الموضوع: 3 مشاكل فى النيو سيراتو رجاء الإفادة

نفسى اساعدك بس الى معاه sx يساعدك اكثر علشان انا معيا مونيول
بس راى بلاش روكسى روح ابو رواش احسن واكشف على العربية هناك

شكرا لإهتمامك انا اتمنى بس لو حد قابل مشاكل مشابهة اعرف اتعامل معاها ازاى

بسم الله الرحمن الرحيم
بص حضرتك بالنسبة للمشكلة التانية اللى هى الرعشة فدى غالبا حاجة سهلة و عبيطة أوى و بتحصل فى كل العربيات و هى إن الرجلاش بتاع الموتور عايز يتشد شوية ... هو عبارة عن مسمار كدة صغير فى بكرة متوصلة بسلك ... السلك ده اللى متوصل بدواسة البنزين حتى حضرتك زى ما بتقول لما تيجى تشغل التكييف العربية ترعش ... لو بصيت على ال أر بى إم هتلاقيه نزل عن ال 1000 لفة و ده اللى يخلى العربية ترعش

بالنسبة للمشكلة الثالثة و هى ريحة التكييف فهى غالبا حاجة فى الفلتر ... ممكن يكون مش نضيف أو ممكن الريحة دى تكون مش من التكييف إنما من الهوايات ... لأن العربيات لما بتكون جديدة أول ما تيجى تشغل التكييف - الفريون بتاعها يعمل ريحة كدة غريبة لحد ما التكييف يبتدى يسقع ... و علشان كدة لازم حضرتك لو راكن العربية فى الشمس لازم تفتح الشباك الأول تخرج الهوا السخن من العربية علشان التكيف بتاع العربية يسقع أسرع و ميعملش روايح و ميبقاش جهد عليه

المشكلة الأولى دى غالبا تربيط عفشة أو من الفرامل على حسب بقى .... الصوت ده لو بيظهر لما حضرتك تدوس فرامل ممكن تكون الفرامل مبلولة أو عليها رطوبة أو فيها حاجة .... لو الصوت ده أكتر مع المطبات ممكن تكون حاجة فى العفشة محتاجة تربيط أو حاجة

المشاركة الأصلية كتبت بواسطة weekend

السلام عليكم يا شباب رجاء الافادة فى مجموعة مشاكل ظهرت معايا فى العربية بعد فترة من الاستعمال انا معايا sx مع سمارت كى موديل 2010 وكيل .... هى فئة كده نزلت فترة و مش هتنزل تانى ....المهم العربية عاملة حوالى 6000 كم بعد صيانة الاف تقريبا بدأت اسمع صوت مع حركة العربية مش مفهوم هو صوت تزييق كنت متخيل انو من جوا العربية لكن جربت كل حاجة لقيتو مش من جوا المهم الصوت ده بسمعه على كل السرعات و مع المطبات و فى الطريق السريع طول الوقت العربية بتزيق .... ما علينا المشكلة التانية ان فى رعشة خفيفة فى العربية مع اى استخدام للكهرباء يعنى لو بفتح التكيف او بلف الدريكسيون او بفتح الشباك او اللوك ... بتظهر كمان لما بكون واقف فى الاشارة يعنى واقف بالفرامل بس الفيتيس على d ....لما ارجع لل p الرعشة دى تروح تماما .... المهم رحت التوكيل فى روكسى ركب معايا مهندس اسمو مينا اقنع نفسو تماما ان العربية مفيهاش حاجة ... لا صوت ولا رعشة .... يا عم مفيش حد ركب معايا مشافش الكلام ده بنفسه ... كمان فى ريحه عجيبة من التكييف اول ما بيشتغل ... قاللى خلاص احنا نعمل كشف على الموتور و على التكييف و نربط عفشة عشان لو الصوت من العفشة و تعالى بعد 3 ساعات .... رحت فى المعاد العربية مغسولة وواقفة تمام مستنيانى ... التقرير العربية زى الفل ... العفشة تمام الموتور تمام التكيف تمام بس نضفو الفلتر عشان الريحة ... الخلاصة رجعت بيها لغاية المكتب فى ميدان هليوبوليس ... الصوت زى ما هو الرعشة زى ما هى و المفاجأة هى إن سحب العربية مع التكييف بقى شنيع .. لو شلت رجلى من البنزين العربية تقريبا بتقف .. ما علينا بحاول اقنع نفسى ان ده طبيعى بس بدأت احس انو زيادة شوية ... حتى ريحة التكييف زى ماهى ... رجاء الافادة لو حد قابل مشاكل مشابهة و أسف للإطالة

المشاركة الأصلية كتبت بواسطة a_tharwat

مش المفروض يبقة 750 ل 800؟

بالظبط بالظبط على 1 زى السيف