تشجيع السياحة في (( الاسكندرية ))
مابين الهبل والجدية !!
مساء الخير جميعاً أبنائي وأحباببي ... وفلذات أكبادي كنت في أحد الزياراة لمدينتي المفضلة مدينة الاسكندرية من كم يوم ... وانا هناك لقيت زيططططة وزمبليطة ما انتوا عارفين الشعب الجميل بتعنا بيحب يزيططط ...
وعربيات رايحة وعربيات جية لا وأيه أسطول
طويل عريض من موتسيكلات هارلي
بصراحة أستعراض أستعراض
حتى الأتوبيسات يا راجل يا مؤمن
مزينها بالورود وأطفال صغيرين جمال يا خلاسي ماسكين علم مصر ومبسوطين ومزئططين
بصراحه ورغم الحر ... إلا إني وقفت أتفرج
وأقول يا عيني عليكي يا أسكندرية أيوة كدة ، أيه الحلاوة دي
بس ياترى في أيه !!
فسئلت مجموعة شباب كانوا بياكلو تيرمس على الكورنيش ويتفوا على الارض ... كابتين كابتين هو في أيه !
قالي ده مهرجان علشان ننشط السياحة .
أستغربت وقلت في سري طيب هو السياح بره مصر هيعرفوا منين أن في مهرجان جوه الاسكندرية ... ثم هو كده المهرجان بالنسبه لكم ... ده انا الي في القاهرة لو قعدة 100 سنة في القاهرة عمري ما هعرف ان في مهرجان في الاسكندرية دي خالص ! قلت يالله ربنا يوفقهم خلي الناس تهيصلها شوية وتفرفش أهو العيال تنبسطلها شوية ...
كل ده ومش هنا موضوعنا وانا مروح من الاسكندرية الى القاهرة ومع العلم أن 80% من السياحة في الاسكندرية معتمدة على سكان القاهرة العظمى وضواحيها ...وانا مروح في أمان الله يا راجل يا مؤمـــــــــــــــــــــن قعدت تالت ساعت ... والله العظيم وما بكدب بكلمة قلتها ولا بحرف واحد تالت ساعات يا راجل يا مؤمن علشان أعرف طريق الصحراوي فين !
من أول كارفور أسكندرية خليه على يمينك أمشي شوية هتلاقي مطب وبعديها تحويله بأتجاه المكس والعجمي وشاورع مكسرة وظلمة ومفيش يافطة واحدة بتقولك أنتا رايح فين ولا جي منين أمشي كده وخلاص مع السرب والقطيع .. (وأظاهر قفالين الطريق لسه جديد لأن كل الناس الي ماشيه مش عارفين رايحين فين ) والي يخش يمين وأيشي مكمل على طول وأيشي يخشلك شمال ... ده من كوميده الظروف لقيت ميكروباص بيهدي فشورتلو بقولوا ياسطة طريق القاهرة منين لقيتو قام مشوحلي وبيقلي هو انا ناقصك ده انا واقف علشان أسئلك ولقيتوا مشوحلي كده وماشي المهم لقيتوا وقف ميكربواص تاني يسئلوا فالظاهر قالو على تخريمه بين المصانع الحته الي عند الملحات معرفش اسمها دخلت وراه وتقلش داخلين في سبق .... والطريق مكسر ومعفر والدنيا ظلمة كحل ... عارف عربيتي دي شنيشت خلاص ... المهم فين وفين بعد ساعتين ونص لف في المنطقة الي هناك الي أول مره أشوفها في حياتي ولغايت دلوقتي معرفش أسمها أيه ... هو كان في مصنع هناك كبيررررر منور كده متعرفش بتاع بترول ولا بتاع تحلية ميه ولا أيه ... المهم قعدت ألف حولين نفسي الحلزونة يمه الحلزونة ... ولمن مسكت الطريق الصحراوي أخيراً بعد ما كفرت عن كل ذنوبي في هذا المكان ... وطلعت روح العربية مع روحي ... أه والله العظيم زي ما بقولك كده كان نفسي أصور منظر العربية تقولش عربية عبدالله با خشب وهو طالع من الرالي ... شنيششششششت
أول ما وصلت الطريق الصحراوي كان نفسي أركن على جنب أنزل أبوس الطريق والاسفلت وبالمرة أسجد سجدتين شكــر للمولى عزا وجل أنو أخيراً لقيت الطريق الصحراوي ... بس مع الاسف مفيش مكان تنزل فيه لأن طريق مصر اسكندرية الصحراوي الي قبل الكارته يا ساده فردة وحدة ... فردة رايح وفردة جي ....
