كلنا سمعنا عن حادث التحرش اللى حصل فى المهندسين تفتكر العيب على مين هل البنات ولبسها
الشباب واخلاقهم
وزاره الداخليه ودورها فى حمايه الشارع
وليه احنا وصلنا لكده
عرض للطباعة
كلنا سمعنا عن حادث التحرش اللى حصل فى المهندسين تفتكر العيب على مين هل البنات ولبسها
الشباب واخلاقهم
وزاره الداخليه ودورها فى حمايه الشارع
وليه احنا وصلنا لكده
من وجهه نظرى المسئول الاكبر فى القضيه دى هى وزاره الداخليه ومجلس الشورى
من زمان بيطالبوا بسن قانون يعاقب ويجرم التحرش
ليهم مليون سنه لسا بيحددوا معنى كلمه التحرش بالظبط عشان يفكروا فى وضع قانون \
مصر تعتبر الدوله العربيه الوحيده اللى مفيش فيها قانون يعاقب على التحرش فى الشارع او خلافه
فى اى بلد عربى محدش يتجراء يتحرش بفتاه لانها مجرد ما تشتكى على الشخص فى اى قسم يتسحب على الحبس فيه قانون يجرم ويعاقب وفيه عقوبات رادعه
احنا هنا سايبين السايب فى السايب
انعدام اخلاقى وانعدام تربيه وثقافه ووعى
والاكبر انعدام الخوف من الردع او العقاب فى حاله الخطاء
لو مفيش اخلاق وفيه بطاله وفقر وكل شى
بس فيه قانون المراهق لو عارف انه لو عاكس واحده وقل ادبه واشتكت عليه هيتسجن محدش هيبص فى وش اى واحده
1-البنات ولبسهم وثقافة الموضة (دور الاسرة)
2-الفضائيات والكليبات والعرى(دور الاسرة والدولة)
3-البعد عن الدين والاخلاق وانتشار ثقافة الفهلوة(دور الدولة والاسرة)
4-تاخر سن الزوج بسبب قلة الموارد (دور الدولة)+عادات خاطئة: المغالاة فى الطلبات (دور الاسرة)
5-انتشار فظيع للمكيفات بكافة انواعها(دور الدولة)
6-عدم وجود عقوبات رادعة+عدم تطبيق الشريعة الاسلامية (دور الدولة)
و ممكن يكون فى اسباب تانية انا مخدتش بالى منها
أنا صوتت لدور وزارة الداخلية عشان لو فيه تواجد أمني في كل شارع أكيد مش بس التحرش هيقل...
في دول أوروبا بسمع كلمة متكررة دايما....
يقولك "لقيت عربية شرطة معرفش طلعتلي منين...."
احنا هنا بنتصل بيهم و نتحايل عليهم ييجوا.. و لو جم بيكون متأخر أوي.... هناك من غير ما تتصل بتلاقيهم في وشك سواء بتعمل حاجة غلط أو محتاج مساعدة أو في خطر...
من ناحية تانية أنا شايف أن السبب الرئيسي هو ان الممنوع مرغوب...
لو فيه اختلاط من الطفولة و ثقافة كويسة نتربى عليها... و اختلاط في حدود وقت الكبر... معتقدش أن ممكن يكون فيه تحرش
خصوصا لو كان الاختلاط ده اجتماع على فعل الخير... يعني مثلا مجموعات من الشباب و البنات يزوروا ملاجيء أو دور مسنين... أو ذوي احتياجات خاصة على أن ده يتم تحت رعاية دور العبادة...
بالشكل ده هيكون فيه اختلاط ايجابي و مش هيبقا فيه حتة الممنوع المرغوب
نفسي أعرف مين اللي أختارو البنات ولبسهم!!! و كـأننا هنحجر على حرية الناس ويا إما تقعدوا في بيوتكم يا إما هنتحرش بيكم!
حاجة تسد النفس على الصبح كدا..!
على فكرة أغلب الحوادث دي بيبقى شباب جاي من أماكن ريفية أو صناعية في الأعياد ومن ثم بيتوجه لأماكن كبيرة مزدحمة زي جامعة الدول او التحرير.
وعلى فكرة برضو...لا يوجد أي تقرير مصور عن حادثة جامعة الدول ولا يوجد سوى بعد التكهنات و الأخبار المتفرقة والتي لا تؤدي إلى شيء!
