السلام عليكم
ياشباب استفسار
ازاي افرق بين السمك المستورد والسمك المحلي ؟
والجمبري المستورد والمحلي ؟
في حاجة مميزة توضحلي الفرق ؟
لون . شكل . رائحة ؟
وخصوصا لو هاجيبة من اسكندرية او السويس
لكم الشكر
عرض للطباعة
السلام عليكم
ياشباب استفسار
ازاي افرق بين السمك المستورد والسمك المحلي ؟
والجمبري المستورد والمحلي ؟
في حاجة مميزة توضحلي الفرق ؟
لون . شكل . رائحة ؟
وخصوصا لو هاجيبة من اسكندرية او السويس
لكم الشكر
دة لعبتى
بص مفيش حاجة اسمها محلى ومستورد
بيتقال سمك مزراع وبلدى
المزراع دة الى هو بلطى احمر ودة بيعيش على العلف
وفى البلدى دة الاخضر والابيض ودة بيعيش فى النيل
لو سالتنى تاكل انهى انا بحب المزراع ومتجبش الابيض لانى فى راسه دود
اما الجمبرى بقا افضلهم الجامبو بس غالى ودة ديلة ملون وطويل وفى المتوسط المبرى عموما بكل انواعة حلو
المكرونة افضلهم السويسى ودة حجمها متوسط وغالية وبتنزل فى الشتاء وطعمه عامل زى الجمبرى والنخشاش من جوة حمراء زى الدم
الفيلية دة احسن سمكة تطلع ليك فيلية حلو هى القشر بياض او الوقار
البورى دة احلى سمك يتشوى ويتعمل صينية ويتعمل فسيخ خلى بالك عشان فى غش النوع الكويس منه البلدى ودة هتلاقى حجمة متوسط
الكابوريا هات الى لونها احمر لانى دة النتاية الى فيها لحم متجبش الزرقاء لانها فاضية
تعرف بقا ازاى الحاجة حلوة ولا لا من عنيها وريحتها
ولو عايز اقلك على اكلة سمك جمدة احلى من الكباب اقلك
طبعا فيه سمك مستورد وخصوصا الجمبري ومغرق السوق كمان وسعره رخيص اوي مقارنة بالمحلي
هو في الحقيقه انا معرفش افيدك اوي في معرفة المستورد من المحلي...
لكن لي اصحابي وبعض اقاربي تجار اسماك
وانا تحت امرك في اي وقت
شكرا جزيلا علي المعلومات المفيدة . (انا جُعت )
كنت عاوز اعرف لاني كنت في اسكندرية من فترة وبعد ما خلصت روحت حلقة السمك
وسمعت من الناس هناك ان السمك دة محلي و مش مستورد
وبعدين يفتحلي (بُق) السمكة ويقولي شايف زي الفل مالهاش ريحة .
فكنت عاوز اعرف افرق بينهم .
ياريت تفيدنا
لو ممكن تعرف لنا منهم معلومة مفيدة عن الفرق بين الاتنين
اكون شاكر لك .
السمكة الطازة بتكون متامسكة القوام بمعنى مش بيكون فيها طراوة و لما بتمسكها فى ايدك بتحس بيها ماسكة نفسها و العيون بتكون لامعة زى الخرز. أفضل السمك سمك البحر ألأحمر..يعنى لو رايح السويس السمك هناك أشكال و ألوان. و على سبيل المثال أسأل عن سمك الشعور ده من أجمل أسماك البحر ألأحمر و علطول متوفر عند بتوع السمك فى محيط البحر ألأحمر و سمكة حلوة جدا فى طعمها.
بالنسبة للجمبرى معظم اللى فى السوق من ألأحجام المتوسطة و الكبيرة من المستورد" ولا يعيبة على ألأطلاق" و فيه أنواع منه بتكون ممتازة. يعنى الجمبرى المستورد اللى بتجيبة مجمد فى علبة هايكون أفضل ميت مرة من اللى هاتشترية من عند بتاع السمك أغلى لأنك ببساطة مش هاتعرف الفرق لأن السماك ممكن يجيب المستورد و يحطة فى ميه يسيحة و يحطة قدامك على طاولة خشب و يقولك جمبرى قزاز سويسى لسه طالع من البحر و مستحيل تتعرف عليه كشخص عادى رايح يشترى . و المجمد فسه أنواع كتير (هندى-اكوادور-باكستانى- امارات) و كلهم كويسين . أنت بتسيبة لغاية لما يسيح خالص و بتشطفة كويس و بتفتحه من ضهرة تتطلع عرق الرملة بتاعة و تتبلة و بالهنا و الشفا لو كنت هاتشويه بيكون روعة فى الشوى.
