الحمد لله اليوم كملت ال 1000 ك ورحت عملت الصيانه الاولى لى فى توكيل خدمه نيسان (الاتحاد الوطنى ) بطنطا

المكان جديد نقلوه فى حته اسمها شبرا النمله على طريق مصر اسكندريه الزراعى بعد طنطا ب 10 ك

العمليه خدت حوالى ساعه او ساعه ونصف

انا كنت بشتكى من قفله الباب الامامى كان يحتاج قفله جامده شويه وان كان اتحسن فى فتره التليين بقى افضل شويه لكن برده انا قلت لهم عليه وطلبت تفعيل الانذار

وبصراحه ماكانش فيه مشاكل عندى تانى غير كده فمالقتش حاجه اقولها لهم غير كده

المهم قعدت فى الاستراحه فوق لغايه لما خلصوا وكنت باتفرج عليهم من فوق وهم بيعملوا الصيانه

المكان جميل جدا والناس محترمين الصراحه واهتموا بكل حاجه قلتها وشفتهم وهم بيعملوا الباب من فوق وفضلوا يقفلوا ويفتحوا فيه لغايه لما اتظبط

المهم خلصلوا وندهوا لى استلم العربيه بعد مادفعت التكاليف وهى مبلغ 280 ج

قيمه الزيت وهم حطوا شل هيليكس بس انا طلبت ال 5000 ك لانى ناوى اغيره فى صيانه ال 5000 ب بالتخليقى ال 10000 وده على ماسمعت من الاعضاء انه افضل علشان ينزل الرواسب وكمان غيروا فلتر الزيت ونضفوا فلتر الهواء ونضفوا الموتور بفوم وادولى بقيه الزين فى جركن تقريبا 1 ك وزجاجه الفوم علشان لو حبيت اغسل الموتور فى مغسله

وجربولى الانذار قبل مااستلم العربيه وبعدين خلصت ومشيت

اول مشكله كانت مشكله قفله الباب الامامى بتاع السواق والحمد لله حلوها وبقى زى الفل بيقفل بمنتهى السلاسه كده مافيش عندى بقى اى مشاكل الحمد لله

وانا ماشى طبعا مروح حاسس العربيه فايقه وكويسه انا كنت بمشى زى الكتالوج مش بزود عن 90 ك لكن النهارده فتحت شويه ومشيت فى بعض الاوقتات على 120 ك

الثبات ماشاء الله جميل جدا لغايه كده لانى مازودتش عن ال 120

الفرامل جميله جدا جدا

التسارع كويس جدا رغم انى لسه فى فتره التليين ولسه فاضلى 600 ك على مااخلص التليين

لكن اثناء العوده بقى حصلت مشكله وقعت قلبى عند المطبات الصغيره دى كل مادوس فرامل اسمع خبطه وهبده كانها جايه من تحت

كررت العمليه لاقيتها تانى فقررت انى اتصل بيهم تانى وارجع لهم ولكن قلت اقف الاول واركن على الطريق اشوف ايه فوقفت وركنت وفتحت الشنطه لقين علبه الفوم واقعه من الكيس واتاريها هى اللى بتتحدف جوه الشنطه وتخبط فى المسند وتعمل الصوت ههههههههههههههههههههههههه ههههههههههههههههههههههههه هههههههههه

قمت حاططها فى الكيس وحاططها معايا جوه على الكرسى علشان اجرب تانى واشوف الصوت لقيت الصوت اختفى وراح اتاريها بنت المجنونه اللى كانت هتشككنى فى العربيه ههههههههههههههه المهم الحمد لله روحت بقى وحمدت ربنا ان مافيش حاجه والعربيه بسم الله ماشاء الله ممتازه حتى الان ولايوجد بها اى مشاكل معايا وربنا يديمها نعمه يارب ويحفظها من الزوال

كده انا خلصت تقريرى الحمد لله لكن ليكم عندى بقى مفاجاه لكل نيساناوى الشكل القديم اللى عربيته مش فيها موبلايزر ضد السرقه

فاكرين الموضوع ده

http://www.nilemotors.net/Nile/3875441973-post8.html

النهارده بقى وانا بتكلم مع المهندس عرفت منه انهم بيركبوا الجهاز ده فى التوكيل وجوا الضمان بتاع العربيه وشكر لى فيه جدا (مش الفلاشه) لا الجهاز التانى اللى فى الصورتين الاخار وهو جهاز او وحده فصل بيفصل الموتور وطلمه البنزين وبيشتغل بشفره داخل الجزء المدور فى الميداليه زى ماشرحته لكم قبل كده وانا قلت لكم ان زميل لى مركبه وانا شفته وجربته معاه فى عربيته اللانسر وكنت ناوى اركبه بس صرفت نظر علشان بيتم التعديل فى الضفيره وكده ممكن تخرج العربيه من الضمان لكن بعد ماعرفت ان بيتم تركيبه فى التوكيل بمعرفتهم قررت انى اركبه كمان كنوع من الامان الاضافى وتكلفه الجهاز وتركيبه فى التوكيل ب 450 ج

فحبيت اعرفكم علشان لو حد حب يركبه