انا صوتت ل:سبب آخر
والسبب البسيط اللى انا شايفه هو الكبت
وسبب الكبت هو برضه بببسطة تعقيد مسألة الزواج
مع ان المسالة سهلة نظريا وقابلة للحل، لكن مع وجود العقول المصرية العتيدة هتكون صعبة جدا
دول المغرب العربى قدمت نموذج ناجح جدا لمسألة الزواج، لا يخرج عن الشرعية ، ويتماشى مع روح ديننا ، ويسد الطرق امام كل العلاقات الغير شرعية
والنموذج ببساطة هو زواج بدون تكاليف، يعنى شقة ايجار جديد فى اى حته ، على سرير قديم من عند ابن خالة العروسة على دولاب من عند بنت عمة العريس على ترابيزة ايديال وبتجاز المصانع مستعمل من سوق العصر ، وتبدأ الحياه وربنا يسهلها، وده ميختلفش فى حاجة عن اللى الغربيين بيعملوه لما البنت بتكبر وتنتقل للمعيشة مع صديقها بابسط تكاليف ممكنة،وبمعرفة اهلها وموافقتهم، سوى ان الموضوع هنا بيكون بشكل شرعى بعقد زواج رسمى موثق ، لكن بدون التعقيدات التى لا اول لها ولا آخر بتاعة شبكة زى بنت خالتها واوضة سفرة ارو زان كركزان وطقم صينى ميلامينى وشقة جنبنا هنا علشان اشوفها كل يوم والكلام اللى لا بيودى ولا يجيب واخرته محدش بيتجوز ده
اتيحت لى الفرصة انى اتعرف بشابة مغربية وكانت بصدد الزواج علما بانها ميسورة الى حد ما وكذلك خطيبها، سالتها عن شبكتها ومهرها وجهازها والحاجات دى، قالت لى بالنص:" هو لسه فيه حد بيفكر بالأسلوب المتخلف ده"
لو كل شاب اتعود انه يلاقى عمل ولو مؤقت من سن 18 لحد ما يخلص تعليمه، والناس فكرت ان الولاد تتجوز باى طريقة وبعدين ربنا بيوسعها من عنده، ساعتها مشكلة الكبت هتخلص، وياليت اهل المشرق العربى يتعلموا من اهل مغربه
سبب كده انهيار فى اخلاقيات الشعب المصرى والبعد عن الدين
انا اخترت البنات ولبسهم لان البنات دى لو محتشمة ولابسة ما لا يكشف
ولا يصف استحالة حد يبصلهم (بالبلدى متحطش النار جنب البنزين) و
الحرية معناها ان انا اعمل اللى عاوزه وفى نفس الوقت مضرش غيرى
يبقى لابس البادى والكت بياذى عينى ولو انا مبصيتش غيرى هيبص
بسبب:ضعيف النفس + الكبت و الحرمان
أنا مع و ضد بشمهندس سبعاوي... إزاي؟
أولاً الجزء الثاني كله أنا متفق معاه فيه 100% و ممكن يكون موضوع منفصل أعتقد هنسمع فيه أراء جميله جداً من أعضاء المنتدى.
بس المشكلة لو بصينالها بعيد عن الحكومة و إلقاء اللوم على الآخر إن مين فينا بيربي في إبنه ثقافة الإعتماد على النفس.. مين فينا بيخلي إبنه من سن 14 و 15 يبتدي يشتغل في الصيف و يعرف قيمة الفلوس .. مش شرط يشتغل صبي ميكانيكي بس ممكن حادات كتير جداً تبني شخصيته و تخليه يحتك بالمجتمع و يفهمه قبل دخول معترك الحياه.
في أمريكا و أوروبا الناس بتكون ميسورة لكن ولادهم لازم يشتغلوا في الصيف حتى لو شغل في مدارسهم أو جامعاتهم أو كجليس أطفال و غيره و غيره ...
النتيجة الأهل بيشوفوا الأبناء بينضجوا قدامهم و بيعتمدوا على نفسهم و بالتالي ميخافوش عليهم و يضطروا يأمنوا مستقبلهم لدرجة إن الآباء بيشيلوا هم الأبناء من لف على وظيفة لشقة لعربية و غيره و بالتبعية أهل العروسة بيخافوا على بنتهم الجميلة الرقيقة اللي متستحملش تتبهدل و لازم اللي يتجوزها يعيشها في نفس المستوى و الإسطوانات المعروفة دي..
و من ناحية تانية الأبناء بيثقوا في نفسهم و تكون إختياراتهم عقلانية و تعودهم على قيمة الفلوس بيخليهم يبعدوا عن المظاهر الكاذبة من شبكة بكام لفرح فين لشقة مساحة إيه لعربية موديل كام...
هوا الكلام في الموضوع ده كتير و مش عارف الحقيقة أنا وصلت أفكاري بطريقة منظمة و لا لأ لكن على كل هوا ده في رأيي سبب رئيسي للمشاكل اللي إحنا فيها دي.
بالنسبة للجزء الثاني اللي معترض فيه على بشمهندس سبعاوي الشباب اللي عملوا الحاجات دي كلهم زي ما قيل من 15 إلى 20 سنة يعني مش سن شاب واجه أي تعقيدات زواج أدت لإصابته بكبت...أنا شايف إن الموضوع سببه أزمة أخلاق بيمر بيها المجتمع كله لأسباب كتير جداً و زود الأزمة دي و كان الكبت قنوات الفيديو كليب و البلاوي اللي بنشوفها.
