الموضوع: استفسار عن حجز تذاكر طيران

المشاركة الأصلية كتبت بواسطة minicooper20

اشترى تكت و خليه معاك بيوم السفر و لو مخدتش موافقه اجلو لى معاد اجازتك السنويه هتدفع غرامه ٢٥٠ ريال
و معلش شركتك هتوافق على ايه منتا كده كده واخد الاخازه من حقق تقضيها فى الحتى التعجبك
نظام غريب بصراحه
افرض انا هنا فى جده و عايز اقضى العيد فى دبى هيقولى متسفرش دنا اخرم عينو يطلعلك ذهاب و عوده و يديك بسبورك شالا تروح الهند

مفيش الكلام ده ياباشا في السعودية عموما
شركتك بس هي اللي مظبطة موظفينها
او انت مدير عام الشركة او ذو منصب قوي جدا في شركتك

في السعودية يقولك قضى اجازتك داخل السعودية ماتطلعش بره
تحس انك في حبس اجباري

المشاركة الأصلية كتبت بواسطة korkor

هنا باسبورك معاك بس ماتعرفش تخرج من البلد من غير ماتجيب حاجه اسمه تصريح خروج من كفيلك
شغل استعباد ولامؤاخذه

هو فعلا محتاج تاشيرة خروج وعودة
بمناسبة شغل استعباد والكلام ده احب ابشرك ان في مناقشة قانون جديد المفروض انه في صالح المغتربين في السعودية
في حالة انتهاء عقدك مع كفيلك يحق لك نقل كفالة مباشرة الى اي كفيل آخر بدون موافقة كفيلك الحالي
يعني عقدك يخلص وتقولك امك في العش ولا طارت ساعتها لو حب انه يقعدك تعرف تفاوضه براحتك
وحاليا مفيش حد بيقدر ييجي السعودية بدون عقد موثق من الغرفة التجارية هنا ولازم يكون مع الباسبور وقت ما يدخل السفارة السعودية في مصر

آسف ان كنت خرجت بره نطاق الموضوع

المشاركة الأصلية كتبت بواسطة أحمد كمال

حسبنا الله و نعم الوكيل في عبودية القرن ال 21 ......

والله ياباشا الحمد لله احنا في نعمة
ده في ناس هنا شغالة عند كفلاء متحكمين فيهم وبياخدو منهم فلوس - الكفيل هو اللي بياخد من المغترب فلوس علشان يسيبه يشتغل في السعودية
جايز قلت بشكل ملحوظ الفترة الاخيرة بسبب حملة الجوازات الاخيرة من نهاية العام الهجري اللي فات
لكن مازالت تجارة الفيز شغالة زي الفل وبرضه علشان تنقل كفالة لازم تدفع للكفيل على كل ورقة تخلصها ويفاوضك ويمص دمك

والله ياباشا في مهازل بتحصل
لكن الامور في تحسن مستمر جايز التحسن بطئ لكن موجود . التحسن اللي حصل في قوانين العمل العام الماضي لم يحدث منذ اكثر من 30 سنة

المشاركة الأصلية كتبت بواسطة أحمد كمال

بص يا باشا

لو حجزت دلوقتي حجز مؤقت برضه مش هيقعد صالح لحد قبل سفرك بيومين تلاتة ..... لان شركة الطيران مش هاطلة لانها لو سمحت بكده ممكن جدا تلاقي الطيارة فاضية و ولا واحد من الحاجزين مادام ما دفعش ييجي !


الخلاصة : اشتري تذكرة من دلوقتي و يكون تأجيلها بغرامة بسيطة (اسال على شروط التذكرة قبل حجزها و بالمناسبة الشروط مش بس بتختلف من شركة لشركة ..... لا........ بتختلف من تذكرة لتذكرة داخل نفس الشركة) ........ ده اقتصاديا احسن حل و نفسيا هيريحك ...... ليه؟ نحسبها بكل الاحتمالات:

1- لو ما اشتريتش دلوقتي ...... و الاجازة اتوافقت قبلها بمدة بسيطة ..... فيه احتمال كبير انك أ- ماتلاقيش حجز عشان عيد و موسم ....... ب- تلاقيه بس غالي هبل و فرق السعر اضعاف السعر الحالي واكتر من غرامة التعديل بمراحل ...... و في الحالتين هتبقى تحت ضغط مادي (لو لقيت بالغالي) و نفسي (لو ما لقيتش و الاجازة هتروح عليك) رهيب

2- لو ما اشتريتش دلوقتي ....... و الاجازة اترفضت ........ خسارتك صفر ......

3- لو اشتريت دلوقتي (بغرامة بسيطة زي ما كتبت لك فوق ..... 300 ريال قطري مثلا) ..... و الاجازة اترفضت ....... خسرت 300 ريال قطري ........ متعوضة يعني مش هتموت ..... و معاك تذكرة للاجازة اللي بعدها لما تتوافق ان شاء الله


4- لو اشتريت دلوقتي ........ و الاجازة اتوافقت .......... انت كسبان كتير لانك بالك مرتاح و تذكرتك في جيبك و يوم الاجازة هتطلع عالمطار و انت في بطنك بطيخة صيفي ...... لا قلقان التذكرة تغلى و لا انك ما تلاقيش


في الاربع احتمالات اعلاه ...... فيه احتمال 25% لخسارة رهيبة ب ...... احتمال 25% لخسارة صفر ..... احتمال 25% لحسارة بسيطة مقابل مكسب محتمل جيد...... احتمال 25% لمكسب جيد ....... و اخر احتمالين هما في حالة اتخاذ نفس القرار بالحجز

فبدل ما تقعد من هنا لشهر 7 بتاكل في نفسك عالاجازة و التذكرة اللي ممكن ما تلاقيهاش اشتري من دلوقتي و اشتري نفسك

تحليل منطقي احييك عليه