الموضوع: موضوع هام جدا جدا جدا عن الشارك

انا قرأت بعض المشاركات لبعض الاعضاء واللى مش عجبنى بصراحة ان ساعات فى اعضاء بتقول رأيها فى اختيار اى شىء يخص السيارة ولكن مع اعتبار الاذواق الاخرى سيئة وده غلط لانا فى الاخر دى اذواق واراء فيا ربت اللى يكتب عن حاجته يكتب عن حاجته وبس .

يعنى مثلا انا لقيت ناس عمالة تتكلم عن الفرش العربية البيج فى السيارة الشارك وأحد الاعضاء قال انه تحفة والاسود كئيب قوى عليها علشان كده اختار البيج .. طيب هو ممكن يقول البيج حلو ومش لازم يقول الاسود كئيب علشان اللى زى انا وغيرنا واللى عندهم الاسود مش يكتئبوا اصلا

وبعدين دى مسألة أذواق تخنلف من شخص لاخر وساعات بتبقى اجبار ..يعنى انا مثلا معايا الفئة الثالثة موديل 2012 واللى جبتها فى العرض كانت ب_134 الف جنيه واللى فيها الفوجات والجنوط والابنوس والمخادع الخلفية والكونسول وحاجات تانية كتير بس المعرض قالى ساعتها ان البيج بينزل فى الهاى لاين فقط والحمد لله رضيت بالاسود واقتنعت بيه جدا .. ده انا كان عندى بومة قبلها وكنت جايبها زيرو وكانت بيج من جوا بقيت اقول لا الاسود افضل بعد ما استعملته وده مش معناه ان البيج مش تحفة .... من الاخر هى مسألة اذواق فبلاش حد يكره ناس تانية فى عربياتهم بالاسلوب ده .

وانا لو اتكلمت عن اختلاف الاذواق .. فمثلا انا أرى ان الاسود بيدى فخامة غير عادية للعربية بس بيحتاج لنظافة متواصلة لان التراب بيبان عليه ولكن من مميزاته انه لونه لا يتغير فبعد سنوات من استعمال العربية تنظف العربية كأنها زيرو لسه ... انا البيج ومن وجهة نظرى باردو تحفة طبعا بس مش مع اى عربية ولا مع اى لون خارجى للعربية يعنى مثلا انا مش بحبه فى اللانسر لانه بيج فاتح مش زى بتاع البى ام وطبعا كلوكو عارفينه لكنه فى الاخر حلو مش وحش ومن ضمن مميزاته ان التراب مش بيبان عليه ولكن مع مرور الوقت بيغمق وبيبقى مش حلو قوى وطبعا ده من وجهة نظرى باردو لكنه فى الاخر تحفة باردو ... انا اللون اللى مش بحبه فى الداخل هو اللون الرمادى .

هى مسألة اذواق فقط وربنا يبارك فى كل العربيات الاسود فخم والبيج تحفة والرمادى جميل جدا وفى ناس بتحبه فياريت اللى يكتب رأيه يكتب رأيه فقط فى حاجته دون تكريه الاخرين فى سيارتهم .
================================================== =======
بالمرة بقى احب اشاركو فى وجهة نظرى حول العربية الشارك وشوية تعديلات كده عملتها فيها وكتبت عنها قبل كده علشان الكل يستفيد .




أولا : انا عربيتى فيرانى فرش اسود اللى هو على رأى احد الاعضاء كئيب قوى المهم الفرش عاجبنى قوى ومدى فخامة وشياكة للسيارة وانا عملته فرش جلد اسود شبيه بالطبيعى قوى فيه التشبيحة بتاعت الطبيعى وده كلفنى 1500 جنيه .

ثانيا : ركبت زينون واطى فقط من عند ارابكوم فى مدينة نصر كلفنى 700 جنيه وعملته واطى بس زى بتاع الفابريكة معظم العربيات بتنزل يزنون واطى فقط وبجد تحفة حلو جدا انصحكوا بيه.