مع احترامى لسعادتك
بلاش نترك السبب ونمسك فى اشياء ثانيه
عمر اللبس ما كان سبب ولا دافع للتحرش عندك كل الدول الغربيه اللبس العن شى عندهم وعمرك ما سمعت بقصه تحرش فى شارع عندهم
وعن تجربه اختى الاصغر كانت منتقبه اهى وتحتها خط وتركت النقاب اسمحولى لسفاله الشباب والرجال فى الششششششارع
هقولك موقف ومتقوليش لبس وسلوكيات اختى ركبت مره ميكروباص رايحه للجامعه وركب بعدها راجل عمره فى الاربعين فى منتهى السفاله متعمد ان الكرسى اللى وراء السواق فيه اربع اشخاص وهو بدراعه بيعمل حركات قذره وبيحتك بجسمها
زعقت له مره وقالت له لو سمحت احترم نفسك مره مفيش
وقفت الميكروباص ونزلت
وكثر بئه من المواقف دى بالهبل لحد ما والدى قالها بلاش نقاب
اسمحلى اختلف معاك فى نقطه ان السبب عدم تيسير الزواج لو هتابع موضوع التحرش ده هتلاقيه من فئه عمريه اصغر من فكره الزواج اصلا ما بين 17: 24 سنه تقريبا يعنى لسا فى مراحل الدراسه يبقى نتكلم ان السبب عدم توفير الزواج لمين بئه
دول لسا عيال ومش السبب عدم الزواج فى حالتهم السبب انه فيه جيل طالع غريب فى التربيه ميعرفش شى عن الدين ولا سمع فى المدرسه ولا فى البيت عن شى اسمه اخلاق او مكارم الاخلاق دول جيل مستحدث جيل البانجو والسجاير والتهيس
والحل لازم يكون فيه ردع وعقاب من الدوله لان مينفعش تربيه خلاص انتهى وقت التربيه
وبعدين اسمحلى انا مثلا لو شاب وخلصت دراسه تقدر تقولى لو لقيت شغل مؤقت يعنى هيبقى مرتبى فى اول حياتى الوظيفيه كم
ولو العروسه جاتلى جاهزه وانا بس عليا الشقه هجيب ايجار قانون جديد منين
وهدفع الالتزامات الشهريه من كهرباء ومياه ولبس وعلاج واكل وشرب منين من مرتبى برضوا اللى بوظيفه موقته .......... خلينا نتكلم بواقعيه يمكن نوصل لحل
حضرتك العملية عندهم ملهش ضوابط ولا تحريم فبالتالى مفيش كبت
للغرائز وبالتالى اللبس عندهم هيبقى غير ملفت للنظر اصلا وكمان انا
مسمعتش ان عندهم ان فى تحرش لكن سمعت ان فى اغتصاب
اللى حصل لاخت حضرتك ده بسبب انعدام تام للاخلاق والبعد التام عن
الدين (لان اللى عمل كده اكيد عارف ان ده هيحصل لبنته) وكمان الناس
اللى بقيت تشوف الغلط وتسكت وبيحصل لى بنات كتيير محتشمة او غير
بسبب الفضائيات والكلبيات يبقى الحل مش فى ايدينا لكن فى ايد الدولة
بمنع تراخيص القنوات دى على النايل سات وبالتالى هتبقى متاحة لعدد
قليل بس وفى حلول زى المسكنات زى عربية للبنت لعدم الاحتكاك فى
وسائل المواصلات العامة (انصح بيه ) واللى ميقدرش يحاول يتجنب
الخطوط الزحمة(يحاول)ولنا الله
والله المشكله انعدام للاخلاق واسباب اخرى اقتصاديه وامنيه
ومتقوليش فيه كبت فى مصر كبت فين ده البنات والشباب بقوا منحرفين لدرجه تخوف
اكيد بتشوف التدخين بقى عينى عينك فى كل مكان من بنات وشباب وضيف عليهم دخول البنات بشكل رهيب فى عالم الحشيش والمخدرات واغلبهم طالبات فى الجامعه او فى سن العشرين وبكثره
صدقنى الموضوع مش شكلى خالص الموضوع اخلاقى احنا فقدنا التربيه فى الببيوت وفى المدارس زمان كانوا بيعلموا الاطفال فى المدارس وبيقولوا لنا
ان الادب فضلوه عن العلم
الان لا الطفل بيسمع ان مصاريف المدرسه اهم منك ومن اهلك عاوز منه يتربى فين
بمناسبه اللبس مصر فى فتره الستينات كانت السيدات والبنات كلهم بيلبسوا المينى جب والبنطلونات الاستريتش ومكنش فيه انهيار اخلاقى فى المجتمع
اصيع شاب لو عاكس بنت يقولها يا قمر يا معرقش ايه
الان ااقل معاكسه من ولد فيها االفاظ سافله وبزيئه
وبمناسبه جرائم الاغتصاب الدول العربيه فيها عدد اكبر من جرائم الاغتصاب لكن محدش بيسمع بيها كله بيسكت خايف من الفضايح لكن فيه بلاووووووووى ربنا سترها
ده كان ردي في الموضوع بتاع ساحة الأخبار
هي مش جديدة يعني تحرشات العيد دي انا بشوفها من يمكن مثلاَ خمس سنين لدرجة إنها بقت أشبه بتقاليد العيد كل عيد أقرا أو أشوف حادثة تحرش و منها حاجات ولا في الأفلام يعني ! و اللي مش هنساها مرة علي الكورنيش بنت بتجري و ماشي وراها ييجي 70 شاب متشرد .. مش متشردين اللي هو بيشموا كلة تحت الكوبري بس اللي هو الشباب الضايع .. و المنظر عامل زي فيلم resident evil اما ال zombies ما بتصدق تلاقي كائن حي ! و هما ماشيين وراها كدة و أبتدوا يتهجموا عليها و في وسط ماهي بتحاول تخرج من وسطيهم عربية جت و عملت فرملة جامدة عشان تخوف الشباب دول و قام مخمس في الشارع و خبطله بتاع خمسة (يستاهلوا) و أخد البنت دي و جري ، و الشباب رغم ذلك بيضحك ضحكته البلهاء أكنه بيلعب بلاي ستيشن .
اللي إختلف إن الوضع زاد مع زيادة سهولة الحصول علي المواد الإباحية .. يعني زمان كانت شرايط فيديو و زي فيلم ثقافي لازم شريط و فيديو و مكان .. و بعد كدة النت دخل بس كان بكروت .. بعد كدة الساعة بقت ب 2 جنيه .. بعد كدة بقت وصلات النت حاجة ببلاش كدة .. و بعد كدة بقي بالبلوتوث !
