تقرير مبدئى عن رينو فلوانس فيس ليفت بعد 2000 كم: المميزات و العيوب

**Hany Saad** · 07-03-2014 09:51 AM

كملت امبارح 2000 كم بالفلوانس فيس ليفت و ده انطباع مبدئى عنها ....مفيش عربية كاملة لأن الكمال لله وحده و مبحبش الناس اللى بتدافع بإستماتة عن عربياتها و بيتغنوا بمميزاتها و ينسوا العيوب....انا هنا ببتدى بالعيوب علشان اى حد بيشترى يبقى فاهم هو بيجيب ايه.....
اولا العيوب من وجهة نظرى:
١- صوت مروحة التكييف واضح جداً داخل الكابينة و بتسمعه/بتحس بيه و هو بيفصل و يشتغل و خصوصاً لو العربية واقفة
٢- عداد البنزين الشرط اللى فيه مش بتبين المستوى المظبوط فى التنك....يعنى لما الشرط تبقى النص مش معنى كده ان التنك فى نصه لأ بيبقى فيه اكتر من نصه بكتير....انا هعمل قريب موضوع منفصل عن عداد البنزين
٣- الموتور فى الكبس صوته عالى و ده نتيجة الفتيس ال CVT و سير الكاتينه المعدن.....أول ما بتدوس و لو حاجة بسيطة ال RPM بينطلق لفوق و يعلى معاه صوت الموتور جامد و بعد الوصول للسرعة المطلوبة يرجع يهدى تانى

أشياء غيرتها أو لسه هغيرها تحت الضمان:
١- اول ما استلمت كان عندى مسطرة ال LED الشمال فيها لمبة مطفية و غيرت المسطرة كاملة تحت الضمان
٢- شاكك ان عندى اعراض اير باج كويل Airbag coil و هاروح اكشف بكره علشان يطلبوهالى

مميزات:
طبعاً اتكلمنا كتير فى الموضوع ده و لكن دول نقط للتأكيد بعد التجربة:
١- التكييف ممتاز و بيسقع فى ثوانى و أفضل بمراحل من الميجان سواء فى سرعة التسقيع او مستوى التسقيع نفسه....التجربة تمت عند حرارة خارجية 33 مئوية
٢- اتزان جيد جداً و الدريكسيون الكهربا بيبقى زى الحديد على السرعات
٣- استهلاك بنزين ممتاز....بعمل 750 كم منهم 550 كم على الصحراوى و 200 كم داخل القاهرة و الاسكندرية بمتوسط استهلاك 14.5 كم لكل لتر
٤- كراسى العربية جيدة جداً فى السفر و مريحة

طبعاً الكلام ده هيتغير بعد ال 3000 كم و لكن ده انطباع مبدئى عن السيارة بعد 2000 كم

**Silent~Dream** · 07-03-2014 10:53 AM

ربنا يباركلك فيها و يكفيك شرها التقرير جيد جدا تسلم ايدك

**miceg** · 07-03-2014 01:50 PM

صح كلامك يامستر هاني
المروحة صوتها عالي وبتاخد بالك منها لو قللتها من التكييف من المفتاح
موضوع علو صوت الموتور فهو ملحوظ وعلى أمل أن يختلف مع إختلاف الزيت ومع التليين الكافي للموتور
عداد البنزين ليه قياس واعتقد ان كل شرطة ليها قيمة معينه وليست متساوية
وأشك أيضا في كمبيوتر الرحلات انه لايعطي القيمة المستهلكة فعليااااا

أحب أضيف كمان شوية عيوب من وجهه نظري المتواضعه
فتحة الكونوسول التي بجوار السواق مربوطة بسوسته ولا تتمكن من إخراج شىء بألاسفل الا باستخدام إيدك إلاثنين
او يمكن اني اتعودت عليها فالصني وكنت بشيل النظارة فيها وبطلعها بإيد وحده
أماكن التخزين ليست كافية وكنت بفضل ان يكون في مكان للموبيل مثلا

بس مع المزايا الجميلة فالسيارة كل هذه العيوب لا تذكر
تحياتي العطرة

**Hany Saad** · 07-03-2014 04:19 PM

المشاركة الأصلية كتبت بواسطة Ahmad Bayomi

متفق مع كلامك، بس عايز اعرف ايه هوairbag oil

ال airbag coil او ملف ال ايرباج ده خاص بالايرباج اللى تحت الدريكسيون و هو عبارة عن شريط أسلاك طويل ملفوف و بيلف و يتفرد مع دوران الدريكسيون فى الاتجاهين و متصل بالايرباج
أعراض عطله هو سماع صوت تكه من الدريكسيون و انت بتلف عامله زى التكه اللى بتحصل لو ضارب اشارة و بتلف الدريكسيون فى نفس اتجاه الاشارة...صوت تكه واحدة و انت بتلف الدريكسيون جامد خصوصاً وقت الركن...طبعاً لو سبته الصوت بيزيد و بعدين بيتقطع السلك و يفصل الايرباج و الكروزكنترول و ينور لمبة الايرباج فى التابلوه و لكن دى اعراض متأخرة جداً لو ملحقتوش

طبعاً مشكلته عندى اعتقد انه كان مكلكع فى حته و هما بيلفوه عند المورد و مع الاستخدام ظهرت المشكلة

تغييرة سهل جداً لانه بيجى جزء واحد كبير و هو الجزء الخاص بالدراعات فى الدريكسيون...يعنى مجموعة الدراعات اللى تحت الدريكسيون بتتغير كجزء واحد و هو معاها

بكره ان شاء الله هروح اكشف و اشوف ايه الأخبار...اعتقد ممكن ميكونش موجود حاضر فى التوكيل و لكن هخليهم يطلبوهولى

**Hany Saad** · 07-03-2014 05:40 PM

المشاركة الأصلية كتبت بواسطة sofiman

انا كده بدأت اشك ان عندي مشكلة انا مع استهلاك البنزين ! كل الناس بتشكر في استهلاكها الا انا مش شايف كده!

متوسط استهلاكي بين جوا البلد و بين على محور التعمير مكتوب 11l و لما كنت مسافر القاهرة السرعة تقريبا 160 كان بيبقى 10.6l !

عمري ما شفت حتى رقم 12 .. ازاي بتجيب 14 طيب :d

فيه فرق سرعات سيدى الرئيس.....:)
يا باشا انا بمشى على سرعة 100 اغلب الوقت و انت ماشى على 160....
انا على الصحراوى بيكون المتوسط 15.5 كم لكل لتر
العربية دى سرعتها المثلى لتوفير البنزين هى 110 كم/ساعة

-

الموضوع: تقرير مبدئى عن رينو فلوانس فيس ليفت بعد 2000 كم: المميزات و العيوب

LinkBack

أدوات الموضوع

عرض

تقرير مبدئى عن رينو فلوانس فيس ليفت بعد 2000 كم: المميزات و العيوب - انشر الموضوع فى :

-

-

المواضيع المتشابهه

رينو فلوانس فيس ليفت 2014

سكودا فورمان 1994 ساعدوني في الشراء و ايه المميزات و العيوب واستهلاك بنزين

رينو فلوانس فيس ليفت...للفخامة عنوان: تقرير بالفيديو

أنا بفكر أشتري لينيا لكن عايز أعرف العيوب و المميزات

تقييم اللانوس S ( المميزات & العيوب )

الكلمات الدلالية لهذا الموضوع

المفضلات

المفضلات

ضوابط المشاركة