الموضوع: سؤال عن الاوبل استرا 2014 والجير بوكس

المشاركة الأصلية كتبت بواسطة hossam_elwani

متابع معاك بس شكوى من ناحية ايه

من فتره كده كنت بفكر اشتري الكروز وبدأت أسأل عن العربيه وسألت 3 من ملاكها وبعدها صرفت نظر عنها تماماً لان التلاته محدش شكر في العربيه و2 منهم اشتكوا من الجير بوكس

سألت واحد معانا في الشغل معاه العربيه موديل 2013 أول ما قلتلوا رايك في العربيه ايه قال لي أوعى أبعد عنها خالص دي عربية (.......) أنا من ساعة ما جبتها وعندي مشاكل في الجير بوكس وعملت 100 مشكله مع التوكيل لحد ما غيروه في الضمان والجديد طلع زي الزفت ومش فارق عن اللي قبله والعربيه لسه معدتش 30.000 كم.

ومراتي معاها واحده صاحبتها في الشغل معاها كروز 2013 بردوا سألتها عليها قالت لها لا بلاش العربيه مشاكلها كتير وخساره فيها الفلوس (بس للاسف مراتي مسألتش عن نوعية المشاكل)

التالت بقى كان واحد معاه العربيه كان واقف جنبي في الزحمه في الشارع سألتوا عليها واحنا واقفين مستنين الطريق يفتح قالي بصراحه العربيه مش قد كده وعندي مشاكل في الفتيس وساعات بيعلق ومبيرضاش ينقل وان الموضوع ده بيحصل له كل فتره والوكيل معملوش حاجه في الموضوع ده بس بصراحه أنا نسيت اساله هي موديل كام

بعد التلاته دول بطلت اسال لاني كنت قفلت وقلقت من العربيه لان التلاته أشتكوا و 2 من التلاته اللي ميعرفوش بعض اصلا كان عندهم مشكله جيربوكس
الله اعلم بقى يمكن تكون صدفه اني أقع في تلاته عنده مشاكل ومش مبسوطين بس ده اللي حصل فعلا بلا مبالغه وعشان كده أنا بسأل على جيربوكس الاسترا عشان انا عارف ان الكروز الجديده نفس الماتور بتاع الاسترا بس مش عارف بالنسبه للجيربوكس ايه النظام هو هو ولا مختلف

المشاركة الأصلية كتبت بواسطة abou-yahia

الفتايس 6 الغيار عموما عايزه طريقه تعامل مختلفه

يعني لازم تخف رجلك عن الدواسه وقت النقله

وتسوق شيفتات في الزحمه

انا لسه شايف رد حضرتك ده حالاً
شكراً طبعاً على اهتمامك وردك
بس معلش انا مش فاهم يعني ايه تسوق شيفتات في الزحمه ياريت لو تقدر توضحلي زياده
وبعدين اللي حضرتك بتقوله ده على اي فتيس 6 سرعات ولا على بتاع الكروز والاوبل بس