استفسار زيت shell altra الفضى
غيرت امبارح زيت shell altra الفضى اللى ب 300 جنية فهل فعلا بيتغير كل 15000 كم ...... اللى قالى الكلام دة اللى غيرلى الزيت فى البنزينة هو شكلة فاهم وبياخد تمرين كل شهر فى فرع شل اللى فى المعادى .....بصراحة انا كنت ا ول مرة اعرف ان الزيت دة بيتغير كل 15000 ...... انا كنت بحط شل الاصفر ال 5000 واول ماالعربية عملت 100000 غيرت الزيت ال altra الفضى فهل فعلا الكلام دة مظبوط انه بيتغير كل 15000 ولا كل 10000...... واسف للاطالة....... شكرا
الزيت الإصطناعي في محرك عمره 100 ألف كم ..... خطأ
اقتباس:
المشاركة الأصلية كتبت بواسطة karvata
اوﻻ انا متشكر جدا على معلوماتك واهتمامك....... بس انا حاسس انا العربية ناعمت عن الاول ومش هقول سحبها بقى كويس بس هقول ان العربية فاقت واداءها اتحسن تحسن ملحوظ .... انا عارف ان لو فية تأثير سلبى او ضرر على الموتور زى مابتقول مش هيبان دلوقتى بس اكيد هيبقى فى مبشرات انا هحس بيها...... على العموم ربنا يستر ...... وشكرا مرة تانية على معلوماتك.
طبعا لازم تحس في الأول إن المحرك أنعم لأن الزيت الجديد أخف من الزيت القديم و ده هيخلي حركة البستم أسهل لأن الشنابر دلوقتي بتكسح زيت لزوجته أقل ، بس خلي بالك فيه احتمال كبير إن الزيت الجديد (شل ألترا) يتسرب من الشنبر و يدخل غرفة الإحتراق و ده هتعرفه على طول من الدخنة البيضاء سواء من قدام أو من ورا من الشكمان ، و كمان الأويلسيلات بعد 100 ألف كم بيحصل فيها تشققات بس مش بتسرب زيت لأنها مسدودة بالرواسب و الزيت المعدني القديم مفيهوش إضافات تنظيف عالية لكن الزيت الإصطناعي بالكامل بيكون فيه إضافات تنظيف عالية و ديه بقى اللي هتشيل الرواسب من جوة الشقوق و يبدأ تسريب الزيت يحدث ، و حاجات تانية كتير بتحصل و كلها بتأذي المحرك .
و هاخد على سبيل المثال جزء حيوي و من أهم أجزاء المحرك و هو "الكرانك" ، فدلوقتي الخلوص فيه وسعت لأن العربية عاملة 100 ألف كم فبيبقى محتاج زيت أتقل عشان يقوم بوظيفة التزييت صح و يملأ الفراغات كويس ، إنما الزيت الجديد مش هيعمل كده لأنه خفيف .
للأسف الشديد فيه احتمال كبير إن الزيت الجديد بعد مدة يقصف عمر المحرك ، و الأفضل إنك ترجع للزيت المعدني 15w-50 أيا كانت ماركته شل الأصفر أو غيره .
عموما لحد ما تاخد قرار بالرجوع للزيت المعدني ، لازم تتابع الزيت الحالي و معدل نقصانه كل 300 كم و تبص على الشكمان من ورا و العربية دايرة عشان تلاحظ فيه دخنة بيضاء و لا لأ .
تحياتي