مش قادر اقول انى مش فخور بكونى مصرى

لأ بقولها باعلى صوتى انا مصرى وافتخر

افتخر بأنى سليل اول حضارة فى التاريخ ، افتخر بأن موروثى الثقافى اتبنى من آلاف اللبنات اللى حطها ثراثها الحضارى مينا وخوفو واحمس ورمسيس وحط تراثها الروحانى سيدنا ابراهيم وسيدنا يوسف الصديق وسيدنا موسى عليهم جميعا السلام،افتخر انى من البلد التى وجد فيها سيدنا المسيح الامان فى صغره بعد ان ضاقت به وبامه العذراء بلادهم ، افتخر انى من البلد التى عشقها عمرو بن العاص وصارت حاضرة بلد المعز لدين الله، افتخر انى من البلد التى شهدت مجد الدولة الأيوبية وحضارة المماليك ، افتخر اننى من البلد التى صارت قاطرة الحضارة فى المنطقة فى عهد محمد على وابنائه

ربما اننا نمر بظروف صعبة، لكنها كالمرض العارض ، يمر وينتهى ويبقى البناْء الشامخ،

اه انا مصرى ومحظوظ انى مصرى، صحيح معنديش بير بترول اغرف منه دولارات ادوس بيها على رقاب مخاليق ربنا، صحيح ارضى الزراعية والمية عندى على القد، صحيح انى واهل بلدى بنمر بظروف صعبة، لكن ميراثنا الحضارى مصيرة فى يوم يطلع على السطح وساعتها لن يصح الا الصحيح، واتمنى ان ده يكون قريب علشان اولادى او ولاد ولادى يعيشوا العيشة اللى تليق بابناء هذا البلد العريق