السلام عليكم

انا عارف انها هوندا مش سيات بس انتو اصحابى ومعرفشى غيركو عشان كده مضطر اعمل الموضوع هنا
عربيى هوندا اكورد 90 2.2 سى سى 16 صمام شاريها من فتره ومعكوكه عكه هباب وفى بدايه تظبيطها واحده واحده
اولا العربيه كانت فيها مشاكل فى الدواره وانا كنت رحت مركز الصفا بتاع الكربراتير عشان اظبطها بس اتضح ان المانفولد اللى راكب شكله مختلف وفى فتحات بتدخل هوا على دوره الحريق وعلى ذلك العربيه بتبطل وبتستهلك بنزين كتير وريحيتها وحشه :)
المهم كان عندى المانفولد الانجيكشن اللى هو بيركب على وش السلندر مظبوط واخدت المانفولد الكربراتير وطلعت على الحرفيين لفيت على مانفولد يكون نفس شكل الانجيكشن بس راكب عليه كربراتير لانى مينفعشى اركب انجيكشن عشان لازم كنترول وبوابه وضفيره ورشاشات واسبراتير يعنى بتاع 3 الى4 الاف جنيه استغلال بقى
المهم ملقيتشى وكل اللى لقيته انجيكشن زى اللى معايا طلعت على الخراط اللى هناك قلتله عايز ده(الكربراتير) يبقى زى ده (الانجيكشن) من المكان اللى هيربط مع وش السلندر قاللى بسيطه وبعتنى افصل جوانات على الشكل اللى انا عايزه وقالى هاخد 350 جنيه وهياخد ساعتين المهم استلمت الوش وركبته والعربيه ظبطت جدا بس ناقص اظبط الكربراتير على الوضع الجديد المهم ان العربيه بمشى بيها وبعمل مسافات طويله يوميا بدون مشاكل بس استهلاك البنزين عالى شويه ولازم اسخن عشان اعرف امشى لانها اوتوماتيك
بالنسبه بقى للترموستات
العربيه كانت مروحه التبريد شغاله على طول يعنى مع الكونتكت وطبعا كان فى جهد على الدينامو وبحس ان النور بيبقى ضعيف على السلانسيه بس مش فى كل وقت بس طبعا ده عك وكان لازم يتظبط
نزلت اشتريت ترموستات حراره يابانى ب185 جنيه من الدقى ولان العربيه كان راكبلها كتاوت خارجى واخد من البطاريه على طول وسلك اشاره تشغيله كانت مع الكونتاكت قلت انا هعدل بس فيها واخلى الاشاره من الترموستات بس الكهربا من البطاريه عشان لما اقفل كونتاكت تفضل شغاله نفس النظام اللى فى الابيزا بس للاسف منفعشى لان الترموستات مكانه على كوعه المياه مش فى الردياتير ومعنى كده انى لو بطلت الدوره هتقف والتمروستات هيفضل قافل لحد ما الميه اللى فى الكوعه تبرد لوحدها رحت رجعت للنظام القديم
المهم وانا بلعب عند علبه الفيوزات لقيت الكتاوت الاصلى شغال وواخد كهربته تمام وبيدى للمروحه على فيشيتها الاصليه ناقص بس الاقى سلك الترموستات بس للاسف فيشته مقطوعه ومش ظاهر اسلاكها رحت عامل سلك من الكونتاكت وعديته على الترموستات عشان لما الترموستات يقفل يدى اشاره للكتاوت تقفل بشرط ان العربيه يكون الكونتكت بتاعها مفتوح
ونجحت الفكره ودورت عشان اتاكد ان كله تمام المهم العربيه سخنت بس الكتاوت مقفلشى والميه غليت رحت مبطل بسرعه لقيت المروحه اشتغلت رحت مدور راحت فصلت رحت انا لفيت حوالين نفسى يعنى ايه اللى بيحصل ده قيست الكهربه وانا مدور لقيتها تمام لكن الارضى بيفصل لما بدور ويرجع يشتغل لما ابطل واسيب الكونتاكت مفتوح رحت واخدلها ارضى خارجى راحت اشتغلت تمام المهم شيلت الارضى الخارجى عشان اربطه كويس لقيت المروحه لسه شغاله وقفت جنبها شويه راحت فصلت كل ده والعربيه دايره رحت استنيت تانى راحت المروحه اشتغلت رحت عزلت سلك الارضى وخليته احتياطى لحسن تكون العربيه بتشتغلنى وطلعت اجرب وكان الاتى
المروجه بتشتغل وتفصل بشكل طبيعى عند درجه الحراره المظبوطه فى النص
التعليقه محصلتى لمده ثلالث ايام فى وقت حر بمعدل انها بتشتغل كل 5 دقايق فى الزحمه
لما الجو برد بالليل وجريت بها الحراره منزلتى مع ان ترموستات الكوعه متشال بس قبل كده والمروحه شغاله على طول كان برضه مبينزلشى تقريبا المواتير الكبيره بتوصل الدوره لدرجه الحراره بتاعه التشغيل ومهما عملت مبتزلشى عنها الا لو سبتها تبرد
مروحه التكييف الداخليه فصلت لوحدها ولسه ملقيتشى السبب لحد دلوقتى
وافوتكم بعافيه