السمك المستورد معظمه بيكون فيليهات , زى الباسا كده لو تفتكروه اللى تقريبا محدش بقى يشوفه فى اى سوبر ماركت
بس هو الى الان شغال زى النار و بيروح للفنادق و المطاعم الكبرى
السمك المستورد ممكن متعرفش تفرقه و متشغلش دماغك
طالما شايف السمكه كويسه كحاله عامه ظاهره و سعرها معقول , توكل على الله و كل و استمتع
انا معاك فى ان المستورد طعمه غير المحلى بس مش معنى كده انه وحش
احنا الى الان بنكره اللحمه السودانى مع ان مرعاها انضف 100 مره من مرعانا و لكن لاختلاف المرعى اختلف طعم اللحم
الجمبرى المستورد هتلاقيه رمادى او شكله مطين كده
الجمبرى القزاز هتلاقيه حجمه مش كبير اوى و ذيله بيكون ملون بالعرض الوان كتير
موضوع جامد اوي
وانا خلاص جعااان عايز سمك مشوي بوري او بلطي وياسلام بقي لو شبار والشربة سي فوود
احلى سمكة اكلتها هى الناجل اسأل عليها
مشكوريين ياشباب علي المعلومات المفيدة . وفي انتظار المزيد
المحلى لو هتجيبه من سوق زى سوق الجيزة بيكون
بطنه متماسكة مش طرية
النخاشين فيها دم
المستورد بيكون اغلبه مجمد ومش هتلاقى فيه الدم ده
والدم ممكن مش تلاقيه لو بتجيب من محل عادى لانه بيكون مضى فترة على صيده
جوعتونا يا ناس حرام عليكوا
احلى سمك فى البحر الاحمر
شعور ناجل فارس مرجان دول شغلا معاهم قلى وسنجارى وصينيه بالبطاطس وتعرف ازاى انهم طازه زى مالاخوه قالو والجمبرى اللى فى السوق90% منه مجممد والبياع بيفككه ويحطه على الطاوله فى شويه تلج ويقولك بلدى ولسه جايبينه من البحر عموما الجمبرى جميل مستورد او بلدى
وبالهنا والشفا
شوفوا بقى الخلاصة يا شباب
لايفتى والسويسى فى المدينة
============
مفيش سمك مستورد ومجمد غير سمك الماكريل وسمك المكرونةويقابلهم سمك الكسكمرى وسمك الحارت ودى من اسماك البحر الاحمر والسمك الفيلية برضه مستورد
افضل الاسماك على الاطلاق هى اسماك البحر الاحمر وهى غنية باليود والفسفور والمعادن واوميجا
منها الفاخرة
========
كاسماك الدنيس والمرجان والكشر والشعور وقشر البياض والوقار واللوت والحفارة والخرمان والزرقان والبربونى والبلاميطة والتونة والدراك والبورىو السهلية والقاروص والجمبرى السويسى القزاز والكابوريا النتايات وهى تكون ممتلئة لحما وبطارخ عن الذكور وكمان من الرخويات السوبيا والكليمارى ومن المحاريات اللوجز وقتال خاله والجندوفلى والسريديا والقوقع بانواعه واحجامه المختلفة والصرمباء المجفف والبوصر وغيرهم الكثير
ومنها الاسماك الشعبية
============
مثل الشخرم والكسكمرى المبروم والعريض والحارت والباغة والموزة والخنزيرة والرقد والقرش والصرع شبيه المرجان وموسى البحرى والسردين والسيوف والنقط ابن عم الحفارة والحداية والطوبارة بنت عم البورى ودى درجة تانية بعده
مفيش سويسى محترم ياكل البلطى او القراميط او سمك المزارع لانه يعيش على ذبالة محلات الفراخ والهرمونات
لتعرف السمك الطازة
=============
العيون لامعه وغير معتمة والجسم ممشوق متماسك
القشور متماسكة اذاكانت ذات قشور
الجسم فضى لامع اذا كانت بدون قشور
الخياشيم لونها احمر زاهى وليس قاتم او فاتح ولايوجد بها مخاط او رائحة غير مقبولة
الاسماك الكبيرة الحجم امسك السمكة من عند نهاية جسمها من عند الذيل واضغط عليه باصبعك
اذا ارتد الانضغاط وعاد جسم السمكة كما كان بعد رفع اصبعك فهى طازة
اذا لم يرتد الانضغاط او عاد ببطىء السمكة غير طازة
ارجو انا اكون افدت الجميع
اسمع ان اسعار السمك في السويس احسن من القاهرة
هل دة صحيح
بالمناسبة بقى.. أيه أحسن وأنضف مطاعم سمك في القاهره وعن تجربة؟!!