بالصور أهي علشان محدش يقول إني بباااااااااالغ
وكلو كوم وعربية لادا كانت قدام مني ... كمل عليااا وطلع باقي نفس موجود في روحي وهو ماشيلي على سرعة 35 كيلو وانا مبقيتش عارف سرعة 35 كيلو دي أحط الفتيس على أنهي ناحيه يعني دي أخلي الفتيس على الاول ولا التاني ولا التالت ولا اسيب العربية ممورة ولا أخليها تمشي بلطف الرحمن ... وببركة دعى الوالدين !!
وبعد 3 ساعات أخيراً وصلت للكرته بتاعت الصحراوي ... الي وقفت عندها كمان نص ساعه ... ولحد دلوقتي معرفش أيه السبب الزحام عندها ...بس يحسسوك ان الناس كلها مهاجرة من الاسكندرية ورايحه مصر من كتر الزحمة الي ولا كأنك واقف على أيشارة ميدان التحرير ... طبعاً كل ده بخلاف الطريق الصحراوي الي كل ما تمشي شوية تلاقي مطبات وتحويلة وبياعين يوستفندي وبرتقان وأكشاك على الطريق ... ده حتى من كتر المطبات وانا ماشي في نص الصحراوي لقيت مطبات وأكشاك وبياعين فقلت أكيد في تحويلة ... الغريب لا لقيت تحويلة ولا نيلة بس الظاهر البياعين عمللهم كام مطب علشان يسترزقوا ههههههه .
المهم كل ده ماعليناااا انا عاوز أسئل سؤال لمحافظ الاسكندرية او الناس بتوع الاسكندرية الي عملين مهرجان وبيشجعوا السياحة ، وقاعدين يصقفوا ويترقصوا ويزغرطوا ... عاوز أقولهم سياحة أيه يا أستاذ أنتااااا وهو والطريق بتاعكم الي بيوصل الناس ليكم مقطوع ومتكسر وماشي فردة وحدة سياحة أيه !!!
ولا أنتوا متوقعين بتوع القاهرة هيجولكم طيران بالبرشوووت !
سياااااحة أأأأأأأأأأأأأأأأأأأأأأأأأ أأأأأأأأأأأأيه !!! مش قبل ما ترميني في بحورك مش كنت تعلمني العوم على رأي سيد ميكاوي ... وقبل ما تعملي مهرجان وتزغرط وتهيص ... روح يا حبيبي صلح طريقك علشان الناس تعرف تجيلك ... قال سياحة قال ... بجد أنا أتفقعت مرارتي في المشوار ده والي فقع مرارتي بجد وكمل عليا بتاع الادا الكحلي الي ماشيلي على سرعة 35 ده حسبي الله ونعم الوكيل فيه... يعني بجد شوفولكم صرفة فيه ... ده مينفعش يطلع على طريق أبدااااااااااااااااااً وخالص وبتاتاً ... بتاع الادا ده بالذات لو سبتوه هيدمرلكم السياحة في الاسكندرية لأنو فوق ماهو ماشي على سرعة 35 كيلو والعربيات وراه أممم ... لا وكمان بيفرمل كمان الأخ هههههه . ربنا ما يكتبها على حد أنو يخليه يمشي ورى بتاع الادا الكحلي ده يالهوووووووي ده انا كان هيجيلي السكر والضغط والمرارة + شلل رعاش رباعي وانا ماشي ورى بتاع الادا ولا عارف أطلع منو ولا حتى أخلص منو والي يجننك أن الي ورايا مش صابر وعمال يقلبلي في نور ويكلكسلي شتايم من ورى مني ماهو مش شايف ان في قدام مني بتاع لاد ماشي بيتمخطر و بيدلع قدام مني .
حســبي الله ونعم الوكيل
@@@@@
وأسف على الأطالة
وتحيـــاتي