المشاركة الأصلية كتبت بواسطة mustafavet
انا عايش في بريزبن في كوينزلاند وتعتبر من افضل المدن هنا بعد سيدني وملبورن
انا حاليا بدرس وبشتغل في استراليا فجربت سوق العمل وفرص الدراسة
بالنسبة لفرص العمل تعتبر شبة معدومة ودا لان الاقتصاد هنا ف النازل بالاضافة لغلو الاسعار الرهيب
بدون مبالغة الحاجة في مصر اللي بتشتريها بجنية هنا ب 10 جنيه وكلامي هنا علي الاكل والبنزين ومصارف الكهرباء والنت وكل حاجة ممكن تستخدمها هنا
في المناطق الريفية ممكن يبقي الحال احسن شويه لكن مش زي ما ممكن تتخيلوا
اللي بيدور علي الدراسة بالخارج كمنحة فدا لازم يكون ليك انتاج علمي بمعني يكون ليك ابحاث منشورة في مجلات علمية معتمدة واعتقد ان دا ف مصر مقتصر علي الجامعه ومراكز البحوث
لكن لسه الفرصه قدامك - سجل دراسات عليا في مصر وانشرلك علي الاقل خالص بحثين وفي الحالة دي
هتبدا تعرف مين اللي ممكن تراسلة وتتكلم معاه كمشرفز لو وصلت للمرحلة دي واخدت موافقه مشرف من الخارج هتدرس في بعض الدول مجانا زي المانيا واليابان - ولو سافرت وعجبت المشرف في شغلك ممكن يجبلك منحة دراسية
ومنحة دراسية يعني بتدرس ببلاش زائد بتاخد مرتب كويس تعيش منه وتحوش كمان
طيب هل الالماني مهم او الياباني مثلا
الاجابة مهم بس مش لدرجة اني اضيع وقتي في دراستهم لان الانجليزي اهم بكتير
الالمان واليابانيين بيتعاملوا في الجامعات بتاعتهم بالانجليش ودا يفسرلك العدد الرهيب من اعضاء هيئة التدريس في مصر اللي بيسافروا للدول دي تحديدا
ليه استراليا لا
لان حضرتك نظام المعيشة هنا معقد جدا
علشان تشتغل هنا عامل في قهوة مثلا لازم يكون معاك علي الاقل شهادة في كيفيه اعداد القهوة - رخصة من حكومة الولاية بالعمل - شهادة طبية انك خالي من الامراض ----- ومع ذلك لن تضمنلك الحصول علي عمل
انا بقولك علي ابسط شغلانه
بالنسبالي انا طبيب بيطري ودكتور جامعي ورغم اني بدرس هنا دراسات عليا في مجال تخخصصي الا اني معرفتش اشتغل الا لما عملت معادله لتخصصي
ويعني ايه معادله - يعني مصارف قد تصل الي 10 الاف دولار علشان تدخل امتحان يا تنجح يا تسقط
ولو منجحتش مينفعش تدخل الامتحان تاني الا بعد سنتين
وعلي فكره دا النظام ف كل حاجه هنا
لو قدمت علي رخصة قيادة سيارة او مركب في النهر مثلا ورسبت ف مش هتقدم تاني الا بعد سنيتين ودا اللي حصل معايا
رغم اني كنت عفريت سواقة ف مصر - سقطت ف الاختبار هنا ومش مسموح ليا اني اسوق برخصة دولية الا 6 شهور
نظام الهجرة بصراحة لم اخوض التجربة دي علي الاطلاق ومش ناوي اهاجر
بس لو لقيت شغل هنا يكون علي الاقل براتب 30 الف دولار سنويا - هاجر لاستراليا
لكن اقل من كدا او تقول لنفسك ااجي وبعدين ادور يبقي اقطع تذكرة ذهاب وعودة افضل