فا اما يبقي كل ده عند طبقة من الشباب كانوا مخبيين عليهم و هما صغيرين إن فيه حاجة في الدنيا إسمها بنات .. و ميعرفوش الكائن الغريب التاني ده اللي إسمه أنثي ولا يعرفوا يتعاملوا معاه .. ميعرفوهوش أساساَ عشان يحترموه فا تحولت الأنثي بالنسبة لهم إلي جسد فقط .
ضيفي علي ده بقي اليأس و الفقر و المستقبل اللي مش باينله ملامح و البطالة و تأخر سن الزواج و الذي منه .. تلاقي النتيجة اللي بيحصل ده .
زي بالزبط واحد تايه و بقاله أسبوع مكالش .. أي حاجة هيقابلها هياكلها مش هيقول لأ حتي لو كان ورق شجر أو لحم نيئ ، فا هو الشباب اللي زي دول نازل و مسستم نفسه علي التحرش .. و ساعات بيسستم نفسه في الشارع علي كدة بمجرد ما يشوف بنت حلوة فا يخبط في اللي يلاقيه بقي محجبة منقبة لوحدها مع أهلها هو مش شايف أصلا ، هو شايف بس اللي عايزه في دماغه .
ضيفي إلي ذلك كمان إن فيه أفكار فاسدة كتير في الشباب .. بعض الشباب بيعتبروا التحرش .. واجب ! اه و الله .. انا شفت جروب علي فيس بوك مشترك فيه عدد مرعب فكرته إن من حق أي شاب يتحرش بأي بنت مش لابسة كويس و إن هي اللي جابت لنفسها كدة و محدش يلومنا ولا له عندنا حاجة ! و لو حد شاف واحدة مش لابسة كويس في الشارع و رمي عليها كلام ولا حتي شتمها و تحرش بيها تلاقي الشباب بيبوصوله أكنه قام بعمل بطولي يستحق وسام عليه و إن البنت تستاهل .
فا اللي مش متشجع يعمل كدة هيعمل .. و ممكن اللي مكنش في دماغه كمان يتجه الإتجاه ده .. بل و كمان يبرره و يعمله و ضميره مستريح و يقولك "أصل البنات لبسها بقي صعب!" .
زي ما قلنا .. إنهيار ذاتي
RIP EGYPT
أولا خلونا نفرق بين الحالات الخاصة و العامة
الحالة الخاصة هي حالة كحالة أخت دموع الثلج
أما الحالة العامة هي حالات التحرش الجماعي
المشكلة في حاجات كتير قوي كلها مترابطة
السياسة العامة من زمان قائمة علي تهميش الدين و بشكل أعم تحطيم الثوابت التي من الممكن أن يجتمع عليها البشر لتؤدي لتحرك ايجابي (و من أهم هذه الأشياء الدين)
و بناءا عليه اعلام سفيه و تطاحن بين الأديان حتي بين الدين الواحد
النتيجة جيل لا يستطيع تحديد الصح و الغلط - الحلال و الحرام - فساد شديد - عدم قدرة معظم الشباب علي التواصل الجسدي الحلال و هو احد الاحتياجات الطبيعيه للانسان
الحالات الخاصة من التحرش موجودة في المجتمعات الغربية بقسوة عن مجتمعنا بمراحل حتي ان المرأة التي تعمل تضطر للتغاضي عن مستوي معين من التحرش الجنس للحفاظ علي لقمة العيش و هذا الكلام يسر علي كل المجتمعات الراقيه
أما الحالات العامة من التحرش فأعتقد أننا بدأنا ننفرد بها و خصوصا مع تكرارها لتصبح ظاهرة مستمرة قد نعتادها مع الوقت
الأسباب كل ما ذكرتموه (الدولة - الفساد الأخلاقي - ضعف الوازع الديني - عدم وجود هدف محدد - صعوبة الزواج)
الحل: أن نفر إلي الله
﴿.. إن الله لايغير مابقوم حتى يغيروا مابأنفسهم وإذا أراد الله بقومٍ سوءً فلا مرد له ومالهم من دونه من والٍ ﴾ الرعد:11
نعود إلي مصرنا قبل ثورة العسكر
نعود إلي الأخلاق و الدين و التقاليد الثابتة
أن تكون لنا هوية واضحة
للأسف قد اتفق معي الكثير و لكن من بدأ بالاصلاح مع من هو مسئول عنهم؟؟؟؟؟
واضح أن حضرتك ما أخدتش بالك من ردي كويس...
أنا بقول اختلاط تحت رعاية دور العبادة... اللي هي الكنائس و الجوامع...
ثانيا بقول اختلاط و اجتماع على عمل الخير...
يعني لما نكون جروب و فيه لينا مرشد متعين من دار العبادة اللي احنا تابعين ليه و موثوق فيه و سنه في الأربعينيات أو الخمسينات مثلا هو اللي بيقودنا... و نكون كل اجتماعاتنا لعمل الخير و بس... و ليس لأي غرض آخر... ساعتها كل واحد وواحدة هيكون حاسس أنه في وسط اخواته و أسرته...
و أي حد شاذ عن قاعدة الأخوة هيتم نبذه و طرده تلقائيا من المجتمع الراقي فكريا ده....
و على فكرة أنا مش بتكلم عن حلم ولا فكرة... ديه حاجة منفذة و مطبقة بنجاح شديد و غيرت حياة ناس كتير ...
و فيه قوافل خير بتتعمل و هي خير مثال على نجاح الموضوع ده... بيسافروا الصعيد لزيارة الأسر الفقيرة و المعدمة و يوزعوا عليهم أكل و لبس و بطاطين... و في المناسبات بيوزعوا حاجات زي شنط رمضان مثلا....