ثالثا : ركبت دى فى دى 8 بوسة فيه كل حاجة وركبت شاشات خلفيه واللى عاجبنة فيه كمان ان لون اضاءة الازرار بتاعته نفس لون نور التكيبف وكمان فيه كاميرا خلفية طبعا وكلفنى 3500

رابعا : انا عربيتى اسود من جوه اللى و الابنوس اللى فيها مش عاجبنى خالص فحطيت عليه ورق سيلفر بقى تحفة بس مع الشمس الورق طلع ففكيت المسطرة الامامية واللى فى الابواب وعملتهم دوكو سيلفر مط بقى تحفى على العربية وكلفنى 150 جنيه وطريقة الفك والتركيب سهلة فوق ما تتخيلو عرفتها من على النت من على اليوتيوب عن طريق البحث عن who remove door panel in lancer المهم بقى فعلا تحفة وناس اصحابى عملوا نفس الموضوع بس لو العربية بيج ايخلى لون الابنوس زى ما هو علشان لايق عليها ...

خامسا : ودى حاجة هايفة شوية .. فى دواسات بتتباع فى كارفور المعادى تحفة بجد هى ماليزى بحوالى 120 جنيه الجميل فيها انها نفس منظر الموكيت الفابريكة بس هى جلد .. جلد معشش فى بعضه يدى منظر الموكيت وجميل قوى ومش بيبان فيه التراب خالص .. هتعرفوا لو شفتوه وهتفهموا قصدى .

سادسا : عملت الحتة اللى تحت النمرة لزق اسود مط زى الايفليوشن .

سابعا: انا مليت التجويف الخلفى اللى امام العجل الخلفى بسيلكون عضم علشان اغسل العربية براحتى ولو حوشت طينة متعملش بارومة وكنت كاتب موضوع بالشرح عن هذا الموضوع

فى حاجات تانية بس مش عايز اطول عليكم .


نيجى بقى للمميزات وعيوب السيارة .

العربية لا هى اجمل عربية فى الدنيا ولا هى اسوء عربية فى الدنيا

المميزات :

اولا : ثابتة جدا وانا هشرح موضوع الثبات ده وجهة نظرى فقط .

قبل ان اتكلم عن ثبات السيارة بالاخص اللانسر بجميع فئاتها احب ان اظيف ملحوظة ان اللى صنع السيارة عمل انزار بعد سرعة 120 يعنى العربية بعد ال120 اكيد هيبقى فى حاجة غلط واحنا كمصريين عندنا أغلب الشباب عندهم سينس البلاى استيشن والجويستك ودى حقيقة فبيعرفوا يتحكمو فى العربية كويس حتى لو علميا العربية مش ثابتة حتى لو سايق بيد واحدة مع ان ده خطر جدا .. بس عايز اوضح ان ثبات العربية يختلف من شخص لاخر حسب امكانياته فممكن العربية تبقى غير ثابتة اطلاقا واللى سايقها يقولك ثابتة ويجننك هههههههههههه واخرون تبقى العربية ثابتة بس هو غير محترف بالقيادة فيقولك العربية مش ثابتة .


تعريف ثبات السيارة من خلال أراء الناس

1- هناك رأى يقول ان ثبات السيارة هو ان العربية على السرعات العالية اللى بعد ال120 تبقى ثابتة ومش بتلعب على الطريق وماشية على خط ثابت وده طبعا لو الطريق كويس بمعنى انك لو سبت طارة الدريكسيون مش هتلعب يمين وشمال وده لو الطريق كويس وطبعا ده مش عندنا فى مصر ما عدا بعض الطرق الجديدة .

2- رأى اخر يقول ان ثبات السيارة هو ان العربية على السرعات العالية ايضا اللى هى بعد 120 مش بتعوم اثناء المناورات يعنى لو جيت يمين او شمال العربية مش تعوم ومعنى انها تعوم يعنى زى مثلا ما مقدمة السيارة تروح فى الاتجاه اللى انت عايزة بس المؤخرة تستجيب بعدها بأجزاء من الثانية وده بيعمل تعويم يعنى عدم القدرة على التحكم بالسيارة .

