حد عنده معلومات عن رينو ٥

**eslam.maghawry** · 25-02-2014 06:32 PM

السلام عليكم ورحمة الله وبركاته

انا كنت عايز عربية صغيرة بجانب العربية الأساسية

وكنت شوفت الرينو بس معنديش أي معلومات عنها

كنت عايز اعرف بتنزل بكام سعة موتور

ثباتها على الطريق وعفشتها اخبارها ايه وحجم شنطتها

استهلاكها للبنزين وهل بتقبل بنزين ٨٠ ولا لأ

هل قطع غيارها متوفرة واسعارها إيه؟

وياريت متوسط أسعارها أن أمكن

وهل لو هدخلها مقارنة مع الفيات ١٢٧ والماروتي

أنهى أفضل من حيث اللي انا كاتبه

وجزاكم الله خيرا

**eng.salama93** · 25-02-2014 06:38 PM

لو هتدخلها ف مقارنه مع ال127 و الماروتي تكسب كعربية رخيصه و زي الماروتي تقريبا علي الطريق بس طبعا في اختلاف السعر لصالح الرينو
و اسعار قطع الغيار هتلاقيها ف رينج الماروتي و يمكن اقل بس الإختلاف انها معمره جدا ف الرينو
و الموتور بتاعها في منها ال 1300 سي سي و اعتقد في 1000 سي سي
و بيركبلها مواتير الرينو ال9 و الأوبتيما و انا شفت ناس مركباها قبل كدا و ناس عندها العربية 1000 سي سي و مكيفة كمان
و ثباتها ع الطريق يبقي لازم توطيها لانها عالية شوية و شنطتها ف حجم ال 127 كدا
و متوسط سعر العربية من 10 ل 20 و انتا طالع علي حسب الموديل يعني ام عشرين دي موديل اخر التمانينات و لحد 94 مثلا
و ام 10 دي اول التمانينات و طبعا علي حسب الحالة و لو ان في ناس معاهم موديل تسعينات و بيطلبوا فيها حاجة و تلاتين عشان حالتها

**eslam.maghawry** · 25-02-2014 06:59 PM

جزاك الله خيرا
بس هي قطع غيارها متوفرة ولا ظروفها إيه

**eslam.maghawry** · 25-02-2014 07:23 PM

واستهلاك البنزين وينفع يتحطلها بنزين ٨٠

**eng.salama93** · 25-02-2014 09:12 PM

قطع غيارها موجوده .. و طبعا تمشي ببنزين 80 و حلو اوي اوي اوي عليها

**janarad** · 25-02-2014 09:39 PM

الرينو 5 موتورها ناعم جدا و قطع غيارها معمرة و بينضحك عليها كمان ( يعنى بتقبل التعديل) .. بيركب لها قطع غيار بيجو ساعات و بتشتغل .. هى بس غيارتها ها تلخبطك فى الاول لان اللى صنعها شكله كان عامل دماغ ... عمل العربية الوحيدة اللى جر امامى و موتورها بالطول .. بس ها تتعود على غياراتها .. عربية عضمها ناشف و بتجرى و استهلاكها للبنزين حلو جدا .. قطع غيارها موجود فى القاهرة و بور سعيد و بيركب ليها بردو بعض قطع غيار الداتشيا و الصاج بتاع الداتشيا بردو

**eslam.maghawry** · 25-02-2014 11:50 PM

المشاركة الأصلية كتبت بواسطة janarad

الرينو 5 موتورها ناعم جدا و قطع غيارها معمرة و بينضحك عليها كمان ( يعنى بتقبل التعديل) .. بيركب لها قطع غيار بيجو ساعات و بتشتغل .. هى بس غيارتها ها تلخبطك فى الاول لان اللى صنعها شكله كان عامل دماغ ... عمل العربية الوحيدة اللى جر امامى و موتورها بالطول .. بس ها تتعود على غياراتها .. عربية عضمها ناشف و بتجرى و استهلاكها للبنزين حلو جدا .. قطع غيارها موجود فى القاهرة و بور سعيد و بيركب ليها بردو بعض قطع غيار الداتشيا و الصاج بتاع الداتشيا بردو

ماتورها بالطول دي حاجة كويسة ولا وحشة

والغيارات مختلفة ازاي
وجزاك الله خيرا على المعلومات

**janarad** · 25-02-2014 11:56 PM

العفو ... حكاية الموتور بالطول دى مشكلتها الوحيدة هى فى الغيارات علشان وضع الفتيس بيختلف طبعا ... لكن غير كدة هو زيه زى اى موتور عربية تانية .. الغيارات تيجى بالورب شوية عليك زى العلام دى " \ " و المرشدير بتاعها حرف اس على الشمال لتحت ... ها تتعود عليها ما تقلقلش .. بس بالاجمال هى عربية كويسة و حمالة اسية و واسعة من جوة .. كفاية انك راكب عربية صناعة فرنسى 100% .