و كل ده أنا شفته بنفسي بيتطبق سواء مجموعات مسلمين أو مسيحيين... و كل المشتركين فيه بيكونوا عايزين فعلا يعملوا خير و في نفس الوقت مختلطين في جو محترم و نضيف...
و زي ماقلت لحضرتك... اللي نيته مش حلوة مبيلاقيش مكان وسطيهم...
تحياتي...
زي ما قلت في موضوع ساحة الأخبار، المتحرش بيبحث عن أنثى أيا كان ما ترتديه. ممكن يكون لبس البنات المبالغ في تبرجه عموما هو سبب غير مباشر، انما ممكن جدا واحدة محجبة حجاب محترم جدا تتعرض للتحرش سواء في وسائل المواصلات المختلفة أو تحرش جماعي زي ما بيحصل أيام التجمعات كبيرة العدد زي مثلا العيد أو الاحتفالات المختلفة بنصر كروي.
عشان كده بالوم على البنات أحيانا لما يخرجوا في الشوارع يحتفلوا بكاس أفريقيا أو ما شابه، فيه شباب منحرف بينزل من بيتهم مخصوص عشان يتحرش مش عشان يحتفل و مشهد زي ده شهده زميل لية في الشغل من أكتر من سنة و كانت مهزلة بكل المقاييس.
لازلت أرى دور أمني ناقص في هذه المسألة. زمان كان اللي بيعاكس واحدة يتاخد على القسم و يتحلق له شعره عشان يكون عبرة.. دلوقتي المتحرشين عايشين حياتهم عادي في الشوارع و لا مسائلة، حقهم طبعا يعملوا أكتر من كده.
اما موضوع تأخر الزواج فزي ما دموع أوضحت ان المتحرشين دول سنهم - على ما سمعت امبارح في العاشرة مساء - بيبدأ من 16 سنة..يعني حتى فكرة الزواج مش واردة في السن ده و لو كان ميسور الحال. ده غير ان معظم المتحرشين دول بيبقوا من أسر فقيرة و من الناس اللي همه عايشين في شقق مشتركة و اللي بيجوزوهم بيكونوا زيهم، يعني ماعندهمش مشكلة في تأجير أوضة كمان في الشقة المشتركة اللي همه فيها ومتهيألي مافيش أكتر من الأفراح كل يوم و التاني في المناطق الفقيرة المعروفة، كل دول بيشتغلوا ايه؟ أكيد مش موظفين في شركات مالتيناشيونال يعني.
انا بارجح جدا رأي Motorizer ان من ضمن الأسباب القوية هو سهولة طرق مشاهدة المواد الإباحية اكتر من زمان و أبو 16 سنة قدامه مش أقل من 10 سنين عشان يقدر يتجوز، فبيحاول يتعرف على اللي بيشوفه على النت ده بس على الطبيعة. طبعا ده غير موجة الأفلام السينمائية الجديدة من نوعية أفلام خالد يوسف اللي بيغرقوا في عرض تفاصيل العلاقات الخاصة سواء الشرعية منها او غير الشرعية و يركزوا على تعبيرات وجوه أبطال المشهد المستمتعة بما يفعلوه و في أحيان أخرى يصدر منهم كلام تفيد نفس المعنى.. طبعا ده كله لعب في دماغ المراهقين اللي ما بيبقاش في ذهنهم غير انا عايز من ده.. حتى و لو كان في صورة تحرش بأنثى في الشارع.
أنا ليا رأي إضافي للآراء اللي تفضلتم بذكرها ..
فكرة التحرش الجماعي في القاهرة مرجعها إلى أمرين أساسيين هما :
غياب العدالة الاجتماعية والشعور بالقهر الاجتماعي
وسلوك الجمهرة أو الحشد ..
فاكرين زمان لما كان كوبري أبو العلا هو الرمز الأول للفارق بين الحي الشعبي (بولاق ابو العلا ) وحي الزمالك أرقى أحياء العاصمة ..
دلوقتي صار كوبري ناهيا أو كوبري جامعة الدول هو الفاصل بين مجتمعين مختلفين ..
ولكن ثمة فارق أصيل بين الرمزين ..
وهو أن ساكن بولاق أبو العلا هو الذي في وسط العاصمة .. وساكن الزمالك هو الذي يحتاج للكوبري للعبور .. فكان من الطبيعي أن ترى مئات من أبناء بولاق لم يزوروا الزمالك ولا مرة واحدة ولم يدخلوها ..
الآن سكان بولاق الدكرور والمعتمدية وكرداسة وكفر ناهيا وأرض اللواء وبشتيل وزنين
كلهم أو أغلبهم لازم يعدوا يومياً من المهندسين رايحين جايين ..
شارع جامعة الدول العربية صار هو أكثر الشوارع إباحية وانحلال في ال15 سنة الماضية .. فيه ترى السفه والغباء وقلة الأدب في كافة المجالات ..
طبيعي تلاقي شاب راكب عربية كابورلية ومقطع الشارع تخميس والصحبة الأنثوية المعروفة أكيد موجودة ..
في هذا الشارع تجد بائعات الهوى .. وتجد خناقات الشباب (ولاد الناس )بالكرابيج والمطاوي
تلاقي الشمامين وبياعين المخدرات . وأكيد كلكم عارفين الباقي
فهذا هوشارع الموبقات بحق ..
الخلاصة إن شباب وأطفال بولاق والمناطق المتاخمة لها يرون في المهندسين عقدتهم ..