3- رأى أخر يقول ان ثبات العربية يعنى لو انت بتجرى بالعربية على طريق وعديت جنبك عربية نقل فالهواء مش هيأثر على عربيتك ومش هتحس انها بتلعب .

4- رأى اخر يقول ان ثبات العربية يعنى على السرعات العادية تاخد الغرز بطريقة مثالية وتلم نفسها بسرعة دون تعويم .

5- رأى اخر يقولك الثبات يعنى لما اجرى بالعربية على 140 مثلا وفى هواء على الطريق الهواء مش يلعب فى العربية خالص .

وألخ ألخ ألخ من الاراء حول هذ الموضوع .


ثانيا : تعريف ثبات السيارة علميا :

1- كل ما زاد وزن السيارة زاد طبعا الثبات لان السيارة كل ما زادت سرعتها قل وزنها وهذا بسبب ان الهواء يتخلل أسف العربية من الاتجاه الامامى فيرفع مقدمة العربية عن الارض فيقل وزنها .

2- كل ما اقترب مركز ثفل السيارة الى المنتصف زاد ثباتها ومركز ثقلها يعنى بالبلدى اثقل حته فيها وطبعا هو الماتور اللى اكثر وزنا فى السيارة يعنى كل ما اقترب الماتور من المنتصف وبعد عن مقدمة السيارة زاد ثباتها .

3- كل ما كان الجزء الخلفى من السيارة عالى وهو الشنطة طبعا زاد ثبات السيارة يعنى المؤخرة اعلى من المقدمة ومن هنا جاءت فكرة الاسبويلر للعربيات اللى مؤخرتها واطيه نوعا ما .

4- كل ما زادت المسافة بين محاور السيارة زاد ثباتها فى المناورات يعنى الغرز بالبلدى وفى المنحنيات أيضا .

5- كل ما زاد قطر الجنط وعرض الكاوتش زاد ثباتها طبعا بالاخص فىالمنحنيات .

6- كل ما قل ارتفاع السيارة عن الارض زاد ثباتها بالاخص فى المنحنيات علشان كده العربيات 4x4 بتبقى مش زى السيدان فى الثبات .. والكريستالة مثلا فى اللانسر مش زى البومة والهوندا مش زى التويوتا .

7- كلما زاد ثقل الباور ستيرننج طبعا يزيد ثبات السيارة لان الباور يقل مع السرعة نظرا لخيفة وزن السيارة على السرعات العالية ويقل اكثر واكثر لو كان الطريق اسفلته مش كويس .

ثالثا : العوامل التى تأثر على ثبات السيارة :

1- الهواء : وطبعا الهواء بيأثر على السيارة كثيرا يعنى لو هناك عواصف مثلا او هواء شديد فممكن ان يلعب بالسيارة بالاخص ان كانت السرعة العالية لان وزنها بيبقى أقل وده بطبعا بيختلف نسبيا من سيارة لاخرى حسب العوامل العلمية اللى اتكلمنا عنها سابقا يعنى لو السيارة تحقق فيها كل عوامل الثبات العلمية فالهواء هيأثر عليها قليلا مش زى اللى عندها بعض عوامل الثبات فالهواء يؤثر عليها كثيرا بس جميع السيارات تتأثر بقوة الهواء ان كان شديد .

2- طبيعة الطرق . وده موضوع كبير جدا وده اللى بيسبب اختلاف فى الاراء كثيرا بين الناس فى تعريف الثبات .. طبعا احنا بنتكلم عن ثبات السيارة بعد سرعة ال120 المقررة من مصنع تصنيع السيارة ....

*وهنا عندما تكون السيارة على طريق أسفلته مش كويس زى الدائرى مثلا وانت بتجرى على سرعة عالية أعلى من ال120 ومرة واحدة سبت الدريكسيون هتلاقية بيلعب سنة يمين وسنة شمال وخفيف نوعا ما وده علشان الطريق مش مستوى وهذا رد فعلى طبيعى للاطارات من الطريق وكل ما زودت السرعة هتلاقى الدريكسيون بيلعب اكتر يعنى بقى سنه يمين وسنه شمال بس بسرعة .. ولذلك بنمسك الدريكسيون بكلتا اليدين ونضغط عليه علشان نحكم السيطرة على السيارة ونخلى الاطارات لا تنجرف مع ميل الطريق يمينا ويسارا بالاضافة كمان انك انت نفسك يتكون بتتهز فبتأثر على الطارة كمان .

