الموضوع: الرجوع بقرارى فى شراء فلوانس ونصيحه لكل مقبل لشراء رينو الابتعاد عنها

المشاركة الأصلية كتبت بواسطة meggieboy

طبعاً بنشكر حضرتك على تحذيرك و قرارك حضرتك حر طبعاً فيه و لكن مش شايف حضرتك أنك تحكم على توكيل أنه زفت و تحظر الناس منه و تحذرهم من شراء الرينو عامة بدون أن تجرب التوكيل شخصياً فيه شىء من التجنى و الحكم المسبق على الأمور
حضرتك بصيت للدكتور أحمد عثمان اللى أتنقلت عربيته لأسيوط بطريقة خاطئة و عنده مشكلة فيها على انه العموم و تجاهلت باقى أعضاء قسم رينو اللى معندهمش مشكلة مع التوكيل او مع العربية

السؤال هنا، طيب حضرتك تنصحنا بأنه عربية و أنه توكيل يكون أفضل من رينو؟
العضو المحترم hugan نصح بالسيراتو بس توكيل كيا و رينو نفس الشركة و فى نفس المكان، يبقى برده بلاش منه
حضرتك نازل من جيتا، نروح لفولكس بس أتوموتيف توكيل فى البلالا و الفتيس ال dsg ايدك و القبر
اوكتافيا نفس الفتيس و توكيل رايح
غبور لا تعليق
تويوتا العضو الوشاحى مقدم شكوى فيه
مين توكيل محترم فى مصر علشان كلنا نروحله اذا كان رينو زفت؟ نرجو الأفادة

شكرا لرد حضرتك وعلى فكره ومن كلام حضرتك عن العربيه وانت الاستاذ رامى خلانى افكر فيها رغم انها ما كانت فى حسبانى لانى ليا مشاكل مع الفرنساوى قبل كدا فا دا خلانى ابعد عن الفرنساوى وافضل الالمانى

بالنسبه للجيتا الى معايا والحمد لله خليجى موديل 2010 الفتيس القديم والحمد لله عمرها ما شافت توكيل فولكس الى سمعته سابقاه دايما

بالنسبه لموضوع الفولكس الدى اس جى اى حد يسالنى عن فولكس الجديد اقوله لا ما عادت تنفع العربيه دى بسبب الفتيس وانا فى حيره اصلا بسبب الحكايه دى ان مرسيدس وبى ام دبليو فى السما وقولكس عربياتها كلها دى اس جى فا انا بقيت محتار لانى بطبيعه تفكيرى بدور على وسائل الامان العاليه مع الاداء وبعد كدا الكماليات

ما للاسف ان كل توكيلات مصر كلها زى الزفت انا شارى كيا ريو 2013 خليجى وسيراتو 2011 بردو خليجى لان التوكيلات فى مصر كلها زى الزفت وغير كدا انا ليا واحد قريبى فاتح مركز صيانه بيجو ورينو وسيتروين لما كنت بردوح عنده كنت الاقى عربيات التوكيل باعتهالو عشان يصلحها بزمتكم دا مش كلام يحزن انا عجبتنى الفلوانس عن كلامكم بس لاسف انا تاريخى اسود مع الفرنساوى فا دى نقطه مقلقانى منه

فى حاجه تانيه انى بصيت على السيراتو الخليجى العربيه جميله جدا وعمليه بس للاسف لما جربتها ما ارتاحتش فيها فا شلتها من حساباتى لانى فى حيره من امرى ولو فضلت على الحال دا انا افضل انى اخلى الجيتا معايا سنه كمان او اتنين على ما السوق يتظبط وتظهر فيه حاجه جديده

وعلى فكره انا مش داخل عشان اشتم فى العربيه او انى من قسم تانى جاى احرق دم الناس لسمح الله انا بس لما قابلتنى بعض مواقف التوكيل وشكوى الناس فى عربيات الرينو دا خلانى قلقت ورجعت عن فكره الشراء نظرا للماضى الاسود مع بيجو 206 و 406 رغم من مميزات الفرنساوى فى الثبات والفرامل والمناورات الفجائيه والشكل الشيك والصالون الى اريح من اجدع انتاريه فى بيوت مصر

المشاركة الأصلية كتبت بواسطة noapology

مبدايا كده حضرتك جاي من جيتا وكنت بتفكر في فلوانس مش عارف ازاي المفروض الجيتا اعلي من الفلوانس ثانيا حضرتك سبت كل المواضيع اللي بتشكر في العربيه و جيت في مشكله فرديه علشان تحكم علي رينو ؟؟؟ او علي حسب كلامك الفرنساوي طب مكتبتش الموضوع ده مثلا في قسم بيجو ليه مش ده فرنساوي برضوا ؟؟؟ حضرتك بكلامك ده بتشوه سمعه الفلوانس مش التوكيل

انا مش حكايه تشويه سمعه عربيه او توكيل انا الفكره كلها انى قابلنى بالصدفه وانا بعمل بحث عن موقع رينو مصر بجروب على الفيس بوك بيعرض مشاكل لاصحاب عربيات رينو بكل انواعها ومنها الفلوانس وانا عارف انها ممكن تكون حالات فرديه بس انا بما انى تاريخى اسود وهباب مع الفرنساوى فا كدا اقلق منها وبالاخص من التوكيل بس العربيه نفسها محترمه وزى الفل والمشكله كمان مفيش منها خليجى كنت اشتريتها خليجى وريحت دماغى

