الموضوع: شوفوا الشرطة عملت في عربيتي إيه أما سحبوها بالونش (صور)

السلام عليكم نبدأ :
كنت راكن عربيتي بجوار جامع المصطفى إللي في أول يوسف عباس بتقاطع مع صلاح سالم (مساء يوم الخميس) وعديت النفق عند عمارات العبور أجيب حاجة ورجعت بعد ربع ساعة ملقيتش العربية سألت الناس إللي كانت واقفة قالولي ونش المرور خدها فضلت طول الليل أدور عالعربية في الأقسام والمرورات لحد أما توصلت أخيرا إنها في مرور الدراسة , رحتلها هناك في يومها بليل متأخر صدمت أما لقيتها بالمنظر إللي إنتوا شايفينوا ده + إن الكراسي كانت متشالة من مكانها والعربية من جوه مكركبة من كتر التفتيش
طبعا سألتهم على سبب السحب قالولي إنهم إشتبهوا فيها وإللي يدحك إنهم كانوا كاتبين في المحضر انتظار في منتصف الطريق وتعطيل حركة المرور وإللي يدحك أكتر إنهم بعد إللي عملوه في العربية رصولي كم مخالفة وكانوا عايزيني أدفعهم كلهم عشان أستلم العربية لولا تدخل رئيس مباحث مرور القاهرة (عمل خاطر لإن أخويا ضابط جيش سابق) وقام بتخفيضها لمخالفة انتظار صف تاني وقاللي عشان يطلعها لازم عشان يملى الورق بأي مخالفة

والأضرار كالآتي :
1- فانوسين بإشارتهم
2- كبوت
3- إكصدام
4- سدر العربية
وحسبتها مع نفسي لقيت إن تكلفة الإصلاحات حتوصل ل 3 آلالف جنيه بالإضافة إلي إنها حتبقى راشة دواخل عشان حغير سدر العربية