الموضوع: تجربة سحب الهواء من دورة الباور ... تقل الباور فى العربية بعد تغير زيت الباور

السلام عليكم

الموضوع موجود على المنتدى فى اقسام اخرى والحمد الله الرجالة قايمة بالواجب وذيادة .. بس قلت اجمع الموضوع واللى وصلتلوا فى مكان واحد ومفيش اعز من القسم بتاعنا

المهم علشان مطولش عليكم

بعد تسقيط الماكينة الجديدة 1400 سى سى لحظت تقل الباور بطريقة فظيعة ( العربية تعتبر مفيهاش باور )

سألت عصام قالى شوية كدة هتلاقى الداورة واخدا هواء بعد كام كيلو كدة مشى هتظبط معاك ..

فعلا الباور اتحسن بعد ما مشييت كام كيلو كدة و التوجيه والعربية ماشية بتبقى زى الفل

والمفاجأة : تعالى اركن ووووووووو محتاج تروح الجيم الاول علشان تعرف تلف الطارة وانت بتركن

طبعا خد بقى عندك الشارع بيقوف وانت بترجع بظهرك علشان تركن ومش عارف تلف الطارة وتصعب على الناس اللى ماشية غير الناس اللى بتضحك .. المهم ركنت بعد مالفيت الطارة بأيدى الاتنين ورجلى كمان

فضلت وراء الموضوع وبعد بحث على النت والمنتدى عرفت ازاى تسحب الهواء من داورة الباور بنفسك ..

قلت اجرب واشوف الدنيا ...

المطلوب : سرنجة كبيرة من الصيدلية عاملة زى حقنة الحمير :)

- قبل ماتروح شغلك الصبح كدة انزل بدرى 20 دقيقة واعمل الاتى

1- افتح الكابوت وافتح غطاء قربة زيت الباور وشوف المقياس على كام

- الاحتمال الاول : الزيت فوق الماكس ( يبقى هتسحب الزيت الزيادة بالسرينجة و تفضيه فى علبة الباور اللى معاك او زجاجة فاضية نظيفة وجافة ) لحد ما العلامة تنزل تحت الماكس فى المنتصف كدة

- الاحتمال الثانى : يبقى الزيت ناقص ( هتذود لحد علامى المينى )

2- سيب غطاء قربة زيت الباور مفتوح وافتح كونتكت من غير ماتدور
لازم العربية تبقى باردة

3- لف الطارة لاقصى اليمين بس مش للاخر قوى وارجع لف الطارة شمال بردوا مش للاخر قوى

4- كرر الموضوع 7 او 8 مرات طبعا هيطقطع نفسك ... ريح نفسط كدة كل 3 لفا ( من غير ما تدور العربية )

5- دور العربية وسيبها تسخن وتوصل لدرجة حرارتها الطبيعية

6- كرر الموضوع ولف الطارة يمين بس مش للاخر قوى ولف الطارة شمال بردوا مش للاخر قوى ( والعربية دايرة )

7- رجع الطارة فى وضعها الطبيعى ودقيقة كدة واقفل غطاء قربة الزيت والكابوت ودقيقة كمان وتوكل على الله اعمل مشوار حلو بالعربية ..

8- مش هتحس بالفرق على طول وخصوصا لو مشوارك قريب بس على ما ترجع من شغلك وانت بتركن هتحس بالفرق الشاسع وتقول الحمد الله وسبحان من سخر لنا هذا


انا لقيت الناس بتقول سحب الهواء من داورة الزيت ( والعربية سخنة خطوة 5 و 6 )
واراء تانية بتقول ( والعربية باردة خطورة 2 و 3 )
والخطوة رقم 1 و 7 مشتركين فى الرائ سواء العربية باردة او العربية سخنة

فجمعت الرأيان فى خطوة وحدة وعملتهم والحمد الله وقلت مش مهم الفكرة متكررة بس اكيد فى ناس هتستفيد وخصوصا اللى مش بيعمل بحث او مش فى دماغة فا اهى لحد عندك وملكش حجة


التجربة شخصية وجربتها النهاردة وناجحت حتى الان بنسبة 60 % وعرفت اركن لوحدى زى زمان لسة هشوف بكرة الدنيا فيها اية

تحياتى للجميع