الموضوع: تجربتى مع تعديل فوجات لانسر بومه وتركيب فوجات أسبرانزا a620

بعد قراءة أكثر من موضوع على نايل موتورز عن تعديل فوجات البومه لفوجات أوكتافيا a5 أو فوجات ألنترا أو فوجات أسبرانزا a620


أستقريت على فوجات الأسبرانزا أشتريت الفوجات وللأسف الكرتونه فاضيه فيها الفوجات بس لا ضفيره ولا كت أوت ولا اى شىء



وروحت لمحل الفايبر علشان يركبهم ولو فراغات ولا حاجه يملاها مالقيتهوش فروحت للسمكرى قاللى أركبهملك هو صحيح أتعلم فيا بس الشغل طلع تمام بنسبة 75فى الميه هو عملهم خوصتين حديد لكل فوج على المقاس من الأكصدام والفوج وربطهم بمسامير وبرشام بس لازم ناخد بالنا من 3 حاجات



أول حاجه أوعى السمكرى يربط مسمار أو برشام فى عضم الفوج نفسه لأنه كده هايدخل ميه ويقرفك وياريت تجرب الفوجات قبل ما تركبهم لأنهم عندى لقيت واحد منهم بيدخلوا ميه وخليت الكهربائى فكه ونشفه بالهوا وعمله بسيليكون مع ان السمكرى ما عملش فى عضمهم حاجه ( عيب صناعه صينى بأه )



تانى حاجه تخلى السمكرى يكفى الفوجات للأرض ويجيبهم فى وش بعض لأن مسمار الريجلاج غالبا مش هاتلاقيه شغال مع العلم أن اللمبات اللى فيهم زباله وهاتتحرق علطول (أنا ما ركبتش زينون)



تالت حاجه السمكرى هايضطر يقطع فى الأكصدام علشان يركب الفوجين خد بالك أوى لأن حجم الفوجين قريب جدا من الفتحات الموجوده فتخليه يشيل يادوب 2 ميلى من تحت بس ولو احتاج كمان يزود لأنه غالبا هايتعلم فى أول فوج ويطلع التانى مظبوط




أما بالنسبه للفيشه بتاع الفوجات بتبقى موجوده فى العربيه تحت الأكصدام نازله فى العربيه وهاتكتشف كمان أن النور بتاع الفوجات موجود فى التابلوه وطبعا هاتحتاج كذا متر سلك وشوية رفايع فى حدود 15 جنيه وهاتحتاج زرار ديماكس مثلا تقريبا ب 25 جنيه لأن الزرار الأصلى فى التقطيع (الحته على بعضها بزراير المرايات )هاتلاقيها ب 370 جنيه عربيتى 1300 وهاتحتاج كتاوت أنا جبتها أصلى من عند بتاع التقطيع ب 40 جنيه



بالنسبه للمصنعيات أنا السمكرى أخد منى 50 جنيه
والكهربائى أخد 50 جنيه برده
واللمبتين أتحرقوا منى بعد كده فجبت لمبات أصلى الواحده ب 15 جنيه



وللعلم الفوج جميل جدا على العربيه أنما كصناعه وخامات فهو للأسف ردىء جدا صينى أصلى



أما بالنسبه للنور فمفرقش كتير لأنى ما ركبتش زينون أما كشكل فهو شيك جدا



حبيت أنقل لكم التجربه علشان الكل يستفيد زى ما أنا أستفدت من أعظم منتدى على الأنترنت وأعضاؤه المحترمين


وأدعوا الجميع لمزيد من المشاركات فكلمة شكر تساوى الكثير تشجيعا لأدارة المنتدى الكرام وتشجيعا لصاحب الموضوع على نقل كل ما يمر به من تجارب ومساعدتكم على محاربة جشع التجار وجشع الصنايعيه وعلشان ما حدش يبيعك لحد ___________________وشكرا جزيلا

المشاركة الأصلية كتبت بواسطة j a g u a r

شكرا لنقل التجربه والف مبروك

شكرا جزيلا على الرد