تقييم ال 1000 كم IslamGen2
السلام عليكم
ازيكم يا جماعة كل عام وأنتم بخير العيد خلص يارب تكونوا بصحة وسلامة إن شاء الله ...
====
العداد : 1098 كم
استهلاك البنزين وقت الاستلام: 12.1 L/100Km
استهلاك البنزين حاليا ً: 9.0 L/100Km
(بدون تكييف ، يمكن شغلته مرتين تلاتة)
التقييم العام: ممتازة وكما توقعت تماما ً.
المميزات:
1- شكل خارجى وداخلى ممتاز ودة كان رأى كل اللى شاف وركب معايا.
2- ثبات وإتزان ممتاز ، كل سواقتى معظمها على طرق سريعة (الأوتوستراد طريق الجامعة).
3- إستهلاك البنزين بيقل مع الوقت ، الصفيحة بتعمل حوالى 400 كم.
4- الكاسيت ممتاز فعلا ً مكنتش حاسس بكدة فى الأول.
5- مساحة الشنطة واسعة.
6- استجابة الفرامل جيدة.
-----
---
دة اللى حاضر فى بالى ، عموما هى المميزات لا يختلف عليها أحد وأنا أتفق تماما ً مع كل الميزات اللى ذكرها الأخوة وبأكد عليها ، نيجى بأة للعيوب.
المشاكل والعيوب:
1- مساحة الكنبة ضيقة ، ومساحة الكراسى الأمامية معقولة ، وأنا قاعد ببقى مرتاح جدا ً ، لكن وانا داخل أقعد أو خارج من العربية بحس بالضيق ، أنا طولى 189 سم.
2- العفشة مش مريحة فى المطبات ، خاصة وأنا ماشى على النقر بتاعت قضبان المترو ، بحس إن النقر هتطلع من نفوخى.
3- الفتيس مش ناعم لأ ، ساعات بيعصلج ويبقى ناشف فى النقلة.
4- المالتى فانكشن فى الدريكسيون ، زرار ال Mute وزرار ال Vol - فيهم حاجة مش مظبوطة لسه حاصلة معايا من يومين ، لما بدوس - فوليوم يعمل ميوت لازم ادوس مرتين تلاتة عشان يشتغل ولما بدوس ميوت ساعات يستجيب وساعات لأ ، لازم أدوس عليه مرة أو اتنين ، ساعات يستجيب من أول مرة ( مش عارف بقى أقولهم فى الصيانة ولا لأ أنا خايف يفتحوا يبوظوا الدنيا ويطينوها أكتر ).
5- الكلاكس المفروض متركب على الإيرباج الجزء دة المفروض إنه ثابت مش كدة؟ ، لأنى بحس بخلخلة كدة لما بمسكه وأهزه ، دة طبيعى ولا ايه؟.
ملاحظات:
- سحب العربية حاسس إن الموتور مخنوق.
- أبعاد العربية محتاجة وقت عشان تتعود عليها ، الرؤية من ورا صعبة.
- الريموت لازم أقرب (2 متر/3 متر) ، المفروض 10 متر.
- الكراسى والكنبة حاسس مع الوقت هيتوسخوا فيه واحد نصحنى قالى هاتلهم كوفر ، بيتجاب منين؟.
============
دة كل اللى حاضر فى ذهنى حاليا ً ، عاوز أروح اعمل الصيانة بكرة ، ياترى هيبقوا فاتحين ولا 6 أكتوبر أجازة؟ أروح من الساعة كام؟ ، هياخدوا وقت قد ايه؟ ، وياريت حد يوصفلى أروح ازاى بالتفصيل لحسن أنا ضايع فى الطرق ، انا ساكن فى مصر الجديدة هليوبليس.
