الموضوع: سؤال للناس الي بتفهم في السمك

المشاركة الأصلية كتبت بواسطة mtak

السيجان حلاوته فى الشوربه و فى الشوى اكتر

و لو السمكه نوعها مضروب هتلاقيها بتفرقع فى القلى

و على رأى المثل

شوربه السيجان دوا للعيان

ياسلام واضح ان حضرتك ذواقه و اكيل للسمك وخبير فيه

وشكلك كده واخد جنسية مزدوجة يعنى مصرى وسويسى هههههه
فعلا زى ماقلت حضرتك السيجان دوا العيان

بس عندك كمان شوربة سمك الرقد لذيذة وفاخرة الطعم( الشوربة البيضاْ اللى بالمستكة والحبهان) وهى كالسيجان خفيفة على المعدة

بس سمك السيجان طعمه الذ وهو مشوى لانه له طعم خاص مميز له دونا عن باقى الاسماك
بس يكون( عنبك ) يعنى سمين موش( راعى) يعنى بطنه مليان طحالب وده هو اللى بفرقع او بطنه تفتح خلال الشوى طبعا دى الفاظ سويسى تطلق على نوعية السمك

المشاركة الأصلية كتبت بواسطة al_manara

كنت هناك زيارة (السويس) وعديت علي ميناء الاتكة . بس اكتشفت اني كنت متاخر (كنت هناك علي 2 الظهر )

واما سألت عرفت ان الواحد يروح هناك الصبح بدري (8 او 9)

دة شكلة من جوة



فصبرت نفسي بكام بسكوتة ورجعت

حضرتك تشرفنا وانا اقوم بالواجب معاك
بس احنا موش بنشترى السمك من ميناء الاتكه غالبا لانها خارج المدينة

ومعظمنا بيشتريه من حلقة السمك بسوق حى الاربعين وكمان فيه حلقة سمك تانية بسوق الجملة عند مزلقان المثلث اول طريق السويس اسماعلية الصحراوى.بس بدرجة اقل بكثير من حلقة الاربعين لانها فى وسط البلد

يعنى حضرتك لو نزلت لحلقة السمك دى راح تلاقى كل اللى يعجبك من الاسماك
من الصبح لغايةالرابعة او الخامسة مساء
وعلى فكرة موسم الصيد بيبدأ من نص سبتمبر لغاية شهر مارس تقريبا
وفيه ممكن تاكل احلى سمك لان الانواع بتكون كتيرة
بعد كده بيتم وقف الصيد رسميا عشان اتاحة الفرصة لتوالد الاسماك ونمو الزريعه الجديدة بالبحر

هو ده الكلام المتين ومشكور لكل من وضح وشرح وزود معلومة وسوال لو امكن :

كنت بشترى من فترة كبيرة من الاربعين وفعلا السمك هناك ممتاز وارخص شوية من القاهرة ولكن طازة جدا ومش عارف كان بيتضحك عليا ولا ايه :

هل السرومبيق بيتباع بالواحدة ولا بالكيلو ؟

السهلية هل سمكة بتاكل جمبرى بس واحسن حاجة لطبخها الصينية المشوى ولا الردة؟

سمك البغبعان يتقلى ولا يتقطع فيليه ؟

محدش يعرف بياع هناك عنده ضمير لاننى كنت بجيب من واحد هناك ومش عارف اخباره ايه (عم سليمان) الله يمسيه بالخير.

والله الواحد جاع

شكرا لكل اضافة بالموضوع .

معلومات كثيرة استفدنا منها .

المشاركة الأصلية كتبت بواسطة mohabelnegm

البغبغان "الصيادين بيسموه الحريد أو الحريت" وفيه منه كذا نوع و بيكون فيه منه أحجام كبيرة أحسن حاجة ليه أنه يتعمل فيليه و السمكة ديه لو شميت ريحة بطنها و هيا بتتنضف مش هاترضى تاكل منها:) لأنه بياكل كل حاجة و أى حاجة. بس لما بيتنضف و يتعمل فيليه و يتقلى بيبقى جميل جدا.

مشكور للتوضيح ومع ان سمكة البغبغان لحمها ابيض جدا وكت بجيبها فى حجم الوقار او الدنيس وجربته مرة واحد فيليه ولانه لحمه طرى(ملظلظ) شوية فمكنش حلو او فى القلى ولا انا اللى عملته غلط او اشتريته غلط.لاننى انا اللى بطبخ السمك .