أنا ليا عشرات التجارب في البيع والشراء من مواقع مختلفة منها سوق دوت كوم وأمازون
سوق دوت كوم محتاج تشتري حاجة تكون معروفة مش مبهمة ، يعني أنا اشتريت سامسونج جالاكسي تاب 3 16 جيجا مكنش لسة منتشر في مصر كان الموجود 8 جيجا بس وكان سعره في الموقع تقريبا نفس سعر ال8 جيجا ووصلني في المعاد ومفيهوش أي مشكلة وكانت تجربة ناجحة بصراحة
لكن اشتريت قبل كده بعض المنتجات الصينية الرديئة زي حامل الصابون السنسور اللي تحط إيدك تحته ينزل الصابون من غير ما تدوس على أي حاجة بس طبعا كان فاشل وبايظ لأنه منتج صيني رديء ورخيص ومش منتشر علشان أقدر أحكم عليه
لكن في الجملة التجربة كانت إيجابية ويفضل تشتري الحاجة اللي الموقع نفسه عارضها مش تجار بيبيعوا على الموقع لأنهم لازم بيزودوا في سعر الحاجة عن السوق علشان هما كدا كدا بيدفعوا عمولة 5% للموقع فطبعا هيحملوك انت العمولة دي زائد إن الحاجة مش مضمونة لأن مفيش رقابة عليها من الموقع كل ما هنالك إنك لو اكتشفت انها بايظة أو غير مطابقة للمواصفات بتعمل طلب استرجاع وده حلني بقى على ما المندوب يروحلك تاني وياخدها ويرجعها للبائع والبائع يتكرم ويحول الفلوس للموقع والموقع يتكرم ويحطلك الفلوس في حسابك !
أما أمازون فاشتريت بعض اكسسوارات للموبايل النوت 3 أول ما نزل ومكنش لسة في اكسسوارات ليه حتى لزقة الشاشة دوخت عليها في أكبر المحلات وملقيتهاش ! فاشتريت من أمازون لزقة شاشة وجراب وقاعدة شحن وبعض الحاجات الصغيرة وشحنتهم على عنوان صديق ليا مقيم بأمريكا وجابهملي وهو راجع والحاجة وصلته في المعاد مظبوط وسعرها ممتاز وجودتها رائعة وقمة في الانضباط بصراحة