شوية مشاكل (نكشة واحدة) رجاء المساعدة

**maghool1** · 03-10-2008 04:01 PM

السلام عليكم وعيد سعيد على الجميع وكل سنة وأنتم طيبين

معلش هأزعجكوا شوية بحبة مشاكل بتواجهنى فى العربية بتاعتي السيينا موديل 2001

بداية أحب أنوه ان والدي بيركب العربية برضو وهو سواقته سيئة على الإطلاق ومفيش حاجة غلط مابيعملهاش بدون مبالغة وأتقد ان الحاجات دى نتيجة للظلم اللى واقع على العربية ويا رب أكون غلطان

أولا فى بعض الحاجات اللى ظهرت وماكنتش فيها بعد ما اشتريتها من فترة صغيرة
1- الفتيس بيعض جامد دلوقتى رغم انى كشفت ع الزيت وماكنش ناقص وباحس انه بقى سايب جدا وبتهز فى ايدي بسهولة فى أى غيار يعنى تقريبا الحارات بتاعته نعمت
2- العربية صوتا بقى عالى عن الأول بشكل ملحوظ مع العلم انى باستخدم بنزين 90 وكنت باحط 92 الأول وكمان الماسورة بتاعة الفايظ اللى طالعة من العمة مش متوصلة ومخرومة مش عارف ممكن يكون لها تأثير واللا لأ لأن فى ناس كتير بتقول انها مالهاش لازمة (طبعا رأيهم)
3- المساعدين بدأت احس انهم اخف
4- العربية بقى فيها رجة وبتسأف كتير خصوصا وهى محملة مع العلم انه صاحبها الاولانى كان مغيرلها اسطوانة دبرياج وديسك قبل ما يبيعها

أخيرا دى قائمة بالسلوكيات الغلط اللى اتعملت فى العربية مع والدى
1- بيفضضل دايس على الدبرياش طول ماهو ماشي تقريبا نص دوسة
2- بيقرص على الغيار بدرجة لا تتصور يعنى بيجيب 60 على التاني
3- ما بيشلش رجله من على البنزين نهائي حتى وهو بينقل
4- بيتخانق مع الفتيس دايما ولازم يقعد يهزه فى ايده شوية
5- أخيرا بيجري على المطبات ويتنطط على المطبات العالية ولا بيهمه العربية بتحف واللا لأ
واجات تانية كتير لا يتسع المجال لحصرها .. بس عايز أطمن بس هل الحاجات الغريبة اللى فى العربية دى منه واللا انا مبالغ شوية وكل دى بالايحاء فقط
شكرا للجميع

**human** · 03-10-2008 05:32 PM

أكيد اللى والدك بيعمله لبه علاقه وطيده
بس امانه عليك ماتزعلوش

**megoghanem** · 04-10-2008 12:16 PM

غريبة فعلا .. ياعم دا انت جايب كل حاجة غلط بتتعمل والنتيجة المنطقية بتاعتها
بس فعلا اوعى تزعله وأكيد هو اللى جايبلك العربية فبراحته بقى فلوسة وهو حر فيها المهم تكون سواقته آمنة بس بمعنى انه ما يتخفش عليه وبعد كده العربية تخفى .. طبعا السيد الوالد أهم وأغلى حاجة
وربنا يباركلك في والدك وفى العربية بس حاول تنصحه بأدب .. وعلى فكرة أنا معايا نفس الموديل بس الحمد لله كويسة

**جمال** · 04-10-2008 02:51 PM

العربية عاملة كام كم ؟؟ مهم جدا للحكم على حالة العربية
ليه بتحمل كل المشاكل على سواقة والدك ؟
هل انت طريقتك واسلوبك فى القيادة مثالى ؟؟؟

**Akram** · 05-10-2008 11:33 PM

المشاركة الأصلية كتبت بواسطة maghool1

1- الفتيس بيعض جامد دلوقتى رغم انى كشفت ع الزيت وماكنش ناقص وباحس انه بقى سايب جدا وبتهز فى ايدي بسهولة فى أى غيار يعنى تقريبا الحارات بتاعته نعمت

انا مش عارف نظام السيينا , لكن بيبقى فيه عصاية للفتيس أو ملعقة و دي لما تتربط أو بتتغير الموضوع ده بيختفي

المشاركة الأصلية كتبت بواسطة maghool1

2- العربية صوتا بقى عالى عن الأول بشكل ملحوظ مع العلم انى باستخدم بنزين 90 وكنت باحط 92 الأول وكمان الماسورة بتاعة الفايظ اللى طالعة من العمة مش متوصلة ومخرومة مش عارف ممكن يكون لها تأثير واللا لأ لأن فى ناس كتير بتقول انها مالهاش لازمة (طبعا رأيهم)

بالنسبة للبنزين لازم تستخدم البنزين المناسب طبقاً لنسبة الإنضغاط أو لما هو مكتوب في غطاء التنك ,
بس مش ده سبب الصوت العالي في رأي ,, هل يتم تغيير زيت الموتور في ميعاده و نسبة كبس الموتور كام , و رجاء تغيير الماسورة دي و فاتر الهواء لأن ده بيكتم الصوت شوية (في حالة ان حالة الموتور سليمة و مش خفيف) , فيه كمان بلية الدبرياج لو خشنة بتعمل صوت

المشاركة الأصلية كتبت بواسطة maghool1

3- المساعدين بدأت احس انهم اخف

جرب تشوف حالة المساعدين و ده انك تضغط كام مرة على المساعد و تسيبه فالعربية هتطلع و تنزل و تتطلع و تثبت , يبقى كده المساعد سليم و لو طلع و نزل اكتر من كده يبقى خفيف .

المشاركة الأصلية كتبت بواسطة maghool1

4- العربية بقى فيها رجة وبتسأف كتير خصوصا وهى محملة مع العلم انه صاحبها الاولانى كان مغيرلها اسطوانة دبرياج وديسك قبل ما يبيعها

التسقيف ده ممكن يكون ليه اكتر من سبب , ممكن مشكلة في الكهرباء , الرشاشات .