الموضوع: بطارية العربية اتسرقت!!

العربية طبعا لادا و هى من الموديلات الغير مؤمنة من ناحية الشنطة و الكبوت زيها زى الفيات بأنواعه (القديم) و اللى بيتسرق دايما من الموديلات دى الاستبن و البطارية لصعوبة فتح كبوت و شنطة السيارات الحديثة علما بأنى قبل كدة اتاخد الاستبن الاصلى و مكنش اتحط على الارض الهى يتشلوا فى ايديهم
المهم كانت العربية راكنة تحت البيت على شارع رمسيس بس فى شارع جانبى بس المهم انها تحت البيت و لانى عادة بروح الشغل من غيرها العربية بتقعد بالاسبوع و ساعات اكتر مش بتطلع و مكنتش متغطية و كله من الكسل لانى الغطا بيخلى الحرامى ميحطش العربية المتغطية فى اول اهتماماته اسهل له اللى من غير غطا
العربية ليها حوالى 4 - 5 ايام واقفة و طبعا الحرامى اكيد مراقب الموقف المهم رجعت من الشغل قلت لما ادورها شوية بفتح السنتر مفتحش شكيت فى الريموت و فتحت بالمفتاح و اول حاجة عملتها دوست كلاكس مفيش كلاكس و دورت ملقتش اى مارش و لا عدادات اتحركت و قلت اكيد البطارية نامت خالص و شديت شداد الكبوت و المفروض الكبوت اول ما بفتح بيتنطر لفوق مسافة حوالى 5 سم لكن لقيت الكبوت مش بيفتح زى عادته فعرفت انى البطارية اتقلبت و فعلا اتاكد الخبر بعد فتح الكبوت بصعوبة و للاسف انى الكلام ده حصل و انا خلاص ببيع العربية و حضطر بعد ما كنت هقول للى هيشترى انى البطارية جديدة حقوله البطارية احتمال كبير تتغير قريب لانى مش هغشه و هقول على اللى فى العربية كله لان هشترى مستعمل انا كمان و نفسى اتعامل بنفس المعاملة و هحط سلسلة حوالين البطارية بقفل لحد ما يتم البيع بس بجد بقى شئ مقرف و مقزز لانى الشئ اللى اخد البطارية مش هيبيعها بتمنها و لا حتى بنص تمنها و حيلبسنى انا فى 150 او 200 جنيه على الاقل فى بطارية نص عمر عشان يغور فى داهية يجيب حتة حشيش و لا كام شريط كيميا و زفت من اللى بيطفحوه .
و اللى غايظنى انى العربية فيها انذار لكن واضح انى حساس الكبوت فيه مشكلة و الحمد لله على اد كدة بس لازم الحكومة تشوف حل فى قلة الامان دى!!