يسيطر عليهم دائماً فكرة الحرمان بمجرد عبور الشارع فقط كل يوم مرتين على الأقل .
فيتجمع العيال عند مطلع الكوبري في انتظار حقهم كل يوم تقريباً ..
الفكرة أنهم يتحولون في العيد إلى جيوش وألوف بدلاً من أفراد معدودة .
وعندما يبدأ أقلهم أدباً في التحرش ينهال الجميع على الفريسة .. وتحدث المسألة .
أما حالات التحرش الجماعي في المناطق الأخرى فمرجعها الرئيس سلوك الجمهرة أو الحشد ..
فالمعروف في علم النفس الاجتماعي أن الفرد إذا ما وضع وسط حشد فإن سلوكه يتغير بما يتفق وأدنى قواعد السلوك لأقل مشارك في هذا الحشد .
ونظرة إلى ماتشات الكرة .. والمظاهرات السياسية وغيرها
ستجد أن المثقف والمتعلم والنخبوي يهلل ويتنطط في الاستاد أو الشارع
وترى الفتاة المحترمة المثقفة تقذف المحلات بالطوب وتشارك في التخريب في أي مظاهرة تخريبية ..
الإنسان في هذه الحالة بتكون شخصية الحشد هي التي تتحكم في سلوكه وتزيح شخصيته الحقيقية ..
فحينما يصل التحرش إلى حشد لا تستغرب إذا وجدت صديقاً تعرفه في وسط هذه الجموع مغيب الوعي يشارك معهم فيما يفعلون .
تقبلوا خالص مودتي
التحرش الفردى بيبقى اغلبه فى المواصلات سواء لبسة كويس او لا لكن
عمر 100 شاب يجروا وراء واحدة محتشمة زى محصل فى جامعة الدول
النتيجة هى انكسار نفسية البنت (فى الحالات الفردية والجماعية)+
البهدلة وتقطيع اللبس وكشف العورات(فى الحالات الجماعية) و كل ده
شفته بعينى فى المجزرة اللى حصلت من سنتين قدام سنيما مترو فى عيد الفطر
بس الناس اللي شافت منظر التحرش اللي حصل في شارع جامعة الدول العربية تاني يوم العيد ده قالوا ان كان فيهن محجبات و خلع عنهم المتحرشين الحجاب، يعني المتحرش زي ما اتفقنا مش عايز غير أنثى و لا يفرق بين محتشمة او متبرجة، هو نازل من بيتهم عشان كده و منشن على المناسبات اللي الزحام في الشوارع فيها بيبقى خارج نطاق السيطرة.. مش مسألة واحدة شافها لابسة لبس خارج راحت الفكرة قايمة في دماغه على هذا الأساس.. الموضوع منظم يا فندم و مترتب له مسبقا، مش وليد اللحظة.
هو ايه اللى حصل اصلاً ؟؟؟
حاجه زى موضوع السينمات من سنتين ؟
انا احب اوضح حاجة انا مش بدافع عن المتحرشين لاسمح الله
حضرتك فى بنات بتبقى لابسة الحجاب ومع ذلك لابسة ضيق ومكشوف
( واحدة من اللى كانوا فى حادثة سينما مترو كانت على نفس الشاكلة )
لكن لو لابسة واسع وما لا يصف ولا يشف اكيد الشباب هيدور على غيرها
مسالة مترتبة انا اعرف ناس بترتب علشان تشرب حشيش وناس بترتب
مع واحدة علشان ليلة حمراء ممكن يكون دلوقتى فى ناس بترتب علشان
التحرش لكن اشمعنا ال3 بنات دول ما جامعة الدول بيبقى مليان من كل
الاشكال يوميا يبقى الاحتمالات ( 1- مكنش فيه غيرهم يوميها
2- لابسهم مش مظبوط 3- ماشين يهزروا 4- حظهم )
لو حد شاف برنامج الطبعة الاولى اللي على قناة دريم النهارده المذيع قال ان من بين الذين تم الاعتداء عليهم واحدة منقبة !!!!
يعني الشباب المنحل ده نازل الشارع ومفيش في دماغه غير هدف واحد ... انثى واي انثى مهما كانت طريقة لبسها ... شباب بايظ ومحتاج تربية وايد من حديد
المشكلة فعلا بقت ان الموضوع انتشر في كل الأعمار وده نتيجة قوية للي بيشوفوه في الفضائيات وعلى النت كله عايز يطبق اللي شافه ويكتشف بنفسه والموضوع فعلا مبقاش ليه علاقة بتأخر سن الجواز (رغم انه سبب قوي برده لا يمكن تجاهله يعني وخلى شباب كتير يائس من انه ينول الموضوع بالحلال فيعمل الحرام بقي وخلاص ويتخذ ده مبرر لنفسه لكن العاقل منهم يعني بيعمله بطريقة مستترة ومش مكشوفة خوفا من لوم الناس) لكن انه يتعمل بطريقة جماعية والناس واقفة تتفرج انا بجد مش متخيلة ان حال البلد وصل للدرجة دي من الانحلال والحكومة لو مبهدلتش العيال دول وطبقت عليهم اقصي العقوبات بجد هاتفتح المجال للموضوع ده وهايبقي منظر طبيعي جدا في كل شوارعنا وفي كل الأوقات مش بس في المناسبات.
