الموضوع: تجربه ولازم أحكيها لحبايبى الفليشياويه

تحياتى لحضراتكم جميعا
كنت حكيت قبل كده عن نقصان مية التبريد و عملت كل حاجه قبل ما اتهم جوان وش السلندر و اخر حاجه عملتها انى شيكت على الرادياتير ان كان فيه تلف ولا لأ, وهنا كان التقصير منى وانى أكتفيت بانى فكيت فقط قميص المروحه اللى راكب على الرادياتير و لما لاقيته سليم من الناحيه دى نويت انى خلاص أفك وش السلندر عشان أغير الجوان وقبل ما اعملها ربنا ألهمنى انى أشيك على الرادياتير تانى قبا ما افك الموتور, فكيت المره دى الرادياتير و فصلت كل التوصيلات, كهرباء و ميه و طلعته كتله واحده هو والمروحه, لاقيته متبههههههههههدل من الناحيه التانيه اللى هى جهة سربنتينة التكييف بس فرحت جدا مع انى لاقيته بايظ, و طيران روحت جبت واحد صينى ب 170 جنيه و وركبت عليه المروحه و ركبته و الحمد لله الميه خلاص مش بتنقص,
حاجه كمان صغيره خليتنى ألف حوالين نفسى, الحراره رفعت معايا شويه و كانت بتوصل 87 على غير العاده, تابعت حركة المروحه لاقيتها بتفصل و تشتغل بس مش بشكل عادى, كانت لما تشتغل تشتغل لفترة نص دقيقه و تفصل نفس المده تقريبا, روحت جايب حتة سلك و قفلت انا الدايره بيه من خلال فردتين السلك اللى راكبين فى ترموستات الرادياتير لمدة دقيقتين بس لاقيت الحراره نزلت ل 70, طيران ههههههههه روحت جبت ترموستات جديد ايطالى ب 25 جنيه و بدلته مكان القديم و جبته برده 68/82 و ماشاء الله الحراره سقفها عندى 80 و تنزل ل 70 مش اكتر من كده.

أنا تعمدت انى أطول عشان ما تبقاش مجرد سرد ولكن للافاده و تحياتى لحضراتكم مره تانيه