اول طلب للمساغدة ... بخصوص ال301 .. برجاء الاهتمام

**mikemike** · 25-03-2014 05:09 AM

انا عضو جديد و بصراحة انا احب اشكركم اولا لاني استفدت كتير هنا

ادخل في الموضوع على طول ... انا حجزت 301 هاي لاين من التوكيل و ده بعد ما شوفت العربية و اقتنعت بيها تماما و بعد ما درست السوق و قارنت كذا عربية و اقتنعت بيها تماما كشكل و امكانيات بالنسبة لسعرها و قلت استني 3 شهور

و خلال متابعتي للمنتدي ابتديت اقلق بصراحة و حسيت اني ممكن بنفس ال 136 اجيب حاجة كسر الزيرو و انحصرت اختياراتي في الانترا 2012 او 2013 (من 125-140 الف على حسب الحالة ) او سيراتو الشكل الجديد 2014 ( بيز لاين اعتقد ) و دة لكذا سبب :

1- المشاكل اللي قريت عنها من الفتيس للعفشة للونة للبلوتوث الى اخره
2-سعر قطع الغيار
3-سعر اعادة البيع ( سمعت ان الزيرو بيخسر 10000 مجرد اترخص )
4-مش هستنى ال 3 شهوز
5-شكل الانترا و السيراتو الجديد عاجبني !!!!

مع العلم ان دي اول عربيه اركبها غير عربيه والدي و بصراحة مش عارف اعمل ايييييه ... خايف اندم

فرجاء ساعدوني و قولولي كدة بفكر صح و لا خليني في ال301 ... رايكم هيفرق كتير ف قراري

و اسف للاطالة

**Mohamed_Ayman** · 25-03-2014 06:43 AM

بص يا باشا ، هو أولا مفيش عيوب جوهرية فى العربية وده من تجارب الملاك.
السيراتو الجديدة جميلة جدا ، والسيراتو والالنترا هيكونوا افضل بس او قدامك عربية كسر زيرو حالتها جيدة جدا ودى مش حاجة سهلة خالص ويمكن تدور اكتر من 3 شهور انت وحظك بس بلاش تتسرع وتاخد حاجة مش تمام.

بالنسبة للنقاط اللى حضرتك ذكرتها:
1 زى ما قلت مفيش مشاكل جوهرية والسادة الملاك هيفدوك اكتر.
2 قطع الغيار الاستهلاكية اسعرها كويسة اللى غالى شوية الاجزاء الخارجية - ربنا يستر
3 سعر اعادة البيع الله اعلم بس طبعا اى عربية زيرو لما تنمر سعرها هيقل زى محضرتك قلت ده لو حد هيبيع اول م يرخص ومعتقدش ان حضرتك ناوى تبيع بالسرعة دى.
4 ، 5 عندك حق.

طيب نصيحتى انك تحجز بيجو ودور براحتك على سيراتو والينترا ولما تلاقى حاجة مناسبة الغى الحجز وتوكل على الله وربنا يهديك ويوفقك للانسب ليك. ده علشان لو مفيش حاجة كسر زيرو عجبتك فى مدة 3 شهور يبقى استفدت من الوقت وخت البيجو ، اما لو اتقفلت من 301 خلاص يبقى بلاش حجز اصلا.

ربنا معاك وبالتوفيق

**civilpharaoh** · 25-03-2014 06:48 AM

يا باشا متحيرش نفسك.انزل اي معرض و اركب العربيات الي انت بتقارن بينهم لازم تركبهم و تشوف هترتاح لمين اكتر .البيجو ممتازة كعربية و اسم و امكانيات بالنسبة لسعرها.انت بتتكلم في عوامل امان موجودة في البيزلاين زي فرامل abs,ebd ،٢ ايرباج مش موجودة في عربيات تانية الا في فئات اعلي.موضوع الانتظار ده بسبب الاقبال علي العربية كبير و دي حاجة مطمئنة.موضوع سعر اعادة البيع اعتقد انك في الطبيعي مش هتفكر في البيع قبل ٥ سنين مين عالم السوق هيبقي عامل ازاي و خد بالك العربية في انتشار،قطع الغيار مش غالية اوي ده حتي في حاجاتىارخص من الكوري مع العلم ان قطع غيار الاوروبي معمرة.المشاكل الي قابلت ملاك البيجو اعتقد بسيطة ولها حل بس في عيب الملاط اشتكوا منه هو ديزاين العربية من قدام تقريبا مفيش اكصدام فالكبوت بتسمع فيه اي خبطة من قدام مش عارف حلها ايه دي.بالنسبة للسيراتو و الالنترا اكيد عربيات محترمة بس معلش مش هعرف افيدك فيهم لاني مجربتهمش اكتر حد يفيدك فيهم اعضاء القسم بتاعهم.ربنا يوفقك للاختيار الصحيح

