تعالى نتفق على كام حاجة في الأول :
-1- زيت المحرك shell helix ultra هو زيت إصطناعي بالكامل (لا أحب لفظ تخليقي)
-2- زيت المحرك shell helix ultra هو زيت متعدد الدرجات فيما يخص اللزوجة و هي sae 5w-40
-3- زيت المحرك shell helix ultra له مستوى خدمة لمحركات البنزين api sn و هي الأعلى حتى الآن .
-4- مصنع السيارة ينص على معاد تغيير زيت المحرك صراحة في دليل التشغيل (الكتالوج) أو في دليل الخدمة (كتيب الصيانة الدورية) .
-5- الإاتزام بما جاء بدليل تشغيل السيارة هو الأصوب .
-6- معاد تغيير زيت المحرك بيكون بالمسافة أو المدة أيهما يحدث أولا .
-7- فيما يخص المدة فهناك مبدأ يعمل بيه أغلب المصنعين و هو أن زيت المحرك لا يمكث في السيارة أكثر من عام واحد يبدأ من يوم وضعه ، و هناك أنواع زيوت محركات عالية التقنية لمحركات معينة (غير موجودة في مصر) ينص مصنع السيارة حينها على مكوث الزيت لمدة عامين .
-8- فيما يخص المسافة القصوى اللي تمشيها السيارة على نفس الزيت فده بيختلف من سيارة لأخرى (حسب المصنع و تعليماته) و من ظروف قيادة لأخرى ( و ديه تشمل كل حاجة زي نمط القيادة و التراب اللي في الجو و حالة المحرك و البنزين المستخدم و حالة فلتر الهواء و حالة فلتر الزيت و غيرهم الكثير) .
-9- المسافة المنصوص عليها في الكتالوجات بتكون مشروطة بظروف معينة لتشغيل السيارة و هي تعتبر الظروف القياسية و غالبا بتكون ظروف رائعة و مريحة للسيارة .
-10- الكتالوج بينص على إنه في حالة ظروف الإستخدام القاسية للسيارة لازم المسافة المسموح للزيت يقعد فيها في السيارة تقل و بيشرح إيه هي ظروف القيادة الشاقة و القاسية ديه و إمتى يغير الزيت .
-11- لو المسافة القياسية 15000 كم في الظروف العادية الجميلة ، و إنت (على سبيل المثال) بتسوق عربيتك في ظروف القيادة القاسية يبقى المسافة ديه مش ليك و المسافة اللي هتخصك هتتحسب بطريقة أو بأخرى بس هتكون طبعا أقل و غالبا بتكون الحسبة السريعة هي ثلاثة أرباع المسافة القياسية ؛ يعني هتكون المسافة القصوى لزيت المحرك من النوع المذكور بالأعلى هي 11000 كم ( وخلي بالك من كلمة قصوى ، يعني عادي جدا إن الزيت ييجي عند 10000 كم أو 9000 كم و يبقى لازم يتغير و ده هتوضحه النقطة اللي جاية) .
-12- الفيصل دائما فيما يخص معاد تغيير زيت المحرك بالمسافة هو حالته بكل تفاصيلها (اللزوجة ، و درجة امتلائه بالرواسب و الشوائب و يدل عليها لونه ، و رائحته) وده بيتعمل بالكشف الظاهري .
-13- نمط القيادة و ظروف المناخ و نوع البنزين و جودته و نوع فلتر الهواء و جودته و حالة المحرك قبل كل شيئ هي اللي بيطلق عليها ظروف تشغيل السيارة و بتختلف من قاسية لشديدة القسوة لعادية لمريحة و هكذا .
-14- أما وضعك لزيت shell helix ultra في محرك عامل 100 ألف كيلومتر و كنت بتحطله زيت شل الأصفر اللي هو زيت معدني و درجة لزوجته على ما أتذكر sae 15w-50 ؛ فده موضوع تاني خالص ، لأن على حسب معلوماتي كده غلط و هيأذي حاجات كتير في المحرك .
أرجو إني اكون أفدتك ، و معلش دوشتك بكلامي الكتير .
تحياتي
المفضلات