مفيش صور منكم ؟؟؟ بدل كل ما واحد حاطط الوصف التخيلى بدون صورة خلينا نشوف ونتبسط ونحلم بية حتى هههه
الكلام المفيد : السمك الطازة بييطفو عل ميه بعكس الفاسد
موضوع شيق جدا" يا جماعة
إتضح ان الموضوع كبير مش زى ما الواحد كان يروح عند البياع و يعبيله 2 كيلو اى حاجه و خلاص
فعلا" العلم نور" بالنون
جرب بردو سمك السيجان مقلى
ايوة انا داخل اسأل نفس السؤال
بالنسبة لى احسن مطعم دخلته لحد دلوقتى قدورة جامعة الدول
بس اسعاره غالية طبعا بالاضافة انه ما عجبنيش اوى في الجمبري
لو حد يعرف مطعم احسن من قدورة ويكون مجرب الاتنين او حتى زي قدورة بس ارخص يقول
بالمناسبة مطعم وادى النيل انا جربته من يومين اسعار نص قدورة بس بصراحة لا مجال للمقارنة ، حسيته تعبان جدا بالمقارنة بقدورة طبعا
اسف لتأخرى فى الرد
فعلا الاسعار فى السويس اقل
بس البائعين بيزودوا فى السعر لما يعرفوا ان الزبون موش سويسى
وفى الحالتين لازم تفاصل معاهم
وتاخد بالك وهو بيختار السمك عشان يوزن لانه احيانا بيخلط الغير طازج مع الطازجاو بيخلط الصغير مع الكبير اللى فى وش المعروض بالصندوق ودايما بيكون السمك ده من ناحيته هو واسفل مايعرض من السمك بوش الصندوق او مايسمى مراية العرض
والافضل طبعا انك تختار السمك بنفسك خاصة فى الاحجام الكبيرة مثل الشعور واللوت الخ وعلى فكرة يقوم بعض التجار بتتخزين وتجميد بعض الاسماك الفاخرة مثل الشعور ثم يعرضوه خلال شهور منع الصيد(فترة راحة حتى يتكاثر السمك) لزوار المدينة خلال شهور الصيف على انه طازج بعد تسييحه وباسعار مبالغ فيها
مع ملاحظة يوجد بعض الناس شغلتها تنظيف الاسماك بحلقة السمك وبخاصة الاسماك الكبيرة الحجم كالشعور بأجر تخللى بالك عندما تعطى الاسماك لتنظيفها وبالذات (الاحجام الكبيرة) لانه ممكن خلال التنظيف انه يقوم بسرقة البطارخ وكمان ممكن يقوم بقطع جزء من لحم جسم السمكة مع الراس ويرميها مع الفضلات وفى الواقع هو يحتفظ بها لنفسه ليأكلها ..ههههههه
لان السوايسة فى واقع الامر لاترمى هذه الرؤؤس و بتعمل عليها عليها شوربة سمك لذيذة
كنت هناك زيارة (السويس) وعديت علي ميناء الاتكة . بس اكتشفت اني كنت متاخر (كنت هناك علي 2 الظهر )
واما سألت عرفت ان الواحد يروح هناك الصبح بدري (8 او 9)
دة شكلة من جوة
http://s28.postimg.org/pycawmve5/image.jpg
فصبرت نفسي بكام بسكوتة ورجعت
http://s28.postimg.org/xd1mp0h9p/image.jpg
السلام عليكم ورحمة الله وبركاته
للاسف المعلومة دى غلط اخى الكريم
والعكس هو الصحيح
لان السمكة غير الطازة بيكون بدأ فيها عملية تحلل للانسجة
اى عملية تفسخ وبيتكون غازات نتيجة التحليل بين انسجة السمكة
فتطفو على السطح زى العوامة مثلا ههههههههه
لكن المقياس الاساسى هو شكل المظهر ولون ورائحة السمكة كما اوضحت سابقا
مع وافر احترامى لسيادتكم
ياسلام واضح ان حضرتك ذواقه و اكيل للسمك وخبير فيه
وشكلك كده واخد جنسية مزدوجة يعنى مصرى وسويسى هههههه
فعلا زى ماقلت حضرتك السيجان دوا العيان