**abohend** · 25-03-2014 08:09 AM

اللي أنت فيه ده مش حيرة
ده أمر طبيعي و كان مطروح أمام جميع الملاك

ممكن أي واحد يتخلى عن فكرة الزيرو عشان يركب مستعمل كاتيجوري أعلى

أنا مثلا كان ممكن بال110 بتوع البيجو المانيوال أركب مازدا أو سيراتو أو إلنترا أوتو مستعمل

ده راجع ليك

في واحد بيحب يركب العربية 5-7 سنين ياخد خيرها و اول متفتح بقها... يبيع و يشتري زيرو تاني و يحط مبلغ بسيط و يركب الموديل الجديد و هكذا و هو بيحب يبقى أول يد و ميركبش ورا حد
وجهة نظر

و في واحد يحب يركب عربية أحلامه
هي في الأصل مش العربية المناسبة لإمكانياته لكن قدر يركبها عشان رجع بالموديل لورا
وجهة نظر

و في واحد بيخاف من الزيرو لأن خبطته بتزعل و يخاف أكتر لو الموديل جديد على السوق عشان لسه لم يختبر
وجهة نظر

و في واحد العربية بالنسبة له فلوس مجمدة ممكن يبيعها في أي وقت عشان يفك زنقة...فبيختار عربية ماسكة سعر (بومة-فيرنا-كورولا-...)

دي مش حيرة..ده قرار من البداية

الحيرة لو أنت قدامك عربية نضيفة أوي و حالتها أنت ضامنها و ده اللي خلاك تغير قرارك
تحياتي

**حسن جاد حسن** · 25-03-2014 10:12 AM

والله يا جماعة العربية دي عليها كم من الكلام غير طبيعي ونفسي اعرف ليه ونفسنا في معلومات دقيقة وليس وجهات نظر وبالنسبة لموضوع الشبكة الضعيفة دي يا ريت تفيدونا بحل لها ....وجزاكم الله خيرا

**J A G U A R** · 25-03-2014 02:22 PM

انا رأيي لو قدامك سيراتو او النترا كسر زيرو ومضمونه وحضرتك عارف اللى فيها يبقى توكل على الله غير كده خليك فى حجزك ..

**J A G U A R** · 25-03-2014 05:35 PM

المشاركة الأصلية كتبت بواسطة mikemike

شكرا ليكو كلكو يا جماعة انا شايف الاتجأه الاكبر رايح ناحية نفس اﻷي كنت بفكر فيه ...

بس كان عندي استفسار .. ايه هي مواصفات كسر الزيرو زي الكتاب ما بيقول .. يعني ايه المواصفات اﻷي اقدر اقول دي لقطة او اقول العربية دي متهانة ؟؟؟

عدادها يكون قليل ويكون حاله الدهان زى الزيرو ومش مخبوطه ولا محكوكه والصالون والكراسى طبعا تكون بحالتها يعنى من الاخر كده تعتبر زيرو بس الاستعمال مأثرش عليها بحاجه .

**abohend** · 25-03-2014 06:29 PM

المشاركة الأصلية كتبت بواسطة tifa2015

انا كنت فى حيرتك وحجزت البيجو وفضلت ادور براحتى وفى الاخر لغيت الحجز ولسه جايب لانسر شارك اول فئة بنفس المبلغ وربنا يعملك اللى فيه الخير ومش معنى كده ان البيجو وحشه بالعكس انا شايفها عربية ممتازة بس زى ما قالك الاستاذابو هند شوف حضرتك محتاج ايه

مبروك عليك الشارك
ربنا يبارك لك فيها و يجعلها لك عوناً على طاعته
عربية محترمة و مقنعة جداً

تقريرك فين يا جميل..؟؟