السلام عليكم
انا مش عارف بصراحة إستفساري محله القسم ده ولا قسم تاني فمعلهش أعذروني
عموماً انا كنت مش بعرف أسوق غير الأتوماتيك وبعدين إتعلمت مانيوال من حوالي سنة ومن أول يوم في تعلم المانيوال إتعودت على 3 حاجات مش عارف صح ولا غلط .

1- مبعرفش أدوس فرامل إلا لما أدوس ديبرياج سواء كنت داخل على مطب أو على تقاطع أو إشارة أو ملف .. يعني لو بدوس فرامل لمجرد التهدئة البسيطة وهستمر على نفس الغيار أو للتهدئة الشديدة أو للتوقف ... وطبعاً في الغالب بسيب العربية على الغيار لحد ما تهدي وبعد كده أغير أو أمور على حسب .

2- لما أكون على الرابع مثلاً وأهدي السرعة وهنزل للتالت بنزل مباشرة من غير ما أمور غالباً وكذلك الحال من التاني للأول . طبعاً من الخامس للرابع ومن الرابع أو التالت للتاني غصب عني بعدي على المور وطبعاً بدوس دبرياج وفرملة علشان أهدي وأنزل بالغيار بعد ما أهدي (يعني غيار عكس).

3- في الزحمة وعلى الكباري لما يكون الطريق واقف في الغالب بكتف العربية بالدبرياج .. يعني نص كبس دبرياج وسنة بنزين .. علشان العربية متبطلش مني ..

هل الثلاث أشياء دي عادية مفيش منها ضرر ولا فيها ضرر ... ولو فيها ضرر إيه هي أضرار كل واحد منها .. وإزاي أكتشف الأضرار دي لأني بقالي سنة بسوق مانيوال وبعمل الحاجات دي بصفة مستمرة ...

وجزاكم الله خير