الموضوع: ورشة هوندا الحديثة - مهندس توكيل سابق

انا مش عارف اعمل ايه اغير ماتور كامل بفتيسه بعفشته بكل حاجته ولا مجرد بلوك يصلح المشكله

اولا : كنت عاوز اسال حضرتك انا عندى ماتور 1800 cc gsr vtech وللاسف انا جلخت البلوك لانه قفع منى وبتاع وغيرت جوانات والحوار اللى حضرتك عارفه يعنى ايه تجليخ وتغيير جوانات موتور المهم المكنه بقت تمام وماشى بيها بس خلاص روحت اقيس كبس الموتور من اسبوع لاقيته رايح فداهيه يعنى مش نافع تانى وانا بصراحه المكنه ديه عاجبانى وبالمناسبه انا عربيتى 92 si وفتيس اوتوماتيك فا كنت عاوز اعرف لو غيرت بلوك بس ياترى انا بكده هاحيى الموتور تانى ولا برده مش هاينفع يعنى من غير ادوات التغذيه يعنى ولا اجيب مكنه واريح دماغى وفى النهايه بالنسبه للموضوع ده ياريت اعرف سعره هايكون كام واقدر اجيبه منين سواء شورت بلوك او بلوك او موتور كامل او موتور فاضى من غير فتيس يعنى او عفشه اسعارهم ايه ومنين اذا تكرمت

ثانيا : انا الفتيس زى ماقولت قبل كده اوتوماتيك اللى هو الفتيس الكبير وبرده حصلت فيه مشاكل وفكيته وصلحته وغيرت فى شوية حاجات كده بس المشكله لغاية دلوقتى بعد التصليح العربيه بتترعش على الاول يعنى مابتعرفش تأمرك بيها مثلا ولو وقفت فاشاره ولا حاجه لازم تكون رجلك دايسه على الفرامل شويه لغاية لما تسمع صوت الغيار الاول وده بياخد وقت من ثانيه ل 3 ثوانى ولو رفعت رجلك بدرى عن كده ينقل بس النقله وهيا بتيجى بيخلى العربيه تبرجل كده وتترعش وبعد كده بتمشى عادى مع العلم ان باقى الغيارات كلها تمام ( العربيه سحبها معايا مش قد كده )

ارجو الافاده وشكرا على الرد مقدما

السلام عليكم يا محمد باشا,
يمكن الحل على ايدك ان شاء الله أحسن انا فاضلي شوية واسيب العربية في اي حتة وامشي على رجلي احسن بقى.
شوف يا سيدي أنا عندي سيفيك 2005 vetc المشكلة اللي مجنناني في العربية عملية السحب العربية كانت تمام فجأة كدة من كام شهر السحب بقى صعب أوي والـ RPM بقى بيوصل لارقام عالية مع السحبة الاولى لما بحط Injector cleaner العربية بترجع زي الفل وكلها كام يوم كدة لما التفويلة تخلص ترجع تاني (أجيب منين فلوس للبتاع دة كل تفويلة).
الموضوع التاني ان فجأة وبدون اي مقدمات الدريكسيون ما بقاش معدول لازم الفه شمال شوية كدة عشان العربية تمشي عدل.
الحاجة التالتة كل ماة أغير لمض الفوانيس اللي قدام (العالي) تتحرق بعد كام يوم الاتنين.
لما رحت للميكانيكي بيقولي العربية ما فيهاش حاجة بس أنا عارف انها مش طبيعية أبداًز
الباقي بقى ان شاء الله حاجات خفيفة تتعمل..
.
ربنا يكرمك وشكراً مقدماً

شكرا لردك السريع يا استاذ سامح

السلام عليكم فى الاول
الموضوع
ان لما بلف يمين العربيه بتلف تمام
لما بلف شمال تحس ان العربيه مش بتلف تحس انها فى حاجه زنقها او بتتزق
المهم روحت للعفشجى معرفه
كشف وقلى كل حاجه تمام
بس كوتش البلن مقطوع وفى ورده رجبه فى الكبلن الشمال ديه تقريبا علشان يعوض الفرق فى طول الكبلن
يعنى انا اعمل ايه يا عم
قالى روح لبتاع زوايه هو عنده المقاسات هيزبطها
روحت للزوايا
كشف...... قلى محتاجه تترد 1.5 سم لقدام علشان تقريبا انت خت خبطه او بلاعه رحلت العجله
وديه محتاجه سمكرى وزرجينه
ايه رايكم فى الكلام ده

بقولك لحضرتك هوا مكان الورشه فين ؟؟؟؟؟؟؟
ولو الباشمهندس مردش
ياجماااااااااااعه حد يعرف ميكانيكى هوندا يكون شغله كويس وفاهم وحنين ويكون فى القاهره او الجيزه

ايـــــــــــــــــــــــ ــــــــــه اخر الاخبار --- تحت امركم

ازيك يا بشمهندس
لو سمحت أنا لسه شاري سيفيك 2008 بس لاحظت في الطلعة وخاصة الطلعة الأولى بسمع صوت تزييق ياترى دي عفشة ولا قاعدة موتور
السؤال التاني كيفية معرفة نقص مياة الراديتير وأية المياة الراديتير المفضلة
وجزاك الله كل خير