بصوا ياجماعة برده يقع جزء من اللوم على البنات في خروجهم في التوقيت ده بالذات
انا عن نفسي بقالي سنين بتجنب الخروج في ايام العيد مهما كانت الظروف لاني عارفة ان الوقت ده للأسف بتلاقي فيه معظم الفئات البايظة من الشباب او مايطلق عليهم تحديدا المراهقين اللي لاحصلوا رجالة يمكن محاسبتهم والتفاهم معاهم بالعقل والمنطق ولا حصلوا اطفال يمكن تربيتهم وتأديبهم وعقابهم في بعض الأحيان ضيفوا على كده ان وقت العيد بالذات اللي معاهوش فلوس طول السنة بيكون وقتها معاه فلوس واللي مبيخرجش من بيته طول السنة فسحة العيد بتكون بالنسبة ليه هي المتنفس الطبيعي لكل رغباته من خروج وتهييس ومعاكسة بنات وقرف.
انا بجد بقيت اخاف اني اخرج في اي مكان يكون فيه تجمع كبير من الناس لاني عارفة ومتوقعة اللي ممكن يحصل من ناس ضعيفة الايمان ومريضة نفسيا عشان مديش فرصة لاي حيوان تسول له نفسه انه يعمل اي حاجة تسيئلي وتجيبلي عقدة نفسية ومن ضمن الأسباب اللي خلتني اشتري عربية هي اني مشوفش النوعية دي من اللي مينفعش حتى نطلق عليهم بني ادمين على الاأقل هاصون نفسي من مجرد نظرة او معاكسة من ناس منحلة معندهاش اي اخلاق خصوصا ان النخوة للأسف انعدمت من الناس والبنت اللي بتتعرض لموقف زي ده مبقتش تلاقي حد يدافع عنها زي زمان كله بقي يقول يالا نفسي وانا هاعمل ايه يعني.
وفعلا ياجماعة الحكومة المفروض زي ماهي بتتجمع في الماتشات والمظاهرات ونلاقي عربيات الامن المركزي بتبقي مالية الدنيا في اي اماكن فيه تجمعات كبيرة من الشباب بالذات ، المفروض برده يتعمل حساب الكلام ده في الاعياد والمناسبات انا مش فاهمة هما ايه اللي مسكتهم لحد دلوقتي خصوصا ان الموضوع اتكرر اكتر من مرة مستنيين كام حادثة اغتصاب وكام حادثة تحرش يعني عشان يعملوا حسابهم وينزلوا العساكر بتوعهم في الشوارع يشتغلوا شوية بقي بذمة وضمير ويحموا الناس بقي ، هما بيتحركوا بس في احداث اثارة الشغب طب ماهي الحوادث دي تعتبر اثارة شغب برده
واللي جنني بجد انهم متحركوش الا لما صحفي كلم رئيس مباحث وكان بالصدفة قريب من موقع الأحداث مش فاهمة ازاي شارع حيوي زي جامعة الدول ده يحصل فيه الكلام ده والضباط ميدخلوش الا متأخر اوي بعد البهدلة وقلة الادب ماتكون اخدت مجراها.
فعلا سمعة مصر بقت زي الزفت وللأسف الناس بره لما بيتنقل لها الأحداث دي بيتقال ادي الشباب المصري وبيتعمم على الكل ان شباب مصر عندهم حرمان ونتيجته الوحشية والهمجية (وانا شفت ردود على موضوع علي اليوتيوب من اجانب بيقولوا حاجات مشينة بجد عن الشباب المصريين والمسلمين بالذت وبيتهموهم للأسف بإنهم مبيقدروش يتحكموا في غرايزهم وعشان كده بيلبسوا بنتاهم الحجاب ويفرضوا عليهم لبس محتشم مش بس عشان دينهم امرهم بكده لأ عشان شبابهم الغريزة بتحكمهم اكتر وبتخليهم يتصرفوا بعشوائية مع البنات الغير محجبات) بجد انا دمي اتحرق لما سمعت الكلام ده وزعلت اوي ان هي دي الصورة اللي بتتنقل لهم عننا وده طبعا نتيجة للتعميم الأعمي بسبب شوية مراهقين سفلة مالقوش رادع يردعهم عن الهمجية والتخلف ده.
صدقوني لو حطوا في كل شارع عسكري واحد مفيش حد من السفلة عديمي الأخلاق دول هايستجري يتحرش ببنت او ست اوي حتى يعمل اي شئ غير قانوني زي السرقة اللي بقت عيانا بيانا كده
بجد الموضوع دلوقتي بقي محتاج تدخل مباشر من وزارة الداخلية قبل ماتبقي ظاهرة بجد يصعب السيطرة عليها.
ربنا يسترها علينا بجد وعلى حال البلد دي
السبب هو التخلف
لا فضائيات و لا نت ولا كلام فارغ
دي شعوب عقلها فاضي و عندهم استعداد فطري للبوظان و الانحراف
و شكرا
و هو أنا قلت أنه رايح يعمل خير و بس؟؟؟ أنا بقول عملية شاملة لتطوير الشباب و البنات.... من جانب بيختلطوا و من جانب تاني جو الاختلاط شبه عائلي أو أسري و من جانب تالت بيعملوا خير....
هنا نبقا ضربنا عصفورين بحجر...
عموما لو مش مقتنع أن الاختلاط حل براحتك... بس في جميع الحالات الكبت مش هو الحل....
و ايه هو عكس الكبت؟؟ أكيد الاختلاط... و أنا لا أدعو للاختلاط في جو من المسخرة... أرجو قراءة ردودي السابقة بتمعن أكتر...
