الموضوع: جبت لانسر شارك 2014 - عندي سؤالين

السلام عليكم،

أخيرا بعد فرك وتفكير كتير وأكثر من 120 كوب قهوة على مدار عدة أسابيع وداراسات جدوى وعرض أسعار ومليون إتصال هاتفي وبعد العزم على شراء داستر، النترا، سيراتو، كروز، فلوانس، ليون ثم التراجع لقيت إن الشارك الفئة الثانية هي أنسب عربية إجمالا مقابل المدفوع فيها، لكن جبتها الفئة الثالثة بـ 153 لأني لقيت الفئة الثالة مافهاش over price بعكس الفئات الأولى فأصبحت أجدى لأن فرق السعر بقى قريب، لو حد عايز يسأل على حاجه فيها أنا تحت أمره

سؤالي عن التوازن، وأنا راجع بها من المعرض كنت ماشي حوالي 90، لما أحود يمين سنّة وبعدين شمال بسرعه كدا كأني بأفادي شيء في حجم قالب طوب مثلا بأحس كأني قاطر مقطوره ورايا - بتعوم كدا من ورا شويه، مش عارف ده العادي واللا هواء العجل مش مظبوط مثلا واللا يمكن أنا مش متعود لأن التاره بتاعتها صغيره شويه ولسه ماتعودتش على العربية بشكل عام ولم أتَشّرب ذلك الاحساس الفيزيائي بتاع أبعاد و وزن العربية وارتفاعها والتحكم فيها وكدا؟!

سؤال تاني، هو المفروض ما أزودش عن 90 وما أقرصش عليها حتى صيانة ال 1000 وكدا؟ واللا دلوقتي العربيات بتنزل مليّنه وزيتها نضيف والخ؟ وإزاي أحافظ على الضمان؟ أروح مركز صيانة معتمد كل أد إيه واللا أعمل إيه؟ وعايز أركب إنذار وروافع أشتريهم من الوكيل واللا أشتريهم وأبقى أركبهم عنده واللا أشتريهم وأركبهم برّه عادي؟

انطباعاتي الإيجابية الأولى:
- موتورها رائع، حسّيت وأنا طالع كأني بأطلع بعربية مانويال، كل دوسة على سِنّة بنزين العربية بتتحرك معاها و رد فعلها وقتي - مغريه جدا للجري وصوتها جميل، والفرامل زي الفل، والعفشة وانا ماشي في الزحمة والشوارع المكسرة والمطبات الأداء حلو جدا وارتفاع العربية مافيش أعلى من كدا

- الصالون والشنطة واسعين والكراسي اللي قدام كبيرة طولا وعرضا ومريحة تحب تنام فيها، والتقفيل والخامات رائعين والألوان الداخلية كلها إسود+رمادي، لكن فيه تيمة ألوان تانية داخلية اللي بتكون لونها بيج+بني+رمادي شكلها مش حلو لأنها مش متناسقة مع الرمادي الثابت، فاسأل عن اللون الداخلي وانت بتشتري

- السماعات صوتها رائع للغاية

انطباعاتي السلبية الأولى:

- موضوع التوازن ده

- الـ USB مدفون في التابلوه مش عارف دافنينه الدفنه دي ليه

- طفّاية السجاير عبارة عن علبة محمولة متنقلة على شكل كوباية، اظن لما تكون مثّبتة في مكان كان يبقى أحسن

- اللون الأحمر للعدادات اللي في التابلوه بيبعت الواحد، كل شوية ألمح الضوء الأحمر وبعدما أبص ما الائيش مشكلة أفتكر إن هو لونه كدا

- المرايات الجانبية تكاد تكون مربعة، كان أفضل إنها تكون مستطيلة أكتر

- مشكلة طبعا إنها نفس الشكل من زماااان مش بيحسسك إنك "عصري" لكن نعمل إيه في أم السوق اللي كله يا إما عربيات بتتسرق في 3 ثواني يا إما عربيات بتغير لها الفتيس أكتر مابتغير لها تيل فرامل يا إما عربيات أسعارها مبالغ فيها مع سعر إعادة بيع سيء أو سيارات الفئات الأولى فيها اللي أسعارها مناسبة بتكون فاضية ومافهاش عوامل أمان والخ يا إما عربيات هي اللي بتركبك مش إنت اللي بتركبها وتقضي وقتك كله خايف وقلقان عليها وبتحسس عليها وناقص تركنها وتجيب كرسي تقعد جنبها تحرسها