* اما لو ماشى على طريق مستوى مثلا زى طريق العين السخنة والهواء مش جامد هتلاقى الدريكسيون مش بيلعب لحد مثلا سرعة 150 وممكن تمسكه بايد واحدة كمان .. علشان كده تلاقى واحد سايق عربيه مثلا نوعها (س) مش فيها عوامل ثبات كثيرة وجرى على طريق السخنة فتلاقيه يقولك العربية ثابته جدا جدا جدا جدا جدا كأنها بى أنم . ومن هنا يأتى الاختلاف فى الاراء .

* وطبعا كل عربية حسب توافر عدد اكبر من عوامل الثبات بها فتختلف عن الاخرى يعنى بالبلدى لو عربية فيها عدد كبير من عوامل الثبات اللى اتكلمنا عنها هتلاقى لو ماشى على طريق غير مستوى الدريكسيون بيلعب مثلا بعد سرعة 150 مثلا مثلا يعنى ... أما عربية تانية فيها عدد أقل من عوامل الثبات السالف ذكرها فهتلاقى الدريسكيون بيلعب بعد ال120 مثلا مثلا . وبيلعب هنا مش بمعنى ان العربية تعوم او بتحدف لا خالص ... بيلعب هنا يعنى لو سايب الدريكسيون خالص وبتتفرج عليه هتلاقية عمال يجيى سنة صغيرة يمينا واخرى يسارا حسب أسفلت الطريق وخفيف نوعا ما لانه باور زيت .

نكمل بقى مميزات اللانسر شارك واسف على الاطالة فى موضوع الثبات

ثانيا "شيك قوى من بره ومن جوه وده من وجهة نظرى باردو.

ثالثا : الماتور المايفك اى ان كان 1500 او 1600 محدش يعرف قيمته غير اللى يقرأ عنه وعن امكانياته وايه اصلا موضوع المايفك ده يا ريت تقرأو عن الموضوع ده كوبيس .

رابعا : بالرغم من ان العربية ثابتة جدا الا انها عالية عن الارض وجى ميزة فى مصر مالهاش حل .

خامسا : قطع غيارها مش غالية نار يعنى هى اغلى من البومة بحاجة بسيطة جدا يعنى مثلا لو حاجة فى البومة ثمنها 1000 جنيه فى الشارك بتبقى حوالى 1150 جنيه .

هى فيها مميزات كتير تخليها اشبه بالالمانى بس انا على قد ما قدرت اكتب دلوقتى .

العيوب :

انا مش شايف فى العربية دى الا عيبين بس .. اولهما ان الشنطة ضيقة شوية والثانى ان العزل بتاع العربية أسوء مما كنت أتخيل وقرأت عن الموضوع ده كتير وكنت مستغرب ليه يعنى مش عملوا العزل كويس علشان مش تسمع صوت الماتور ول اعفشة ولا الخارج اصلا وعرفت ان خامات العزل من اغلى حاجات فى السيارة فمن وجهة نظرة ان لو كانوا عملوا العزل تمام كانت العربية بقيت اغلى من كده بكتير .


باختصار العربية من وجهة نظرى حلوة جدا جدا جدا جدا جدا وعجبانى جدا جدا جدا جدا على فكرة انا اشترتها ومعظم الناس مش بيشكروا فيها بس انا عارف طبيعة الناس عندنا وازاى بيحكموا على العربيات على فكرة انا قبل ما اشتريها سألت شخص واحد بس بفضل الله وهو مهندس فى توكيل مصرية مش دايموند وده حبيبى جدا جدا جدا وخبرة جدا جدا جدا قولتله كلمه واحدة بس هى أجيب شارك قالى طبعا رحت جبتها علطول وتأكدت انى صح بفضل الله



ارجو التوفيق للجميع

كلام جميل وفوق الممتاز كمان وتسلم ايدك يا باشا