و شكرا برضه
وانا اه اللى يوصلنى للكبت ما انا اغض بصرى وامشى فى حالى ولما
اوصل لسن الزواج لو مقدرتش عليه اصوم زى ما امرنا الرسول (عليه افضل الصلاة والسلام)
لكن منعلاجش الحرام بحرام
اقتباس:
أرجو قراءة ردودي السابقة بتمعن أكتر..
بقول اختلاط و اجتماع على عمل الخير.
اقتباس:
اللى رايح يعمل الخير مبيبصش اذا كان هيعملوا مع بنات او ولاد ومش فى نيته الاختلاط
السلام عليكم
انا راى ان العيب داخلنا احنا ايوه احنا كل واحد فى الكجتمع هو مسئول بنسبه كبيره او صغيره فى الموضوع ده
بالمناسبه انا لسه فى الجامعه وكل اما امشى مع صحابى واشوف البنات ولبسها والشباب والجرأه الزايده لفضل اقول لغيت امتى هنفضل كده
بس عمرى مالقيت اجابه
عرض الآراء فى الموضوع ده أحسن بكتير من مواضيع سابقة و أتمنى يستمر على نفس المستوى. :thinking:
المشكلة من وجهة نظرى تتلخص فى كلمة واحدة الكبت.
الشباب بيتشحن بسبب عوامل كتير إنتوا عارفينها من أفلام و أغانى و كلام مع الأصحاب إلى آخره ..... تفريغ الشحنة دى لازم يتم و إلا هيتجه الإنسان لتفريغه بطرق أخرى.
بسبب البطالة فى مصر و إنعدام الأخلاق العامة بين الشباب و فقدان كل ما تحمله كلمة حقوق الإنسان و إحترام الآخر من معانى .... لا يتم تفريغ تلك الشحنة ... بالإضافة طبعاً إلى إهمال الوسائل الأخرى لتفريغ تلك الشحنة مثل التعليم الدينى و التربية السليمة و الرياضة.
و شىء آخر أنا أراه جزء كبير من المشكلة .... هو جهله بالجنس الآخر ... فتلخصت معرفته بالجنس الآخر فى جزء ضئيل جداً و هو الجزء الجنسى فقط لا غير.
ممكن نعمل إستبيان بسيط بين الشباب و نركز على المتسكعين فى الشوارع ... و نسألهم هما شايفين إيه هى أهم فايدة للبنات ؟ .... أغلبية الإجابات هتكون معروفة طبعاً.
ذكر أحد الأخوة إن الإختلاط هو السبب ...... للأسف كلامك خاطىء تماماً حسب ما أعرفه عن الطب النفسى ... الإختلاط ده شىء طبيعى .. الله لم يخلق الرجال فى نصف الكرة الشمالى و النساء فى النصف الجنوبى.
ما دامت تربية الإنسان سليمة و تعرفه حدوده فى التعامل مع الآخرين ... لا وجود لمشكلة.
لكن الفصل بين الجنسين ... من وجهة نظرى هو مثل سور برلين الفاصل بين ألمانيا الشرقية و الغربية و مثل جزيرة قبرص المنقسمة لشطرين ... نجد مزيد التباين و البعد بين الناحيتين بدلاً من التوافق و الإخاء و لن يستطيع الطرفان التعايش إلا بعد أن يتعرف كل طرف على الآخر ..... و هناك أمثلة أخرى كثيرة ... و الفصل ده مش هيحل المشكلة لكن هيثبطها فقط لحين ظهور مشاكل أخرى أخطر و أعنف كثيراً.
و كلمة الإختلاط لا تحمل أى معنى سىء (مش كلمة قبيحة يعنى) ... مش فاهم ليه فيه ناس بياخدوا الكلمة دى بمعنى سىء أو إنها شىء منبوذ !!! ..... كل الكلام ده مستورد من ثقافات أخرى مش بتاعنا.
أحب أن ألفت النظر لشىء آخر هام له علاقة بالموضوع و بالمناسبة هو يعتبر جزء من دراستى فى مادة طب المجتمع ..... نتيجة أخرى للفصل بين الجنسين هو إنتشار الشذوذ الجنسى ... بالطبع الأسباب كثيرة ... لكن أحد الأسباب هو الكبت .. و الأدلة على كلامى معروفة لمعظمنا ... فبدلاً من أن تسير العريزة فى الإتجاه الطبيعى يتم تحويل مسارها إلى طريق خاطىء .... و لا أقصد طبعاً أن يتم السماح بالمعاشرات الخاطئة بين الشباب ... لكن معرفة الآخر تمثل إنارة لذلك الطريق الصحيح... حد فاهمنى ؟!:suspicious:
غض البصر عن إيه؟! ..... إنتا محتاج غض التفكير تماماً عن حاجة إسمها بنات ... لأن اللى مش هيشوف بنات فى الشارع هيشوفها عالنت و اللى مش هيشوفها عالنت هيشوفها فى أسرته و اللى مش هيشوفها فى أسرته هيشوفها فى خياله ..... و لو مقدرش خالص ... يا هينتحر يا هيدور على حاجة يفرغ فيها الكبت ده .. و ممكن الحاجة دى تبقى صح أو غلط ... بس فى الغالب بتبقى غلط.اقتباس:
وانا اه اللى يوصلنى للكبت ما انا اغض بصرى وامشى فى حالى ولما
اوصل لسن الزواج لو مقدرتش عليه اصوم زى ما امرنا الرسول (عليه افضل الصلاة والسلام)
لكن منعلاجش الحرام بحرام
الحل ده صعب أوى ... لأنك كده كأنك بتسجن حرامى لمدة 5 سنين مثلاً على أمل إنه ينسى يعنى إيه سرقة !!!