الموضوع: سؤال فى زيت الشنبر

المفروض إن زيت الشمبر بيتحط لما يبدأ يحصل تسريب في الضغط جوه السلندرات نتيجة التآكل في السلندر نفسه أو في حلقات البستم "الشنابر".. والزيت ده بيقولوا إنه بيمنع التسريب بشكل أو بآخر وتتم إضافته لكل غيار زيت.. وبيعتبروه علاج مؤقت لحد ما تعمل عمرة للموتور.

حقيقة زيت الشمبر إنه عبارة عن إضافات تضاف إلى زيت المحرك... اسمها بالإنجليزي "Oil Treatment" أو "علاج للزيت"

إضافات الزيت بشكل عام كان ليها لازمة زمان أيام ما كانت تكنولوجيا الزيوت لسه في أولها.. يعني بنتكلم على زمن من حوالي 50 سنة تقريبا

حاليا.. الزيوت الحديثة بتيجي ومضاف إليها عدد من الإضافات لتحسين الخواص التشغيلية

إضافات الزيوت اللي بتتباع في السوق هي نفسها الإضافات اللي في الزيوت

كده طبعا هيبقى الاستنتاج المبدئي يقول: "طيب دي حاجة كويسة جدا"

الحقيقة .. ﻷ

المشكلة إن الإضافات مش نوع واحد..يعني ما هياش مركب كيميائي واحد..
وكمان مش كل ماركات الزيوت بتستخدم إضافات زي بعض

المشكلة الكبيرة إنك ممكن تشتري إضافى زيت وتحطها مع زيت يكون فيه نوع إضافات تاني.. فيتفاعلوا مع بعض... وهنا ممكن تحصل أي حاجة من دول:

1- تأثير الإضافة اللي في الزيت يختفي وتأثير الإضافة اللي حضرتك حطيتها يختفي.. وكده تبقى حطيت زيت أساسي عمره قصير وما بيديش حماية للموتور

2- يتكون مركب جديد له آثار مختلفة ( عادة بتبقى وحشة ).. زي سدد في الفلتر أو مجاري الزيت أو حتى سدد في علبة البيئة.

3- زيادة نسبة الإضافات من نفس النوع.. وده في الحقيقة ما لوش أي تأثير إيجابي ﻹن الإضافات ليها نسبة تركيز بتدي فيها أعلى كفاءة.. واللي غالبا بتبقى موجودة أصلا في الزيت اللي حضرتك شاريه.


زي ما حضرتك شايف... زيت الشمبر بقى عبارة عن اشتغالة ومعلومات قديمة لسه الميكانيكية وارثينها من عصر تواجد الانجليز في مصر.



...