بس عندك كمان شوربة سمك الرقد لذيذة وفاخرة الطعم( الشوربة البيضاْ اللى بالمستكة والحبهان) وهى كالسيجان خفيفة على المعدة
بس سمك السيجان طعمه الذ وهو مشوى لانه له طعم خاص مميز له دونا عن باقى الاسماك
بس يكون( عنبك ) يعنى سمين موش( راعى) يعنى بطنه مليان طحالب وده هو اللى بفرقع او بطنه تفتح خلال الشوى طبعا دى الفاظ سويسى تطلق على نوعية السمك
حضرتك تشرفنا وانا اقوم بالواجب معاك
بس احنا موش بنشترى السمك من ميناء الاتكه غالبا لانها خارج المدينة
ومعظمنا بيشتريه من حلقة السمك بسوق حى الاربعين وكمان فيه حلقة سمك تانية بسوق الجملة عند مزلقان المثلث اول طريق السويس اسماعلية الصحراوى.بس بدرجة اقل بكثير من حلقة الاربعين لانها فى وسط البلد
يعنى حضرتك لو نزلت لحلقة السمك دى راح تلاقى كل اللى يعجبك من الاسماك
من الصبح لغايةالرابعة او الخامسة مساء
وعلى فكرة موسم الصيد بيبدأ من نص سبتمبر لغاية شهر مارس تقريبا
وفيه ممكن تاكل احلى سمك لان الانواع بتكون كتيرة
بعد كده بيتم وقف الصيد رسميا عشان اتاحة الفرصة لتوالد الاسماك ونمو الزريعه الجديدة بالبحر
هو ده الكلام المتين ومشكور لكل من وضح وشرح وزود معلومة وسوال لو امكن :
كنت بشترى من فترة كبيرة من الاربعين وفعلا السمك هناك ممتاز وارخص شوية من القاهرة ولكن طازة جدا ومش عارف كان بيتضحك عليا ولا ايه :
هل السرومبيق بيتباع بالواحدة ولا بالكيلو ؟
السهلية هل سمكة بتاكل جمبرى بس واحسن حاجة لطبخها الصينية المشوى ولا الردة؟
سمك البغبعان يتقلى ولا يتقطع فيليه ؟
محدش يعرف بياع هناك عنده ضمير لاننى كنت بجيب من واحد هناك ومش عارف اخباره ايه (عم سليمان) الله يمسيه بالخير.
البغبغان "الصيادين بيسموه الحريد أو الحريت" وفيه منه كذا نوع و بيكون فيه منه أحجام كبيرة أحسن حاجة ليه أنه يتعمل فيليه و السمكة ديه لو شميت ريحة بطنها و هيا بتتنضف مش هاترضى تاكل منها:) لأنه بياكل كل حاجة و أى حاجة. بس لما بيتنضف و يتعمل فيليه و يتقلى بيبقى جميل جدا.
والله الواحد جاع
طاب لو الواحد حب ينزل يشتري من السويس هل من مساعد؟
والاسعار ايه؟؟
شكرا لكل اضافة بالموضوع .
معلومات كثيرة استفدنا منها .
زى ما قولت لحضرتك البغبغان فيه كذا نوع وأفضلهم اللى بيكون ألوانه فاتحة و الاغمق منه مابحبوش البغبغان بصفة عامة لحمة بيبقى أبيض ناصع و فى القلى لازم يتقطع شرايح ماتكونش تخينةو بتتبل عادى و بتحطها فى الدقيق و تخلى الزيت يسخن لأقصى درجة و قبل ما تحط شريحة السمك فى الطاسة بتكون مجهز طبق فيه شوية ميه عليهم نص ليمونة و تغمس الشريحة اللى عليها الدقيق لجزء من الثانية فى الميه بالليمون و على الطاسة السخنة علطول و تكون ايدك خفيفة علشان ماتسقطش الدقيق فى الميه. نفس الشيء لو بتقلى سبيط تعمل كدة و ده بيدى الحاجة اللى أنت بتقليها4 ميزات . ألأولى أنها مش بتشرب زيت و التانيه القرمشة اللى بتدى الشىء اللى بتقليه الطعم المميز و التالته أن الدقيق بيمسك على الحاجة اللى بتقليها زى فى حالة الكاليمارى و الميزة الرابعة نكهة الليمون فى الحاجة اللى بتقليها.