الموضوع: إيه علامات البطارية اللي بتودع

البطارية عندي بقالها 3 سنين، عايز أعرف إيه العلامات اللي أعرف منها إن البطارية أوشكت على نهاية عمرها الافتراضي

هل فيه أعراض في تدوير العربية، في صوت العربية، في رجرجة، في أي حاجة؟

ولا هيا لما بتفصل، بتفصل مرة واحدة من غير أعراض؟

لو جافة وفيها مؤشر بيان هيبقى على اللون الابيض وطبعا لو سبت العربية تلات ايام العربية تدور بالعافية
وتلاقى البطارية متضخمة شوية (منفوخة زي بطارية الموبايل)

لو سايلة غالبا هيضرب فيها ربع والعربية هتعاكسك كتير في الدوارة وتعرف ان فيها ربع لما تفك وتبص عليها اثناء ما بتدور المارش تلاقى الربع اللى فيه المشكلة المية بتفور فيه

في اعراض تانية بس مش كل الناس بتحسها لما تلاقى ان العربية سحبها قليل على طول (الدينامو على طول محمل على الموتور عشان يشحن البطارية ) واستهلاك بنزين عالى شوية و اضاءة العربية تضعف مع النور العالى او فتح الازاز بالكهربا او استعمال الكلاكس مثلا

برضه تلاحظها لما اقل استعمال للكاسيت والعربية مبطلة يفضى الشحنة او يخلى الدوارة معتلة شوية

بالظبط وهتعاكس فالدوارة والنور يضعف
خصوصا لو بليل ومشغل كذا حاجة
ولوسبتها كذا يوم ممكن تنام

عادة هووووووووووووب تقع مرة واحده بدون مقدمات
انت ونصيبك

[QUOTE=ahmedfathi;3875536999]مش هيلحق ينام ويصحى
انا كانت شغاله زى الفل عندى طول اليوم وانا مروح من الشغل دورت العربيه دارت زى الفل مفيش حاجه خالص وفى نص الطريق وقفت جنب كشك اشترى ميه وحاجه ساقعه وكده

وجيت ادور العربيه حلفت انه ما تدور وكان يوم ما يعلم بيه الا ربنا وما دارتش الا بوصله من سواق تاكسى وبدل ما كنت هاطلع ع البيت طلعت ع التوكيل عشان اتاكد انها بطاريه لانى كنت لسه فى الضمان ومن التوكيل طلعت ع البنك عشان اسحب فلوس من المكنه لانى مكنش معايا فلوس فى المحفظه كفايه
ومن البنك طلعت على محل بطاريات وروحت البيت الساعه 9 بالليل فى اليوم ده خلصان[/QUOTE
نفس الي حصل معايا النهاردة بالظبط دورت العربية وروحت بيها مشوارين وفي التالت جيت ادورها حلفت ماهي شغاله بالصدفة كنت جمب ميكانيكي شافها قال بطارية. ودورها لي ومشيت طلعت علي كهربائي قال بطارية برضه طلعت اشتريت بطارية وركبتها بس الحمد لله كل ده في ساعتين