال 2013 بتتباع في أي مكان دلوقتي؟

معلش يا جماعة طولت عليكوا، بس لسه بايع عربيتي و كنت مقبل جدا عالشارك. إيه رأيكوا؟