المشاركة الأصلية كتبت بواسطة magd_c_c

يا باشا دى حرية شخصية
بس يا ريت ما تحكمش على العربية أو التوكيل أو الفرنساوى كله لمجرد سماع شكوى فردية
ما ينفعش
أمال أصحاب الجين تو و البرسونا يعملوا ايه مع التوكيل ؟
مع ان العربيات دى من أفضل السيارات فى فئتها ( هى دى العربيات اللى توكيلها فعلا ً مش على المستوى المطلوب )
لكن توكيل رينو بشهادة الجميع من أفضل التوكيلات فى مصر
و على العموم هى أزواق .....
بجد شدنى العنوان و لكن لما قريت البوست بتاع حضرتك بجد تحيزت للرينو أكتر و اكتر و على فكرة انا بجد بحاول اجمع فلوس و اشترى الفلوانس تحديدا ً لان كل زمايلى معاهم العربية و طايرين بها السما
وان ما قدرتش هاجيب 301 هايلاين يعنى باردوا فرنساوى !
هههههههههههه
يا باشا هى أزواق و راحات نفسية
و ربنا يوفقك فى اختيارك

ههههه طب والله كويس يا اخ ماجد انك بعد كلامى تصمم على شراء العربيه طب يا سيدى ربنا يرزقك ويفتح عليك وتركب الفلوانس التوب لاين اعلى حاجه

مع ان والله العربيه عجبانى وعربيه زى الفل وافضل من عربيات كتير فى السوق بس للاسف انا بخاف من الفرنساوى من التاريخ الاسود السابق فا الموضوع دا عاملى هسهس فى دماغى ولما لقيت جروب على الفيس بوك خلانى تراجعت عن الشراء من المشاكل الي فى العربيات ومع التوكيل هى دى وجهه نظرى

المشاركة الأصلية كتبت بواسطة ahmedelfeky

طيب وحضرتك تنصح بأي توكيل؟؟؟
في معلومه رفيعه كده ع الماشي انا معايا العربيه بقالها سنه والحمد لله مفيش حاجه اشتكيت منها اطلاقا غير انها اتخبطت ودي التوكيل مالوش دعوه بيها اكيد .الحاجه التانيه عندك مثلا فرع العبور مدير الفرع مهندس محمد عمر راجل قمه في الذوق والادب والتواضع لو عندك اي ملحوظه بيقف يتكلم معاك بصدر رحب ومابيسبكش الا ماتتحل

شكرا يا استاذ احمد على ردك وعلى كلامك دا وانك طمنتنى

وللاسف انا معنديش توكيل انصح بيه لان كله فى مصر ما شاء الله دون المستوى

المشاركة الأصلية كتبت بواسطة mostafa magdy

بعد تعاملي مع " artoc-auto " لأسكودا فانتازيا ..
ثم تويوتا ..
و أخيرا توكيل رينو .. في عربيه رينو فلوينس ..
رينو توكيل محترم .. و كانوا عايزين يرضوني بشتي الطرق ..
لكن طالما حضرتك قافل من الفرنسي من الاول و عندك ذكريات سيئه معاه .. يبقي معاك حق ..
كان عندي نفس المشكله في التويوتا ..
المهم تكون مرتاح حتي لو هتركب 128

شكرا لتفهمك يا استاذ مصطفى لكلامى وانت قولت بالظبط الي جوايا الفكره هنا انى عاوز انزل من الجيتا ومش عاوز اركب كورى او يابانى لانى بفضل الاوربى ولان عربيات فولكس الجديده كلها زى الزفت بسبب الفتيس بحاول انى ادور على بديل للجيتا يكون فى نفس الكفاءه ويكون السعر معقول يعنى انا حاليا مش عاوز ادفع اكتر من 200 الف بتمن عربيتى فى عربيه جديده فى مصر نظرا لاسباب مصر الامنيه والاقتصاديه الى معانا كلنا بنشتكى منها فا من كتر ما دورت فى المنتدى عن العربيات لقيت الفلوانس افصل حاجه حاليا بس المشكله كلها فى نفسيتى الى مقفوله من نحيه الفرنساوى وبحاول انى اعبد النظر فى الفرنساوى تانى

المشاركة الأصلية كتبت بواسطة miceg

مشكلة د أحمد عثمان هي مشكلة فردية
لسيارة سبيشيال اوردر الناس بتحجزلها 4 شهور
والدكتور أحمد لقاها وحد معرفته مدير مبيعات قاله عليها
والعربية كانت محجوزة لمستشار وكنسل حجزها
ود أحمد نزل وبص عليها واشتراها
واول مالاقي المشكلة عملهم الف مشكلة
والعربية المفروض جه كساح وسافر بيها القاهرة
وكلموه قالوله العربية يادكتور موضوع الا ار بي إم ده سوفتوير وإتحل
والزوايا نفس القصه اتحلت
ووعدوه لو العربية فيها مشكلة متخدهاش
بإذن الله هكلم د أحمد وأشوف الموضوع رسي على إيه
لكن ده لا يعيب رينو إطلاقاااااااا
اللي يعيب أي توكيل هو عجزه على حل مشاكله وعدم الاهتمام بخدمه مابعد البيع
وأؤكدلك ان ده مش موجود في رينو

شكرا لشرحك الموضوع وان حضرتك فهمتنى قصه الدكتور احمد وشكرا